រាជធានីភ្នំពេញ ៖ ការប្រកួតប្រដាល់សន្សំពិន្ទុនៅក្នុងព្រឹតិ្តការណ៍ដណ្ដើមខ្សែក្រវាត់ក្រុមហ៊ុនភេសជ្ជៈខារ៉ាបាវនៅលើសង្វៀនទូរទស្សន៍បាយ័ន បានធ្វើឱ្យផ្ទុះកំហឹងកាន់តែរីករាលដាល បន្ទាប់ពីលទ្ធផលបញ្ចប់វគ្គសន្សំពិន្ទុបានបង្ហាញថា ឡុង សុភី ជាអ្នកបានឡើង ឯ វង្ស ណយ ជាអ្នកធ្លាក់ចេញ ។
ក្នុងពេលប្រកួតចប់ភ្លាមសម្រែករិះគន់ហាក់មិនសូវឮខ្លាំងក្លាប៉ុន្មានទេ ប៉ុន្តែក្នុងរង្វង់ពីរបីថ្ងៃចុងក្រោយនេះ សំឡេងហែកហួរហាក់បង្កើនកម្លាំងម៉ាស៊ីនធ្វើឱ្យព្រឹត្តិការណ៍ទាំងមូលស្រអាប់ដោយសារប្រឡូសប្រឡាក់នឹងសំឡេងរិះគន់ ។ យ៉ាងហោចជាងពាក់កណ្ដាលនៃអ្នកតាមដានការប្រកួតសន្សំពិន្ទុនៅក្នុងព្រឹត្តិការណ៍នេះ ដែលមានកីឡាករថៃ៤រូប និងកីឡាករកម្ពុជា៤រូបចូលរួម បានសម្ដែងទស្សនៈវាយប្រហារ និងមិនពេញចិត្តចំពោះលទ្ធផលដែលបានលេចឡើង។
ការប្រកួតទាំងមូលមានសភាពក្ដៅគគុកតាំងពីការប្រកួតជុំនៅមិនទាន់បញ្ចប់នោះម្ល៉េះ ប៉ុន្តែឈានដល់វគ្គចុងក្រោយកាលពីថ្ងៃទី១៧ ឧសភា កំហឹងធំមួយត្រូវបានផ្ទុះឡើង ។ យោងតាមលទ្ធផលក្នុងចំណោមកីឡាករកម្ពុជា និងថៃ៨រូបមានតែ៤រូបប៉ុណ្ណោះត្រូវបានឡើងទៅវគ្គបន្តដោយកីឡាករកម្ពុជាចំនួន២រូប និងកីឡាករថៃចំនួន២ ហើយមិនគិតពិន្ទុធៀបគ្នារវាងកីឡាករកម្ពុជា និងថៃនោះទេ ។ មានន័យថា ទោះជាកីឡាករថៃប្រកួតចាញ់កម្ពុជាម្នាក់ៗ ៤ប្រកួតដូចគ្នាក៏ដោយ ក៏នៅតែមានកីឡាករថៃ២រូបដែលមានលទ្ធផលល្អជាងបានឡើងទៅវគ្គពាក់កណ្ដាលផ្ដាច់ព្រ័ត្រដោយចៀសមិនរួច។ កីឡាករដែលមានសំណាងទាំង៤រូប គឺកីឡាករ កែវ រំចង់, ឡុង សុភី, កីឡាករថៃ Rareung Lukchampacha និង Tilek Pithak ។
មានការរិះគន់យ៉ាងខ្លាំងថា បើចង់យកកីឡាករថៃ២នាក់ឡើង និងកីឡាករកម្ពុជា២នាក់ឡើងដោយមិនរាប់ពិន្ទុខ្ពស់ទាបតាមលំដាប់ ហេតុអ្វីមិនឱ្យកីឡាករថៃឈរក្នុងពូលមួយក្រុម និងកីឡាករកម្ពុជាក្នុងពូលមួយក្រុមដើម្បីស្វែងរកអ្នកខ្លាំង២នាក់ក្នុងក្រុមនីមួយៗឱ្យឡើងប៉ះគ្នា ។ ហេតុអ្វីចាំបាច់តម្រូវឱ្យថៃ និងកម្ពុជាប្រកួតគ្នាចុះឡើងៗ ហើយបែរជាយកតែកម្ពុជា២រូបឱ្យឡើង បើទោះជាកីឡាករកម្ពុជា២រូបទៀតសុទ្ធតែមានពិន្ទុនាំមុខថៃដែលបានឡើង។ ទោះជាក្រុមអ្នករៀបចំការប្រកួតថា នោះជាលក្ខខណ្ឌដែលបានចែងនៅក្នុងការប្រកួត ក៏លទ្ធផលដែលបានកើតឡើងធ្វើឱ្យផ្ទុះកំហឹង និងចោទថា លក្ខខណ្ឌដែលបានប្រកាសឡើង គឺជារឿងមិនសមស្រប ។
