រាជធានីភ្នំពេញ ៖ អគ្គនាយកដ្ឋានពន្ធដារ នៃក្រសួងសេដ្ឋកិច្ច និងហិរញ្ញវត្ថុឱ្យដឹងថា នៅ ក្នុងខែមេសា ឆ្នាំ២០១៥ អគ្គនាយកដ្ឋានប្រមូល និងបង់ពន្ធចូលថវិកាជាតិ បានចំនួន៨១៧.០០១លានរៀល ប្រមាណជា២០៤,២៥លានដុល្លារអាមេរិក
រាជធានីភ្នំពេញ ៖ អគ្គនាយកដ្ឋានពន្ធដារ នៃក្រសួងសេដ្ឋកិច្ច និងហិរញ្ញវត្ថុឱ្យដឹងថា នៅ ក្នុងខែមេសា ឆ្នាំ២០១៥ អគ្គនាយកដ្ឋានប្រមូល និងបង់ពន្ធចូលថវិកាជាតិ បានចំនួន៨១៧.០០១លានរៀល ប្រមាណជា២០៤,២៥លានដុល្លារអាមេរិក បើប្រៀបធៀបទៅនឹងខែមេសាឆ្នាំ២០១៤ គឺមានការកើនឡើងស្មើនឹង៤០,៩១%។
យោងតាមសេចក្តីប្រកាសព័ត៌មាននៃកិច្ចប្រជុំបូកសរុបលទ្ធផលប្រមូលចំណូលពន្ធប្រចាំខែមេសា ឆ្នាំ២០១៥ ឱ្យដឹងថា កិច្ចប្រជុំដែលប្រព្រឹត្តទៅនៅអគ្គនាយកដ្ឋានពន្ធដារ នៅព្រឹកថ្ងៃទី១៨ ខែឧសភា ឆ្នាំ២០១៥ ក្រោមអធិបតីភាពលោក គង់ វិបុល ប្រតិភូរាជរដ្ឋាភិបាលទទួលបន្ទុកជាអគ្គនាយកនៃអគ្គនាយក ដ្ឋានពន្ធដារ បានឱ្យដឹងថា នៅក្នុងរយៈពេល៤ខែឆ្នាំ២០១៥ ចំណូលពន្ធ-អាករសរុបមានចំនួនស្មើនឹង៤៥,៥១% នៃគោលដៅកំណត់ក្នុងច្បាប់ហិរញ្ញវត្ថុសម្រាប់ការគ្រប់គ្រងឆ្នាំ២០១៥ ក្នុងនោះមានថវិកាជាតិប្រមូលបានស្មើនឹង ៤៧,២១% និងថវិកាថ្នាក់ក្រោមជាតិប្រមូលបានស្មើនឹង៣៤,៦២% ។
នៅក្នុងរយៈពេលដូចគ្នាឆ្នាំ២០១៤ និងឆ្នាំ២០១៥ ឃើញថា មានការកើនឡើងនូវចំណូលពន្ធតាមប្រភេទពន្ធសំខាន់ៗមួយចំនួនដូចជា ពន្ធលើប្រាក់ចំណេញមានការកើនឡើងប្រមាណ៥០,៤% ពន្ធលើប្រាក់បៀវត្សរ៍មានការកើនឡើងប្រមាណ៣១,៦% អាករលើតម្លៃបន្ថែមមានការកើនឡើងប្រមាណ៣៩,៧% និងអាករពិសេសមានការកើនឡើងប្រមាណ៣០,៨% ។
បើប្រៀបធៀបទៅនឹងរយៈពេលដូចគ្នាឆ្នាំ២០១៤ និងឆ្នាំ២០១៥ ចំណូលពន្ធតាមសកម្មភាពអាជីវកម្មមានការកើនឡើងស្ទើរតែទាំងអស់ ក្នុងនោះរួមមាន ផ្នែកផលិតភេសជ្ជៈកើនឡើងប្រមាណ២២,៩% ផ្នែកសេវាហិរញ្ញវត្ថុកើនឡើងប្រមាណ៣៩,០% ផ្នែកទូរគមនាគមន៍កើនឡើងប្រមាណ២៣,៣% ផ្នែកនីហរ័ណ អាហរ័ណកើនឡើងប្រមាណ១៧,១% ផ្នែកផលិតគ្រឿងប្រើប្រាស់កើនឡើងប្រមាណ៣,៩% ផ្នែកសណ្ឋាគារ និងផ្ទះសំណាក់កើនឡើងប្រមាណ១១,៥% ផ្នែកផលិតថ្នាំជក់កើនឡើងប្រមាណ៩៥,៤% ផ្នែកដឹកជញ្ជូន និងទេសចរណ៍កើនឡើងប្រមាណ៧,២% ផ្នែកអាកាសយានដ្ឋាន និងកំពង់ផែកើនឡើងប្រមាណ១១,៧% ,៧% ផ្នែកលក់ភេសជ្ជៈកើនឡើងប្រមាណ៥២,២% ផ្នែកផលិតយានយន្តកើនឡើងប្រមាណ១៨១,៥% ផ្នែកផលិតម្ហូបអាហារកើនឡើងប្រមាណ២៦,០% និងផ្នែកផលិតគ្រឿងចក្រកើនឡើងប្រមាណ៥៩,៧% ។
សេចក្តីប្រកាសព័ត៌មានបានឱ្យដឹងទៀតថា នៅក្នុងកិច្ចប្រជុំនោះ លោក គង់ វិបុល ស្នើឱ្យមានការផ្តោតលើចំណុចសំខាន់ៗមួយចំនួន រួមមាន ពិនិត្យនិងពិភាក្សាលើរបាយការណ៍លទ្ធផលប្រមូលចំណូលពន្ធប្រចាំខែមេសា ឆ្នាំ២០១៥ របស់អង្គភាពនីមួយៗ ។ វឌ្ឍនភាពនៃការចាត់បញ្ចូលអាជីវកម្មដ្ឋានជាប់ពន្ធតាម របបម៉ៅការទៅរបបស្វ័យប្រកាស ។ ពិភាក្សាលើលិខិតប្រកាសពន្ធ ការធ្វើសវនកម្មពន្ធ និងការគ្រប់គ្រងបំណុលពន្ធ ។ ពិភាក្សាអំពីយន្តការនៃការបង្វិលសង ។ ការត្រួតពិនិត្យការប្រមូលពន្ធលើមធ្យោបាយដឹកជញ្ជូន និងយានជំនិះគ្រប់ប្រភេទសម្រាប់ឆ្នាំ២០១៤ និងពន្ធលើអចលនទ្រព្យឆ្នាំ២០១៥ ។ ការចុះបញ្ជីសហគ្រាសតាមប្រព័ន្ធថ្មី និងការធ្វើបច្ចុប្បន្នភាពសហគ្រាស។ វឌ្ឍនភាពការងារកែទម្រង់ការគ្រប់គ្រងហិរញ្ញវត្ថុសាធារណៈ និងត្រួតពិនិត្យការអនុវត្តយុទ្ធសាស្ត្រ កៀរគរចំណូលរយៈពេលមធ្យមរបស់អគ្គនាយកដ្ឋានពន្ធដារឆ្នាំ២០១៤-២០១៨ ។
លោកអគ្គនាយក បានសម្តែងនូវការអបអរសាទរជាមួយថ្នាក់ដឹកនាំ និងមន្ត្រីរាជការពន្ធដារគ្រប់ជាន់ថ្នាក់ ចំពោះលទ្ធផលការងារប្រមូលចំណូលពន្ធដារ ដែលសម្រេចបានប្រចាំខែមេសា ឆ្នាំ២០១៥ និងបានជំរុញលើកទឹកចិត្តឱ្យបន្ត ខិតខំជម្នះការលំបាក និងបញ្ហាប្រឈមនានា ក្នុងការអនុវត្តភារកិច្ចប្រមូលចំណូលពន្ធគ្រប់ប្រភេទឱ្យបានសម្រេចតាមគោលដៅកំណត់ក្នុងច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ២០១៥ តាមរយៈការបង្កើនការផ្តល់សេវាដល់អ្នកជាប់ពន្ធឱ្យបានប្រសើរ ងាយស្រួល ឆាប់រហ័សនៅគ្រប់ទីកន្លែង និងអនុវត្តន៍វិធានការនានាសំដៅធ្វើឱ្យបានសម្រេចគោលដៅចំណូលឆ្នាំ២០១៥ ៕
ចែករំលែកព័តមាននេះ