រាជធានីភ្នំពេញ ៖ ចាន់ រតនៈ មកពីក្លិបខ្លារខិនមានរិទ្ធ បង្ហាញទឹកចិត្តចង់បំបាក់ ម៉ន សាម៉េត មកពីក្លិបការិយាល័យទី៥ កងទ័ពជើងគោក ចំណែក ផាន់ សារុន មកពីក្លិបគជសារកីឡា ត្រៀមកណ្តាប់ដៃប្រហារ សោម វិឆ័យ មកពីក្លិបសាលវ័ន្តកីឡានៅលើសង្វៀនទូរទស្សន៍បុ៉ស្តិ៍លេខ៣ ថ្ងៃអាទិត្យ ទី២៤ ឧសភា ខាងមុខនេះ ។
រវាង ចាន់ រតនៈ និង ម៉ន សាម៉េត សុទ្ធតែជាអ្នកប្រដាល់ស្ទើរភ្លើងដូចគ្នាមិនសូវមានឈ្មោះបោះសំឡេងនៅលើសង្វៀនបុ៉ន្មានឡើយ បុ៉ន្តែគេចាប់អារម្មណ៍ខ្លាំងដោយសារគូនេះធ្លាប់ឡើងសង្វៀនញឹកញាប់បំផុត ។ ទោះបីជាយ៉ាងណា ពួកគេទាំងពីរមិនធ្លាប់ជួបគ្នាពីមុនមកទេ។ ជួបគ្នាលើកនេះ មហាជនផ្តល់ការវិភាគថា មិនអាចមើលស្រាលលើភាគីខាងណាទេ ទោះបី ចាន់ រតនៈ ប្តេជ្ញាបំបាក់ ម៉ន សាម៉េត ក្នុងជំនួបលើកដំបូងក៏ដោយ ។ ចាន់ រតនៈ ខ្លាំងខាងទាត់ និងមានកម្លាំងវាយសន្ធាប់លើដៃគូ ៥ទឹកពេញមិនងាយស្រុតចុះឡើយ ។
ចំណែក ម៉ន សាម៉េត ខ្លាំងខាងកណ្តាប់ដៃ វាយឆាប់ច្រឡោត បើគូប្រកួតវាយឱ្យឈឺសាច់បន្តិច គេនឹងសម្រុកចូលវាយមិនដកដៃទេ ។ ម៉ន សាម៉េត មានកម្លាំងវាយសន្ធាប់លើដៃគូពីដំបូង បើ ចាន់ រតនៈ អាចទប់បានច្បាស់ជាសង្ឃឹមឈ្នះច្រើននៅប្រមាណទឹកទី៤ ឬទឹកទី៥ បុ៉ន្តែកន្លងមកកីឡាកររូបនេះច្រើនមានសំណាងជួបដៃគូល្មមៗ ទើបឧស្សាហ៍ឃើញឈ្នះដោយផ្តួលគូប្រកួត ។ ចាំមើល លើកនេះគេអាចផ្តួល ចាន់ រតនៈ បានឬអត់ ?
ដោយឡែកជំនួបរវាង ផាន់ សារុន និង សោម វិឆ័យ កំពុងតែធ្វើឱ្យអ្នកតាមដានពិបាកទស្សន៍ទាយថា អ្នកណាឈ្នះណាស់ ព្រោះពួកគេមានក្បាច់គុនប្រហាក់ប្រហែលគ្នា ។ ផាន់ សារុន មួយរយៈនេះមិនសូវឃើញលេចមុខនៅលើសង្វៀនញឹកញាប់ទេ តែបើមើលលើវិជ្ជាគុនវិញ មិនចាញ់កីឡាករជើងចាស់បុ៉ន្មាន ។ ផ្លែកែង និងជង្គង់របស់គេអាចប្រើការបានយ៉ាងល្អ មានចិត្តអំណត់ និងមិនចេះមើលស្រាលលើគូប្រកួតដែលមានសមត្ថភាពអន់ជាងខ្លួនឡើយ។ ចំណែក សោម វិឆ័យ ថ្វីដ្បិតគេជាសិស្សប្អូន ផាន់ សារុន មែន បុ៉ន្តែមួយរយៈនេះឃើញលេចមុខនៅលើសង្វៀនញឹកញាប់ ។ ទោះបីសោម វិឆ័យ អត់មានស្នៀតអីដែលពូកែលុបលើ ផាន់ សារុន ក៏ពិតមែន តែកុំមើលស្រាលឱ្យសោះ បើគូប្រកួតហ៊ានតែប្រហែសច្បាស់ជាស៊យធំមិនខាន ។
ក្រៅពីគូទទួលការចាប់អារម្មណ៍ខ្លាំងនេះទៅ នៅលើសង្វៀនដដែលក៏មានកីឡាករខ្លាំងៗជាច្រើនគូទៀតដូចជា កីឡាករឡេះ តើក មកពីក្លិបពុទ្ធសេរីវង្សកីឡា ប្រកួតជាមួយកីឡាករផុង សុភាព មកពីក្លិបខេត្តរតនគិរី ។ កីឡាករផុន ផុល មកពីក្លិបតាព្រហ្មមានជ័យបង្ក្រាបគ្រឿងញៀន ប្រកួតជាមួយកីឡាករពុធ សុជាតិ មកពីក្លិបពុទ្ធសេរីវង្សកីឡា និងកីឡាករ Steven Harver មកពីក្លិបតាព្រហ្មមានជ័យបង្ក្រាបគ្រឿងញៀន ប្រកួតជាមួយកីឡាករថៃ ប៊ុនឌី មកពីក្លិបនាគរាជគុនខ្មែរ ៕
ចែករំលែកព័តមាននេះ