មានការរិះគន់ជាច្រើនថា កម្មវិធីនេះហាក់មានបំណងរៀបចំឱ្យកីឡាករកែវ រំចង់ ធ្វើជាម្ចាស់ខ្សែក្រវាត់ហើយមើលទៅបន្ទាប់ពីគូប្រកួតដ៏ខ្លាំងក្លារបស់ កែវ រំចង់ ទាំង២គឺ វង្ស ណយ និង ម៉ឺន សុភា ត្រូវបានទម្លាក់ ។ ការធ្លាក់របស់ម៉ឺន សុភា ហាក់មិនធ្វើឲ្យមានរឿងរំជើបរំជួលនោះទេ ប៉ុន្តែសម្រាប់កីឡាករវង្ស ណយ ត្រូវគេឃើញផ្ទុះឡើងនូវការវិភាគដោយសំឡេងដៀលត្មះច្រើន ។ ក្រុមអ្នកលេងហ្វេសប៊ុកនិយាយថា ឆ្លងតាមការប្រកួតកីឡាករកែវ រំចង់ ត្រូវបានគេឱ្យឈ្នះពិន្ទុកីឡាករថៃជាប់រហូត បើទោះជាការប្រកួតខ្លះមើលទៅមិនសមនឹងឱ្យឈ្នះទាល់តែសោះ ។ ក្នុងនោះកីឡាករកែវ រំចង់ ក៏ជួបឱកាសទទួលបាន៣ពិន្ទុដោយស្វ័យប្រវត្តិក្នុងជុំទី៣ ដែលហាក់ដូចជាការរៀបចំឱ្យគេបានសន្សំកម្លាំងគ្រប់គ្រាន់ទៅប៉ះកីឡាករ Tilek Pithak ក្នុងជុំទី៤ ដើម្បីបានឈ្នះដូច្នេះដែរ ។
ទោះជាខាងមន្ត្រីទូរទស្សន៍បាយ័នប្រកាសថា កីឡាករ SINGHA THORNGNOY មានរបួសមិនអាចឡើងប្រកួតបាន ទើបតម្រូវឱ្យរំចង់បាន៣ពិន្ទុ ដោយមិនបាច់ប្រកួត ក៏ក្រុមអ្នកលេងហ្វេសប៊ុកបានលើកឡើងថា នោះជារឿងចៃដន្យដែលមិនខុសពីការរៀបចំបម្រុងទុក ។ ដោយឡែកសម្រាប់រវាងកីឡាករឡុង សុភី និងកីឡាករវង្ស ណយ វិញអ្នកណាក៏មើលឃើញដូចគ្នាថា កីឡាករវង្ស ណយ នឹងបានឡើងដោយមិនបាច់ប្រឹងដោយសារតែជុំទី៤ កីឡាករវង្ស ណយ ត្រូវប៉ះជាមួយកីឡាករថៃ ដែលមានពិន្ទុបាតតារាង ប៉ុន្តែ ឡុង សុភី ត្រូវប៉ះជាមួយ Rarueng Lukchampachai ដែលជាជើងខ្លាំងដាច់គេក្នុងចំណោមថៃទាំង៤ ដែលមានសំណាងឈ្នះទាំង ម៉ឺន សុភា និង វង្ស ណយ នោះ ។ អញ្ចឹងហើយទើបការប្រកួតកាលពីថ្ងៃអាទិត្យនោះបានផ្ទុះនូវការរិះគន់មួយឡើងដោយសារតែកីឡាករ Rareung ដែលធ្លាប់តែខ្លាំង ស្រាប់តែប្រកួតមិនអស់ដៃ មិនខុសពីការរៀបចំឱ្យ ឡុង សុភី បានឡើង ហើយទម្លាក់ វង្ស ណយ ។
អ្នកលេងហ្វេសប៊ុកដែលបង្ហាញទស្សនៈរិះគន់បានលើកឡើងថា យោងតាមសមត្ថភាព Rareung មិនអាចចាញ់ពិន្ទុ ឡុង សុភី នោះទេ ។ ប៉ុន្តែខ្លាច វង្ស ណយ មានពិន្ទុលេខ២ ក្នុងចំណោមក្រុមកម្ពុជា ហើយឡើងទៅប៉ះ កែវ រំចង់ ធ្វើឱ្យមានឧបសគ្គដល់កីឡាករតួឯកបាយ័នរូបនេះ ទើបលទ្ធផលបែបនេះលេចឡើង ។ យោងតាមលក្ខខណ្ឌនៃការប្រកួតសម្រាប់កីឡាករដែលមានពិន្ទុស្មើគ្នា កីឡាករដែលមានក្រេឌីតជាងនឹងបានបន្តទៅកាន់វគ្គជម្រុះ ខណៈដែល ឡុង សុភី និង វង្ស ណយ ចាញ់មួយប្រកួតដូចគ្នា ប៉ុន្តែ វង្ស ណយ ចាញ់ប្រៀបឡុង សុភី ត្រង់ចាញ់ Rareung ដោយលទ្ធផលសន្លប់ ។ យ៉ាងណាក៏ដោយ ជ័យជម្នះរបស់ ឡុង សុភី លើកីឡាករ Rareung ត្រូវគេមើលឃើញថា ជាការរៀបចំដោយច្បាស់នឹងភ្នែក ខណៈដែលកីឡាករថៃរូបនេះស្ទើរមិនចង់វ៉ៃតែម្ដង បើធៀបនឹងការប្រកួតជាមួយ វង្ស ណយ និង ម៉ឺន សុភា ។
