ពួកជីហាដក្រុមរដ្ឋអិុស្លាម កាលពីថ្ងៃទី២០ ឧសភា វាយដណ្តើមកាន់កាប់ទីក្រុងបុរាណ PALMYRE ទាំងស្រុងហើយដែលកំណត់ពីចំណុចថ្មីមួយប្រឆាំងរបបស៊ីរីរួចញ៉ាំងឱ្យមានការព្រួយបារម្ភចំពោះបេតិកភ័ណ្ឌស្ថាបត្យកម្មនៃទីក្រុងនោះ ។
ក្នុងប្រទេសអីុរ៉ាក់ជិតខាងការវាយបកមួយកំពុងរៀបចំ ដើម្បីរំដោះទីក្រុងរ៉ាម៉ាឌី ទីប្រជុំជនខេត្តអាល់អានបារ ដែលធ្លាក់ក្នុងដៃពួករដ្ឋអិុស្លាម កាលពីថ្ងៃទី១៧ ឧសភា ។
សហរដ្ឋអាមេរិកប្រមុខក្រុមអន្តរជាតិប្រឆាំងជីហាដកំពុងតែពិនិត្យឡើងវិញពីយុទ្ធសាស្ត្ររបស់ខ្លួននៅអីុរ៉ាក់ដោយសន្យាថានឹងជួយអាជ្ញាធរអីុរ៉ាក់ដណ្តើមយកទីក្រុងនោះវិញដោយឆាប់រហ័ស ។
សភាពការណ៍នេះជារបៀបវារៈនៃកិច្ចប្រជុំអន្តរជាតិមួយនាថ្ងៃទី២ មិថុនា នៅក្រុងប៉ារីស ហើយរដ្ឋមន្ត្រីការបរទេសបារាំងលោក LAURENT FABIUS គូសបញ្ជាក់ថា គេត្រូវ ពិភាក្សាគ្នាពីវិធីដែលក្រុមចម្រុះត្រូវធ្វើ ។
កាលពីយប់ថ្ងៃទី២០ ឧសភា អង្គការសិទ្ធិមនុស្សស៊ីរី OSDH រាយការណ៍ថា ក្រុមរដ្ឋអ៊ិស្លាមចូលកាន់កាប់ទីក្រុង PALMYRE ទាំងស្រុងហើយ ។ OSDH រៀបរាប់ពីការបាក់ទ័ពយ៉ាងខ្លាំងរបស់កងកម្លាំងស៊ីរីរត់ទៅគ្រប់កន្លែង។ កងយន្តហោះចម្បាំងស៊ីរីបានទម្លាក់គ្រាប់បែកលើក្រុង PALMYRE បន្ទាប់ពីពួកបរដ្ឋអ៊ិស្លាមដណ្តើមកាន់កាប់ទីក្រុងនោះទាំងស្រុងមក ៕
ចែករំលែកព័តមាននេះ