រាជធានីភ្នំពេញ ៖ ការប្រកួតប្រដាល់ជាលក្ខណៈមិត្តភាពអន្តរជាតិនៅលើសង្វៀនទូរទស្សន៍ស៊ីធីអិន ថ្ងៃសៅរ៍ ទី២៣ ឧសភា ខាងមុខនេះ ពិតជាមិនធ្វើឱ្យអ្នកទស្សនាខកបំណងឡើយ
រាជធានីភ្នំពេញ ៖ ការប្រកួតប្រដាល់ជាលក្ខណៈមិត្តភាពអន្តរជាតិនៅលើសង្វៀនទូរទស្សន៍ស៊ីធីអិន ថ្ងៃសៅរ៍ ទី២៣ ឧសភា ខាងមុខនេះ ពិតជាមិនធ្វើឱ្យអ្នកទស្សនាខកបំណងឡើយ ដោយសារគណៈកម្មការរៀបចំការប្រកួតបានផ្គូផ្គងអ្នកប្រដាល់ជើងខ្លាំង២រូបត្រៀមស្វាគមន៍អ្នកប្រដាល់ជើងខ្លាំងមកពីថៃ ។
កីឡាករកម្ពុជា យ៉េន ឌីណា ត្រូវជួបប្រកួតជាមួយកីឡាករថៃ យ៉កភេត ស.ស្រុីវីឆា ក្នុងប្រភេទទម្ងន់៦០គីឡូក្រាម ។ ចំណែក សែន រ៉ាឌី ជួបប្រកួតជាមួយកីឡាករថៃ ដែនណង ភ្លួង ក្នុងប្រភេទទម្ងន់៦០គីឡូក្រាមដូចគ្នា ។ យ៉េន ឌីណា ធ្លាប់ប្រកួត៦០ដង ឈ្នះ៥៦ដង ចាញ់៣ដង ស្មើ១ដង និងធ្លាប់ផ្តួលគូប្រកួតឱ្យសន្លប់បានចំនួន៨ដង ។ ចំណែកកីឡាករថៃដែលជាគូប្រកួតធ្លាប់ប្រកួតបាន៦២ដង ឈ្នះ៤៨ដង ចាញ់១២ដង និងស្មើ២ដង ។
តាមការឱ្យដឹងពីអ្នករៀបចំកម្មវិធីប្រកួត កីឡាករថៃ យ៉កភេត ស.ស្រុីវីឆា មិនធ្លាប់មកប្រកួតនៅស្រុកខ្មែរម្តងណាឡើយ ។ បើទោះជាពួកគេទាំង២ មានប្រវត្តិប្រកួតនៅលើសង្វៀនប្រហាក់ប្រហែលគ្នាមែន បុ៉ន្តែនៅមិនទាន់ដឹងថា ខាងណាខ្លាំងជាងខាងណាឡើយ មានតែរង់ចាំអ៊ុតមើលការប្រកួតជាក់ស្តែងបុ៉ណ្ណោះ ទើបអាចដឹងបាន ។ សូម្បីតែ យ៉េន ឌីណា ខ្លួនឯង ក៏មិនទាន់ហ៊ានអះអាងទុកមុនថាយ៉ាងណានោះដែរ ។
ចំណែក សែន រ៉ាឌី ជួបកីឡាករថៃលើកនេះមិនដឹងថា ស៊ីផុយឬពិបាកទំពានោះទេ ដោយសារគូប្រកួតមួយនេះត្រូវគេដឹងថា ខ្លាំងមិនធម្មតាដែរនោះ ។
អ្នកប្រដាល់ថៃរូបនេះធ្លាប់មកប្រកួតនៅស្រុកខ្មែរម្តងរួចមកហើយ កាលពីបុ៉ន្មានខែមុននេះនៅលើសង្វៀនស៊ីធីអិន ខេត្តសៀមរាប ដោយយកឈ្នះពិន្ទុ សៀវ ងុ៉យ ទៀតផង។ កីឡាករថៃរូបនេះធ្លាប់ប្រកួតបាន៨១ដង ឈ្នះ៥១ដង ចាញ់២០ដង ស្មើ១០ដង និងធ្លាប់វាយគូប្រកួតឱ្យសន្លប់បានចំនួន១០ដង ។ រីឯ សែន រ៉ាឌី ធ្លាប់ប្រកួតបាន៦៤ដង ឈ្នះ៤៦ដង ចាញ់១៨ដង និងធ្លាប់ផ្តួលគូប្រកួតឱ្យសន្លប់បានចំនួន២៨ដង ។ ដូច្នេះគូនេះមិនអាចមើលស្រាលលើភាគីខាងណាបានទេ ។
ក្រៅពីគូអន្តរជាតិទាំង២គូនេះទៅ នៅលើសង្វៀនដដែលកីឡាករទូច វិរៈ មកពីក្លិបសាលវ័ន្តកីឡា ប្រកួតជាមួយកីឡាករម៉ន គឹមឡុង មកពីក្លិបការិយាល័យទី៥ កងទ័ពជើងគោក។ កីឡាករស្រិល ទ្រី មកពីក្លិបគជសារកីឡា ប្រកួតជាមួយកីឡាករព្រំ វី មកពីក្លិបខ្លារខិនមានរិទ្ធ និងកីឡាករផាន់ សារ៉ែម មកពីក្លិបគជសារកីឡា ប្រកួតជាមួយកីឡាករញ៉េ សិទ្ធ មកពីក្លិបអេភូថងកីឡា ៕
ចែករំលែកព័តមាននេះ