រាជធានីភ្នំពេញ ៖ លោក ឌី សីវយុត្តិ ប្រធានផ្នែកទីផ្សារក្រុមហ៊ុនលក់បន្លែសរីរាង្គក្រុមហ៊ុន National Garden បានឲ្យដឹងថា បើតាមការកត់សម្គាល់ពីតម្រូវការបន្លែសរីរាង្គ យើងឃើញថា
រាជធានីភ្នំពេញ ៖ លោក ឌី សីវយុត្តិ ប្រធានផ្នែកទីផ្សារក្រុមហ៊ុនលក់បន្លែសរីរាង្គក្រុមហ៊ុន National Garden បានឲ្យដឹងថា បើតាមការកត់សម្គាល់ពីតម្រូវការបន្លែសរីរាង្គ យើងឃើញថាជនបរទេសជាច្រើនមកទិញពីកន្លែងយើង ប៉ុន្តែក្នុងបរិមាណតិចតួចប៉ុណ្ណោះ ខុសពីខ្មែរយើងមានតម្រូវការច្រើននៅពេលពួកគាត់ចូលមកទិញម្តងៗ។ ក្នុងនោះបន្លែ១០ប្រភេទកំពុងតែមានការគាំទ្រនិងមានតម្រូវការច្រើនដូចជា ត្រសក់ សណ្តែកកួរ សណ្តែកបារាំង ត្រប់ ឆៃថាវ ម្រះ ស្ពៃខ្មៅ ស្ពៃក្រញាញ់ ស្ពៃតឿ និងត្រកួន ហើយក្រៅពីនេះ មានបន្លែសាលាដ និងគ្រឿងទេសជាច្រើនទៀត ។
លោកបន្តថា បន្លែសរីរាង្គនេះទោះបីមានតម្លៃថ្លៃជាងបន្លែតាមផ្សារបន្ដិចក្តី តែអតិថិជនដែលយល់ដឹងពីសុខភាព អត្ថប្រយោជន៍ និងផលលំបាករបស់ផលិតករនៅលើផ្នែកនេះ គឺពួកគាត់អាចទទួលយកបានមិនរអ៊ូរទាំនឹងតម្លៃលើសបន្តិចបន្ទួចនេះឡើយ ។ ដោយឡែកអតិថិជនថ្មីដែលទើបតែងាកមកបរិភាគបន្លែសរីរាង្គ ឬទើបតែចាប់ផ្តើមព្រួយបារម្ភពីសុខភាពរបស់ពួកគាត់ ឃើញថាមានបញ្ហាខាងតម្លៃខ្លះដែរ ។ លោកបន្ថែមថា កន្លងមកក្រុមហ៊ុនNational Garden បានបង្កើតផ្សារលក់បន្លែសរីរាង្គរបស់ខ្លួនចំនួន២កន្លែងស្ថិតនៅរាជធានីភ្នំពេញ ហើយកសិផលដែលយកមកផ្គត់ផ្គង់លើទីផ្សារទាំងនេះមួយភាគធំប្រមូលមកពីចម្ការចំនួន៣កន្លែងរបស់ក្រុមហ៊ុនដាំនៅតាមបណ្តាខេត្ត និងមួយចំនួនទៀតប្រមូលពីកសិកដែលជាដៃគូរបស់យើង ។ បើតាមតម្រូវការនិងកំណើនសព្វថ្ងៃ នៅឆ្នាំនេះក្រុមហ៊ុននឹងបង្កើតផ្សារឲ្យបាន២កន្លែងបន្ថែមទៀតដើម្បីឆ្លើយតបដល់ការគាំទ្រនិងជឿជាក់ពីគុណប្រយោជន៍នៃបន្លែរបស់ក្រុមហ៊ុន ។
លោកទេព រដ្ឋា ប្រធានគ្រប់គ្រងសហគមន៍ផ្គត់ផ្គង់កសិផលស្វាយរៀង បានឲ្យដឹងដែរថា បច្ចុប្បន្នពលរដ្ឋដែលកំពុងរស់នៅក្នុងតំបន់យើងនេះមានការយល់ដឹងពីការដាំដុះ ការបរិភោគបន្លែសរីរាង្គមានចំនួនច្រើន ដោយពួកគាត់យល់ឃើញថា មានជំងឺជាច្រើន និងប្លែកៗកំពុងកើតមាន ដោយសារតែផលប៉ះពាល់នៃការបរិភោគបន្លែផ្លែឈើដែលនាំចូលពុំមានប្រភពច្បាស់លាស់ ។
លោកបន្តថា សព្វថ្ងៃនេះសហគមន៍យើងមានសមាជិកប្រហែល៣០០នាក់បានដាំបន្លែប្រមាណ៣០ប្រភេទ ហើយកសិផលដែលទទួលបានយើងផ្គត់ផ្គង់នៅរាជធានី ពី៤ទៅ៥ដងក្នុងមួយសប្តាហ៍ ចាប់ពី៦០០ទៅ១.០០០គីឡូក្រាម ។ ទន្ទឹមនឹងនេះ ក៏បានផ្គត់ផ្គង់ទៅឲ្យកាស៊ីណូនៅបាវិតម្តងៗប្រមាណជា៤០%នៃចំនួនសរុប និងមានតម្លៃចាប់ពី១.០០០រៀលរហូតដល់៧.០០០រៀលក្នុងមួយគីឡូក្រាម ។
លោកបន្ថែមថា តាមទស្សនៈវិស័យរបស់សហគមន៍យើងមានគម្រោងពង្រីកទាំងសមាជិកដាំដុះទៅតាមគោលដៅ និងផ្សព្វផ្សាយស្វែងរកអតិថិជនទិញកសិផលរបស់ពួកគាត់ ដើម្បីលើកទឹកចិត្តដល់ពួកគាត់ ក៏ដូចជាជួយផ្ដល់ការងារធ្វើ ចៀសវាងការធ្វើចំណាកស្រុកជាដើម ៕
ចែករំលែកព័តមាននេះ