រាជធានីភ្នំពេញ ៖ កាលពីរសៀលថ្ងៃទី២១ ឧសភា ២០១៥ គណៈកម្មាធិការអនុសាខាកាកបាទក្រហមកម្ពុជាខណ្ឌសែនសុខដឹកនាំដោយលោកលី សាវេត ប្រធានកិត្តិយសគណៈកម្មាធិការអនុសាខាកាកបាទក្រហមកម្ពុជាខណ្ឌសែនសុខ និងជាអភិបាលនៃគណៈអភិបាលខណ្ឌសែនសុខ និងលោកថេង សុថុល ប្រធាគណៈកម្មាធិការអនុសាខាកាកបាទក្រហមកម្ពុជាខណ្ឌ និងជាអភិបាលរងខណ្ឌ និងមន្ត្រីរាជការខណ្ឌ សង្កាត់ និងក្រុមសហភាព សហព័ន្ឋយុវជនកម្ពុជាខណ្ឌ សង្កាត់ ជាច្រើននាក់បានអញ្ជើញទៅចូលរួមរំលែកទុក្ខដ៏ក្រៀមក្រំ និងអុជធូបគោរពវិញ្ញាណក្ខន្ធឧទ្ទិសកុសលដល់គ្រូសារដែលបាត់បង់ជីវិតមួយគ្រួសារ ស្លាប់៤នាក់ និង២គ្រួសារទៀតដែលគ្រាន់តែឆេះលំនៅឋានក្នុងឧបទ្ទវហេតុគ្រោះអគ្គិភ័យ ដែលកើតឡើងកាលពីវេលាទៀបភ្លឺ ថ្ងៃទី២១ ឧសភាកន្លងទៅនេះ ស្ថិតនៅក្នុងសង្កាត់ភ្នំពេញថ្មី ខណ្ឌសែនសុខ ។
ជាមួយគ្នានោះលោកលី សាវេត អភិបាលខណ្ឌសែនសុខបាននាំអំណោយរបស់សាលាខណ្ឌចំនួន២លានរៀល និងអំណោយកាកបាទក្រហមខណ្ឌសែនសុខចំនួន១លានរៀល ដល់គ្រួសារសព ដែលបានបាត់បង់ជីវិតចំនួន៤នាក់ និងគ្រឿងឧបភោគបរិភោគ និងសម្ភារៈមួយចំនួន។
ចំណែកចំនួន២គ្រួសារទៀតដែលគ្រាន់តែឆេះលំនៅឋានចំនួន២ខ្នង ក្នុងមួយគ្រួសារៗទទួលបានថវិកាចំនួន១លាន៥សែនរៀល គ្រឿងឧបភោគ បរិភោគ សម្ភារៈមួយចំនួន៕
ចែករំលែកព័តមាននេះ