រាជធានីភ្នំពេញ ៖ កម្លាំងនគរបាលផ្នែកព្រហ្មទណ្ឌនៃអធិការដ្ឋាននគរបាលខណ្ឌដូនពេញបានឃាត់ខ្លួនជនសង្ស័យពីរនាក់នៅកែងផ្លូវលេខ១៩ និង៩៤ ស្ថិតក្នុងភូមិ៥ សង្កាត់វត្តភ្នំ ខណ្ឌដូនពេញ កាលពីវេលាម៉ោង១២ និង៤០នាទីរំលងអាធាត្រឈានចូលថ្ងៃទី២២ ឧសភា ២០១៥ បន្ទាប់ពីឆែកឆេររកឃើញថ្នាំញៀនពីរកញ្ចប់តូចដែលជននោះលាក់ទុកក្នុងហោប៉ៅខោ។
យោងតាមរបាយការណ៍នគរបាលបានឲ្យដឹងថា នៅវេលាម៉ោងកើតហេតុ កម្លាំងនគរបាលផ្នែកព្រហ្មទណ្ឌនៃអធិការដ្ឋាននគរបាលខណ្ឌដូនពេញបានជិះម៉ូតូល្បាតលុះដល់កែងផ្លូវលេខ១៩ និង៩៤ស្ថិតក្នុងភូមិ៥ សង្កាត់វត្តភ្នំ ខណ្ឌដូនពេញ បានឃើញជនសង្ស័យពីរនាក់ឈប់ម៉ូតូម៉ាកនិច ពណ៌ក្រហមលាយខ្មៅគ្មានស្លាកលេខ។
ដោយមានការសង្ស័យកម្លាំងនគរបាលបានធ្វើការឆែកឆេរ ហើយរកឃើញថ្នាំញៀនប្រភេទម៉ាទឹកកកចំនួនពីរកញ្ចប់តូចដែលជននោះលាក់ទុកក្នុងហោប៉ៅខោ។ ជនសង្ស័យដែលឃាត់ខ្លួនមានឈ្មោះគីម ហុង ភេទប្រុស អាយុ២២ឆ្នាំ មានទីលំនៅភូមិរកាកោង ឃុំរកាកោង១ ស្រុកមុខកំពូល ខេត្តកណ្តាល(ជននេះលាក់ថ្នាំញៀនល្នុងហោប៉ៅខោខាងឆ្វេង) និងឈ្មោះខឹង លីន ភេទប្រុស អាយុ១៩ឆ្នាំ មានទីលំនៅក្រង់ស្វាយ ឃុំស្វាយអំពារ ស្រុកមុខកំពូល ខេត្តកណ្តាល។
ជនសង្ស័យត្រូវបានឃុំខ្លួនបណ្តោះអាសន្ននៅអធិការដ្ឋាននគរបាលខណ្ឌដូនពេញដើម្បីកសាងសំណុំរឿងបញ្ជូនទៅតុលាការ៕
ចែករំលែកព័តមាននេះ