ខេត្តកំពង់ឆ្នាំង ៖ រថយន្តដឹកទ្រុងមាន់ធុនធំមួយគ្រឿងបានក្រឡាប់បះជើង ខណៈដែលបើកលឿនដល់ចំណុចផ្លូវកោង ហើយជាន់ហ្វ្រាំងទាំងបង្ខំ ដែលហេតុការណ៍នេះកើតឡើងកាលពីវេលាម៉ោង៤ និង២០នាទីរសៀលថ្ងៃទី០៦ ឧសភា ២០១៥ ស្ថិតនៅលើកំណាត់ផ្លូវជាតិលេខ៥ ត្រង់ចំណុចភូមិអូររូង ឃុំឈូកស ស្រុកកំពង់ត្រឡាច ។
ប្រភពបានឱ្យដឹងថា រថយន្តធុនធំខាងលើម៉ាកហ៊ីយ៉ាន់ដាយ ពណ៌.ស ពាក់ស្លាកលេខភ្នំពេញ 2J. 4990 បើកបរដោយជនពុំស្គាល់ឈ្មោះ ។
ប្រភពបន្តថា មុនពេលកើតហេតុ រថយន្តខាងលើបានធ្វើដំណើរពីខេត្តកំពង់ឆ្នាំងទៅរាជធានីភ្នំពេញ ដោយមានដឹកទ្រុងមាន់ពេញរថយន្ត និងមានមនុស្សជិះគ្នា៣នាក់ ក្នុងនោះ២នាក់ជិះក្នុងកាប៊ីន និងម្នាក់ទៀត ជិះខាងក្រោយលើទ្រង់មាន់ លុះមកដល់ចំណុចកើតហេតុជាផ្លូវកោង ដោយសាររថយន្តមានល្បឿនលឿនពេកបត់មិនរួច អ្នកបើកបរបានជាន់ហ្វ្រាំងបង្ខំ បណ្តាលឱ្យរថយន្តក្រឡាប់លើថ្នល់ជាតិតែម្តង។
ក្រោយពេលកើតហេតុ គេឃើញអ្នកជិះក្នុងកាប៊ីនរថយន្ត២នាក់ មិនមានរងរបួសនោះទេ ខណៈជិះលើទ្រុងមាន់ខាងក្រោយ
ដែលមានឈ្មោះជា មានទីលំនៅភូមិស្រែតាជ័យ ឃុំអភិវឌ្ឍន៍ ស្រុកទឹកផុស បានរងរបួសធ្ងន់ធ្ងរ ហើយប្រញាប់ដឹកទៅសង្គ្រោះនៅមន្ទីរពេទ្យកាល់ម៉ែត្រ រាជធានីភ្នំពេញ ។
ប្រភពដដែលបន្តថា អ្នកជិះក្នុងរថយន្តទាំង២នាក់ មិនព្រមប្រាប់ពីអត្តសញ្ញាណនោះទេ តែបានដឹងថា ទាំង២នាក់មានម្នាក់ជាអ្នកបើកបរបានប្រញាប់ដឹកជនរងគ្រោះទៅសង្គ្រោះនៅមន្ទីរពេទ្យរាជធានីភ្នំពេញ ចំណែករថយន្តត្រូវសមត្ថកិច្ចស្ទូចយកមករក្សាទុកនៅអធិការដ្ឋាននគរបាលស្រុកកំពង់ត្រឡាច ដើម្បីរង់ចាំការដោះស្រាយតាមនីតិវិធីច្បាប់ ៕
ចែករំលែកព័តមាននេះ