ខេត្តបាត់ដំបង ៖ ចៅក្រមស៊ើបសួរសាលាដំបូងខេត្ត បានសម្រេចចេញដីកាឃុំខ្លួនមន្ត្រីកងរាជអាវុធហត្ថខេត្តម្នាក់ កាលពីវេលាម៉ោង១០ព្រឹកថ្ងៃទី២១ ឧសភា ២០១៥ បន្ទាប់ពីតំណាងអយ្យការអមសាលាដំបូងខេត្ត រកឃើញកំហុសចំនួន៣ករណី ពាក់ព័ន្ធក្នុងសំណុំរឿងបង្កគ្រោះថ្នាក់ចរាចរណ៏សម្លាប់មនុស្ស២នាក់។
លោកម៉ែន បូរី នាយផ្នែកដំណោះស្រាយការិយាល័យចរាចរណ៍ជើងគោកនៃស្នងការដ្ឋានខេត្តបានប្រាប់កោះសន្តិភាពថា ជនសង្ស័យឈ្មោះថាវ ឡុង អាយុ៤៥ឆ្នាំ ជាមន្ត្រីកងរាជអាវុធហត្ថខេត្ត ត្រូវតំណាងអយ្យការអមសាលាដំបូងខេត្តរកឃើញកំហុស និងធ្វើការចោទប្រកាន់ចំនួន៣ករណី ដែលពាក់ព័ន្ធនឹងករណីបង្កគ្រោះថ្នាក់ចរាចរណ៏ធ្ងន់ធ្ងរ បណ្ដាលឲ្យមនុស្សស្លាប់២នាក់។
លោកថា ពិរុទ្ធជនរូបនេះ បានរងការចោទពីបទ១-ប្រើប្រាស់ស្លាកលេខរថយន្តក្លែងក្លាយ ២-បើកបរពេលស្រវឹង និង៣-បង្កគ្រោះថ្នាក់ចរាចរណ៏បណ្ដាលឲ្យស្លាប់មនុស្ស។ លោកម៉ែន បូរី បញ្ជាក់ថា បន្ទាប់ពីតំណាងអយ្យការធ្វើការចោទប្រកាន់ លោកចៅក្រមស៊ើបសួរបានសម្រេចចេញដីកាឃុំខ្លួនជននេះបណ្ដោះនៅក្នុងពន្ធនាគារហើយ ក្រោយបញ្ចប់ការពិនិត្យសំណុំរឿង ដើម្បីបើកការស៊ើបអង្កេតបន្ត។
សូមបញ្ជាក់ថា ពិរុទ្ធជនឈ្មោះថាវ ឡុង អាយុ៤៥ឆ្នាំ ជាមន្ត្រីកងរាជអាវុធហត្ថខេត្ត បានបើករថយន្តម៉ាកឡិចស៊ីសRX300 ពណ៌ខ្មៅ ពាក់ស្លាកលេខខេមរភូមិន្ទរបស់ខ្លួនបុករះអ្នកជិះកង់ និងជិះម៉ូតូពីក្រោយពេញទំហឹង បណ្ដាលឲ្យស្ត្រីឈ្មោះជួន សារិន អាយុ៥៤ឆ្នាំជិះម៉ូតូ និងកុមារាឈ្មោះចិត្ត ណាត អាយុ១៤ឆ្នាំជិះកង់ ស្លាប់ទាំង២នាក់ កាលពីល្ងាចថ្ងៃទី១៩ ឧសភា ស្ថិតនៅលើកំណាត់ផ្លូវជាតិលេខ៥៧ ត្រង់ចំនុចភូមិគោកពន្លៃ សង្កាត់អូរម៉ាល់ ក្រុងបាត់ដំបង ខណៈពិរុទ្ធជនរូបនេះបើកបរទាំងខ្លួនស្រវឹងស្រាជោក
ជាំ។
ឧប្បតិហេតុនេះបានកើតឡើង ក្នុងគ្រាដែលរថយន្តជនបង្ក និងជនរងគ្រោះទាំង២នាក់ធ្វើដំណើរស្របទិសគ្នាពីកើតទៅលិច។ បន្ទាប់ពីបង្កគ្រោះថ្នាក់អ្នកបើកបររថយន្តក៏ត្រូវសមត្ថកិច្ចមូលដ្ឋានចាប់វាយខ្នោះដៃភ្លាមៗដែរ បើទោះជាជនបង្ករូបនេះព្យាយាមអះអាងប្រាប់គេថា ខ្លួនជាមន្ត្រីប៉េអឹមខេត្តក្ដី។
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