រាជធានីភ្នំពេញ ៖ ទីតាំងរោងលក់ផ្កាលើចិញ្ចើមផ្លូវសាធារណៈមួយកន្លែង ត្រូវកម្លាំងរបស់អាជ្ញាធរមូលដ្ឋានខណ្ឌចំការមន តម្រូវឱ្យម្ចាស់រុះរើចេញ ខណៈដែលកំពុងតែសង់បន្ត កាលពីវេលាម៉ោង១១ និង៣០នាទីព្រឹកថ្ងៃទី២២ ឧសភា ២០១៥ ស្ថិតនៅចំណុចផ្លូវលេខ៣៦០ កែងនិងផ្លូវលេខ១៦៣ ក្នុងសង្កាត់ទួលស្វាយព្រៃទី១ ខណ្ឌចំការមន ។
តាមប្រភពព័ត៌មានពីលោកឌី សុផល នាយរងការិយាល័យអន្តរវិស្ស័យ និងសំណង់ខណ្ឌចំការមនបានប្រាប់ឱ្យដឹងថា ដោយមានការណែនាំអំពីសំណាក់លោកព្រំ សំខាន់ អភិបាលខណ្ឌចំការមន ដោយផ្ទាល់ ទើបបានលោកដឹកនាំកម្លាំងចម្រុះមួយក្រុម ចុះមកធ្វើការណែនាំទៅដល់ម្ចាស់ទីតាំងលក់ផ្កាមួយកន្លែងនេះ ឱ្យចញ្ឈប់នូវការសាងសង់រោងជាបន្តទៅទៀត ។
ដោយទីតាំងមួយកន្លែងនេះ បានធ្វើកសាងជារោងដាក់លក់ផ្កា និងកំពុងតែធ្វើរោងបន្តនៅលើចិញ្ចើមផ្លូវ ដែលធ្វើឱ្យប៉ះពាល់ដល់សណ្តាប់ធ្នាប់សាធារណៈយ៉ាងខ្លាំងផងដែរ ។
លោកបានបន្តទៀតថា ក្នុងការចុះមកនេះដែរ គឺតម្រូវឱ្យម្ចាស់ទីតាំងខាងលើបញ្ឈប់ការដាក់លក់នៅលើចិញ្ខើមផ្លូវ និងរុះរើរោងដែលបានសាងសង់ ដើម្បីដាក់លក់ផ្កាទាំងនេះដោយខ្លួនឯងវិញផងដែរ ។ មិនតែប៉ុណ្ណោះ អាជ្ញាធរខណ្ឌក៏បាននិងកំពុងតែយកចិត្តទុកដាក់ក្នុងការរៀបចំសណ្តាប់ធ្នាប់នៅតាមទីសាធារណៈផ្សេងៗ នៅក្នុងមូលដ្ឋានអោយមានសណ្តាប់ធ្នាប់កាន់តែល្អប្រសើឡើងជាបន្តទៅទៀតផងដែរ។
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