រាជធានីភ្នំពេញ ៖ បច្ចុប្បន្ននេះ គ្រឿងស្រវឹងបានក្លាយជារបស់ដែលពេញនិយមទៅហើយសម្រាប់មនុស្សទូទៅ នៅពេលមានកម្មវិធីជួបគ្នា ឬបែកគ្នា សម្រាប់កំដរការជជែកពិភាក្សា។ ចំពោះកម្ពុជា
រាជធានីភ្នំពេញ ៖ បច្ចុប្បន្ននេះ គ្រឿងស្រវឹងបានក្លាយជារបស់ដែលពេញនិយមទៅហើយសម្រាប់មនុស្សទូទៅ នៅពេលមានកម្មវិធីជួបគ្នា ឬបែកគ្នា សម្រាប់កំដរការជជែកពិភាក្សា។ ចំពោះកម្ពុជា អ្នកប្រើប្រាស់គ្រឿងស្រវឹងបានកើនឡើងជាបន្តបន្ទាប់ មិនថានៅតាមទីជនបទ ឬទីក្រុងនោះទេ រាល់ពេលមានកម្មវិធីម្ដងៗពួកគេតែងតែមិនភ្លេចទេគឺគ្រឿងស្រវឹង។ បើនៅជនបទដាច់ស្រយាល យ៉ាងហោចណាស់ក៏មានស្រា.ស ឬស្រាថ្នាំសម្រាប់ញ៉ាំងឲ្យកម្មវិធីមានភាពអធិកអធមដែរ ។ តែបើនៅទីក្រុងវិញ ចំពោះអ្នកមានជីវភាពធម្យម យ៉ាងហោចក៏មានស្រាបៀរដែរ តែចំពោះអ្នកមានជីវភាពធូរធារ គេនឹងទទួលភ្ញៀវនូវគ្រឿងស្រវឹងណាដែលមានតម្លៃខ្ពស់រហូតដល់រាប់រយរាប់ពាន់ដុល្លារក៏មានដែរ ។ ទន្ទឹមនឹងនោះ ការសេពគ្រឿងស្រវឹងហួសប្រមាណ ក៏ជាកង្វល់មួយរបស់រាជរដ្ឋាភិបាលផងដែរ ដោយសារតែបង្កគ្រោះថ្នាក់ចរាចរណ៍ នៅពេលអ្នកសេពគ្រឿងស្រវឹងបញ្ជាយានយន្តរបស់ខ្លួន ។
ចំពោះគ្រឿងស្រវឹងនេះបើនិយាយពីពិធីជប់លៀងផ្សេងៗ រាប់ទាំងពិធីមង្គលការផងឃើញថាម្ចាស់កម្មវិធីបានចំណាយទៅលើគ្រឿងស្រវឹងនេះច្រើនគួរសមដែរ ដែលគិតជាមធ្យមប្រមាណពី២០ទៅ៥០%នៃការចំណាយទៅលើអាហារនៅលើតុ ទៅតាមកម្រិតជីវភាពរបស់ម្ចាស់កម្មវិធី ។ សម្រាប់កម្មវិធីនៅតាមជនបទស្រុកស្រែចម្ការ ការចំណាយលើគ្រឿងស្រវឹងសម្រាប់ភ្ញៀវឧទាហរណ៍ថាបើ៥០តុ ម្ចាស់កម្មវិធីត្រូវចំណាយលើគ្រឿងស្រវឹងប្រមាណពី៥០ទៅ១០០កេស បើគិតជាទឹកប្រាក់ អស់ប្រមាណពី៥០០ទៅ១.០០០ដុល្លារ ។ នេះគ្រាន់តែជាស្រាបៀរតម្លៃធម្មតាប៉ុណ្ណោះ តែបើយកស្រាបៀរដែលមានតម្លៃថ្លៃអាចអស់ចន្លោះពី ៧០០ទៅ១.៥០០ដុល្លារអាមេរិក ។