បើទោះអ្នកខ្លះយល់ថា មកពី Rareung ដឹងថាខ្លួនបានឡើងដោយស្វ័យប្រវត្តិទើបមិនសូវខិតខំ ក៏លទ្ធផលនោះត្រូវគេប៉ាន់ស្មានថាការជារៀបចំទុកដែរ។ ក្នុងចំណោមកីឡាករកម្ពុជាទាំងអស់មានតែឡុង សុភី ម្នាក់ប៉ុណ្ណោះដែលភ្លាត់ចាញ់ពិន្ទុកីឡាករ Tilek Pithak ដែលកីឡាករកម្ពុជាទាំង៣ សុទ្ធតែបានយកឈ្នះ អញ្ចឹងហើយទើបការប្រកួតក្នុងជុំទី៤ មិនមានមនុស្សច្រើនឡើយជឿថា ឡុង សុភី យកឈ្នះជើងខ្លាំង Rareung ហើយជាន់ពន្លិចពិន្ទុកីឡាករវង្ស ណយ ។ អ្នកប្រើបណ្ដាញហ្វេសប៊ុកបន្តរិះគន់ថា ខ្សែក្រវាត់ជើងឯក និងទឹកប្រាក់៥.០០០ដុល្លារពីព្រឹត្តិការណ៍នេះនៅមិនឆ្ងាយពី កែវ រំចង់ នោះទេ ដោយសារតែលទ្ធផលដែលត្រូវគេអះអាងថា មានការរៀបចំទុក គឺ កែវ រំចង់ មានសមត្ថភាពនាំមុខគេ បន្ទាប់ពីទម្លាក់កីឡាករវង្ស ណយ និងម៉ឺន សុភា ជ្រុះបាត់ ។ អ្នកប្រើបណ្ដាញហ្វេសប៊ុកបានទាំងចោទថា នោះជាការរៀបចំទុកដើម្បីឱ្យកីឡាករកែវ រំចង់ ជាតួឯកតែម្នាក់របស់បាយ័នបានល្បីនោះផង ។
ទោះជាមានការប្រកាសពីលក្ខខណ្ឌជាមុនក៏ក្រុមអ្នករិះគន់នៅតែចោទសួរថា ហេតុអ្វីអ្នករៀបចំការប្រកួតមិនឲ្យថៃ និងកម្ពុជាឈរពូលផ្សេងគ្នា ហើយប្រកួតជម្រុះយក២នាក់ម្ខាងឡើង ? ការរិះគន់កំពុងផុសផុលពេញក្នុងសង្គមហ្វេសប៊ុកបន្ទាប់ពីកីឡាករថៃដែលបានឡើងបន្ត គឺម្នាក់បានឈ្នះតែ២ប្រកួត និងម្នាក់ទៀតបានឈ្នះតែមួយប្រកួតដែលមានន័យថា សុទ្ធតែចាញ់ពិន្ទុកីឡាករកម្ពុជា ។ ការរិះគន់កាន់តែឮខ្លាំងក្រោយពីកីឡាករវង្ស ណយ ដែលអ្នកណាក៏មើលឃើញថា គួរតែបានឡើងទៅជួបកែវ រំចង់ ត្រូវជំនួសដោយ ឡុង សុភី ។ ម្នាក់ៗនៅតែថា Rareung ធ្វើចាញ់ ឡុង សុភី ជាការរៀបចំ ។ ប៉ុន្តែក៏មានអ្នកគាំទ្រថា ឡុង សុភី បានឈ្នះជើងខ្លាំងរូបនេះដោយសារតែវាយបានល្អជាងផងដែរ ។
ពាក់ព័ន្ធនឹងបញ្ហានេះ កោះសន្ដិភាពមិនទាន់ទទួលបានការឆ្លើយបំភ្លឺពីលោកនាង ស៊ីវត្ថា ដែលជាអ្នករៀបចំការប្រកួតប្រចាំស្ថានីយទូរទស្សន៍បាយ័ននៅឡើយទេ ។ ប៉ុន្តែយោងតាមការស្ទាបស្ទង់ បើខ្សែក្រវាត់ជើងឯកជារបស់ កែវ រំចង់ មែននោះ ការរិះគន់ពិតជាមានប្រសិទ្ធភាព ។ ជាពិសេសនៅពេលដែលគេមើលឃើញថា ឱ្យតែការប្រយុទ្ធមានស្ថានភាពប្រដំប្រសងគ្នា ឬចាញ់គូប្រកួតតិចតួច កែវ រំចង់ នៅតែត្រូវគេឱ្យឈ្នះពិន្ទុ ៕
ចែករំលែកព័តមាននេះ