រាជធានីភ្នំពេញ ៖ ការប្រកួតប្រដាល់ដណ្តើមខ្សែក្រវាត់គោជល់ក្នុងប្រភេទទម្ងន់៦៤គីឡូក្រាមនៅលើសង្វៀនទូរទស្សន៍ CTN និងចាក់ផ្សាយតាមកញ្ចក់ទូរទស្សន៍ CNC នៅយប់ថ្ងៃសៅរ៍ ទី២៣ ខែឧសភា
រាជធានីភ្នំពេញ ៖ ការប្រកួតប្រដាល់ដណ្តើមខ្សែក្រវាត់គោជល់ក្នុងប្រភេទទម្ងន់៦៤គីឡូក្រាមនៅលើសង្វៀនទូរទស្សន៍ CTN និងចាក់ផ្សាយតាមកញ្ចក់ទូរទស្សន៍ CNC នៅយប់ថ្ងៃសៅរ៍ ទី២៣ ខែឧសភា ស្អែកនេះ ឈានចូលដល់សប្តាហ៍ទី៤ ហើយ ។ កីឡាករផាន់ គ្រាន់ មកពីក្លិបគជសារកីឡា ត្រូវប្រកួតជាមួយកីឡាករថៃ ឈោក ឆ័យ និងកីឡាករកន ចន្ថា មកពីសមាគមកីឡាប្រដាល់ក្រសួងការពារជាតិ ប្រកួតជាមួយកីឡាករថៃ ភេត លូកយ៉ត ។
ផាន់ គ្រាន់ និង ឈោក ឆ័យ មានសំណាងរកបាន៣ពិន្ទុម្នាក់មករក្សាទុកនៅក្នុងដៃរួចមកហើយ ដោយ ផាន់ គ្រាន់ កាលពីប្រកួតនៅក្នុងជុំទី១ បានយកឈ្នះលើកីឡាករថៃ ខ្វាន់ ឆ័យ នៅទឹកទី៤ ។ ចំណែកកីឡាករ ឈោក ឆ័យ បានយកឈ្នះពិន្ទុកីឡាករទេស សំខាន់ មកពីក្លិបកងពលតូចលេខ៧០ ។ ដូច្នេះរវាងពួកគេទាំងពីរនាក់សុទ្ធតែមានស្នៀតប្រយុទ្ធនៅលើសង្វៀនល្អដូចគ្នា គ្រាន់តែ ផាន់ គ្រាន់ ចាញ់កម្ពស់ ឈោក ឆ័យ បន្តិចប៉ុណ្ណោះ ចំណែកប្រវត្តិប្រកួតនៅលើសង្វៀន ក៏តិចជាងកីឡាករថៃរូបនេះដែរ ។ ផាន់ គ្រាន់ ធ្លាប់ប្រកួត៣៧ដង ឈ្នះ៣០ដង ចាញ់៥ដង ស្មើ២ដង និងធ្លាប់ផ្តួលគូប្រកួតឱ្យសន្លប់នៅលើសង្វៀនចំនួន១២ដង ។ ចំណែក ឈោក ឆ័យ វិញនោះធ្លាប់ឡើងសង្វៀនប្រកួត៦១ដង ឈ្នះ៤១ដង ចាញ់២០ដង ។ សម្រាប់ការប្រកួតលើកនេះ ផាន់ គ្រាន់ នៅតែមានទំនុកចិត្តខ្លាំងដោយសំអាងទៅលើស្នៀតកណ្តាប់ដៃដែលវាយចេញរហ័ស និងមានទម្ងន់ធ្ងន់ទៀតផង ។ ប៉ុន្តែ ឈោក ឆ័យ ក៏ខ្លាំងមិនធម្មតាដែរ ជាពិសេសកម្លាំងស៊ុហ្វរបស់គេអាចវាយបាន៥ទឹកពេញមិនងាយស្រុតចុះឡើយ ។ ចាំមើល ផាន់ គ្រាន់ ឬ ឈោក ឆ័យ ជាអ្នកមានសំណាងរកបាន៣ពិន្ទុបន្ថែមទៀតនោះ ។
ចំណែក កន ចន្ថា ដែលមានសំណាងរកបាន៣ពិន្ទុកាលពីលើកមុននោះជួបកីឡាករថៃភេត លូកយ៉ត ដែលចាញ់ការប្រកួតជាលើកដំបូងមិនហ៊ានអះអាងទុកមុនពីការយកឈ្នះម្តងទៀតសម្រាប់ការប្រកួតលើកនេះទេ ។ កន ចន្ថា ធ្លាប់ប្រកួត១០៤ដង ឈ្នះ៨០ដង ចាញ់២៤ដង មិនដែលស្មើ និងធ្លាប់ផ្តួលគូប្រកួតឱ្យសន្លប់នៅលើសង្វៀន៣៣ដង ។ រីឯ ភេត លូកយ៉ត ធ្លាប់ប្រកួត៩៦ដង ឈ្នះ៧០ដង ចាញ់២៣ដង ស្មើ៣ដង ។ ដូច្នេះបើធ្វើការប្រៀបធៀបទៅលើប្រវត្តិប្រកួតរវាងកីឡាករទាំង២ គេមានជំនឿចិត្តលើ កន ចន្ថា ជាង ។
នៅលើសង្វៀនដដែល ក៏មានការប្រកួតជាលក្ខណៈមិត្តភាពចំនួន២គូទៀតដែរ ក្នុងនោះកីឡាករង៉ែត រដ្ឋា មកពីក្លិបតាព្រហ្មមានជ័យបង្ក្រាបគ្រឿងញៀន ប្រកួតជាមួយកីឡាករវៀត ប៊ុនឌឿន មកពីសមាគមកីឡាប្រដាល់ក្រសួងការពារជាតិ និងកីឡាករផៃ គឹមហឿត មកពីក្លិបគីសែមានរិទ្ធ ប្រកួតជាមួយកីឡាករសេក គឹមផៃ មកពីក្លិបរ័ត្នសែនជ័យ៣១៧គូលេន ខេត្តសៀមរាប ៕
ចែករំលែកព័តមាននេះ