លោក ជា ដែលទើបតែរៀបមង្គលការប្អូនស្រីរួច បាននិយាយថា មង្គលការប្អូនស្រីរបស់លោកបានអញ្ជើញភ្ញៀវចំនួន៥០តុ សរុប៥០០នាក់ ដោយបានទិញស្រាបៀរចំនួន៩០កេស ក្នុង១កេសតម្លៃ១១ដុល្លារ សរុបជាទឹកប្រាក់ជិត១ពាន់ដុល្លារ ។ លោកថា ចំពោះភ្ញៀវដែលអញ្ជើញមក អ្វីដែលម្ចាស់ដើមការមើលថែបំផុតនោះ គឺស្រាបៀរ បើជិតអស់គឺត្រូវថែមជូនពួកគាត់ តែបើម្ហូបវិញ យើងមិនសូវខ្វល់ទេ សំខាន់ឲ្យតែបានដាក់គ្រប់តុ គឺបានហើយ ។
លោករឹទ្ធិ ទើបតែរៀបមង្គលការហើយថ្មោងថ្មីក៏បានបញ្ជាក់ដែរថា ក្នុងពិធីមង្គលការរបស់លោក បានទិញស្រាបៀរប្រមាណ១០០កេស សម្រាប់ភ្ញៀវ៨០តុ ក្នុងនោះភ្ញៀវខាងលោកដែលជាមិត្តភក្តិជិតស្និទ្ធចំនួន១៥តុ ត្រូវចំណាយស្រាបៀរអស់២០កេស ដែរ ។
មានការកត់សម្គាល់ថា នៅរាល់ពេលមានបុណ្យជាតិធំៗម្ដងៗ ជាពិសេសបុណ្យចូលឆ្នាំខ្មែរ និងបុណ្យភ្ជុំបិណ្ឌ ប្រជាពលរដ្ឋគ្រប់រូបបានឈប់សម្រាកពីការងារ និងត្រឡប់ទៅស្រុកកំណើតជួបជុំបងប្អូនដែលបែកគ្នាអស់ពេលច្រើនខែ ឬ ទៅកម្សាន្តនៅតំបន់រមណីយដ្ឋាននានា ។ ជាមួយគ្នានេះគេតែងសង្កេតឃើញ ភាគច្រើន ឬស្ទើរតែទាំងអស់ តែងយកគ្រឿងស្រវឹងដើម្បីបង្កបរិយាកាសឲ្យកាន់តែអ៊ូអរ និងសប្បាយរីករាយ។ ទោះជាយ៉ាងណា បន្ទាប់ពីពិធីបុណ្យធំៗនេះចប់ បណ្ដាញសារព័ត៌មានក្នុងស្រុកជាច្រើន ក៏បានចុះផ្សាយផងដែរ អំពីករណីគ្រោះថ្នាក់ចរាចរណ៍ អ្នកស្លាប់ និងរបួសក្នុងអំឡុងពេលឈប់សម្រាកនោះ ហើយមួយចំនួនធំនៃករណីគ្រោះថ្នាក់ គឺបណ្ដាលមកពីពិសាគ្រឿងស្រវឹងហើយបើកបរ ដូចជាម៉ូតូ និងរថយន្តជាដើម ។
ដើម្បីជាការដាស់តឿនដល់អ្នកពិសាគ្រឿងស្រវឹងទាំងអស់ ម្ចាស់ក្រុមហ៊ុនផលិតគ្រឿងស្រវឹង ឬក្រុមហ៊ុននាំចូលគ្រឿងស្រវឹងតែងដាក់ពាក្យស្លោកមួយនៅខាងក្រោមផ្ទាំងផ្សព្វផ្សាយ ឬចុងបញ្ចប់នៃស្ពតផ្សព្វផ្សាយតាមវិទ្យុ ឬទូរទស្សន៍ ថា «បើពិសាគ្រឿងស្រវឹង សូមកុំបើកបរ» ឬ«ពិសាដោយការទទួលខុសត្រូវ» ដើម្បីឲ្យអ្នកទទួលទាន ដឹងពីកម្រិតប៉ុនណាដែលខ្លួនអាចទទួលយកបាន ៕
ចែករំលែកព័តមាននេះ