ខេត្តរតនគិរី ៖ កម្លាំងនគរបាលប្រឆាំងបទល្មើសសេដ្ឋកិច្ចនៃស្នងការនគរបាលខេត្ត កាលពីវេលាម៉ោង៩ និង៣០នាទីយប់ ថ្ងៃទី០៥ ឧសភា បានចាប់គោយន្តមួយគ្រឿងផ្ទុកឈើប្រភេទលេខ១ពេញ
ខេត្តរតនគិរី ៖ កម្លាំងនគរបាលប្រឆាំងបទល្មើសសេដ្ឋកិច្ចនៃស្នងការនគរបាលខេត្ត កាលពីវេលាម៉ោង៩ និង៣០នាទីយប់ ថ្ងៃទី០៥ ឧសភា បានចាប់គោយន្តមួយគ្រឿងផ្ទុកឈើប្រភេទលេខ១ពេញ ត្រង់ចំណុចចំការស្វាយចន្ទី ស្ថិតក្នុងភូមិពែង ឃុំញ៉ាង ស្រុកអណ្តូងមាស ខណៈពេលដែលគោយន្តខាងលើនេះបម្រុងដឹកឈើលោតឆត្រឆ្ពោះទៅវៀតណាម។
បើតាមលោកវរសេនីយ៍ឯក នូវ ដារ៉ា នាយការិយាល័យប្រឆាំងបទល្មើសសេដ្ឋកិច្ចនៃស្នងការនគរបាលខេត្តប្រាប់ឲ្យដឹងថា បន្ទាប់ពីទទួលព័ត៌មានពីប្រជាពលរដ្ឋថា មានក្រុមឈ្មួញដឹកឈើខុសច្បាប់ទៅលក់នៅប្រទេសវៀតណាម រូបលោកសុំយោបល់ថ្នាក់លើ រួចបញ្ជូនកម្លាំងចុះទៅគោលដៅដើម្បីស្ទាក់ចាប់គោយន្តខាងលើ។
មន្ត្រីនគរបាលជំនាញដែលចុះប្រតិបត្តិការប្រាប់ឲ្យដឹងថា ពេលដែលកម្លាំងចុះដល់គោលដៅក្រុមឈ្មួញហាក់បីដូចជាដឹងព័ត៌មាន ហើយបានបង្វែរគោយន្តដឹកឈើខាងលើទៅលាក់ក្នុងចំការស្វាយចន្ទី។ ប៉ុន្តែកម្លាំងដែលចុះប្រតិបត្តិការបានធ្វើការរុករកក៏បានប្រទះឃើញគោយន្តដឹកឈើប្រភេទលេខ១ចតក្នុងចំការស្វាយចន្ទី ដោយយប់ងងឹតពិបាកក្នុងការនាំគោយន្តនោះមកស្នងការដ្ឋាននគរបាលខេត្ត ត្រូវរង់ចាំភ្លឺឡើង។
រហូតដល់ព្រឹកថ្ងៃទី០៦ ឧសភា ទើបកម្លាំងប្រតិបត្តិការបាននាំវត្ថុតាងមកស្នងការដ្ឋាននគរបាលខេត្ត។ លុះដល់រសៀលថ្ងៃទី០៦ ឧសភា មន្ត្រីនគរបាលជំនាញបានប្រគល់វត្ថុតាងគោយន្តផ្ទុកឈើលេខ១ជូនរដ្ឋបាលព្រៃឈើដើម្បីចាត់ការបន្ត។ ដោយឡែកអ្នកបើកគោយន្តផ្ទុកបទល្មើសបម្រុងលោតឆត្រទៅវៀតណាមរត់គេចខ្លួនបាត់។
ប្រភពព័ត៌មានដោយឡែកមួយទៀតបានឲ្យដឹងថា ប្រភពឈើនេះត្រូវបានក្រុមឈ្មួញដឹកចេញពីដីសម្បទានសេដ្ឋកិច្ចក្រុមហ៊ុនហ័ង អាញ់ អណ្តូងមាស៕
ចែករំលែកព័តមាននេះ