ខេត្តស្វាយរៀង ៖ បុរសវ័យ៥០ឆ្នាំម្នាក់មានជំងឺក្រពះបានយកថ្នាំជ្រលក់មុងផឹកច្រឡំស្មានថាជាថ្នាំក្រពះបណ្តាលឲ្យពុល និងឈឺចុកចាប់ក្នុងក្រពះកាន់តែខ្លាំងត្រូវកូនៗនាំមកកាន់មន្ទីរពេទ្យខេត្តដើម្បីសង្គ្រោះ។
ករណីនេះកើតឡើងកាលពីរវេលាម៉ោង៩ព្រឹក ថ្ងៃទី៦ ឧសភា ២០១៥ នៅភូមិត្រាច ឃុំដូនសរ ស្រុកស្វាយជ្រំ។ ជនរងគ្រោះឈ្មោះសួស សុភី ភេទប្រុស អាយុ៥០ឆ្នាំ មុខរបរធ្វើស្រែ មានទីលំនៅក្នុងភូមិ-ឃុំកើតហេតុខាងលើ ហើយបើតាមកូនៗបានប្រាប់ឲ្យដឹងថា ជនរងគ្រោះមានជម្ងឺក្តៅខ្លួន និងចុកក្រពះក៏រកថ្នាំពេទ្យដែលស្ត្រីជាប្រពន្ធទិញទុកក្នុងកន្ត្រកសម្រាប់ផឹកពេលមានសមាជិកគ្រួសារមានជម្ងឺគ្រុនក្តៅ ឬផ្តាសាយ ហើយមិនដឹងថានរណាយកថ្នាំជ្រលក់មុងទៅដាក់ក្នុងកន្ត្រកថ្នាំ ពេលជនរងគ្រោះជាឪពុកឈឺក្រពះ និងក្តៅខ្លួនក៏ទៅរើយកថ្នាំមកផឹកខ្លួនឯង ច្រឡំថ្នាំជ្រលក់មុងស្មានថាថ្នាំក្រពះ ឬថ្នាំពោះវៀនក៏យកមកផឹកបានតែប្រាំនាទីស្រាប់តែពុលវិលមុខ និងចុកផ្សារក្នុងពោះកាន់តែខ្លាំង។
ពេលកូនៗសួររកសំបកថ្នាំទើបដឹងថា យកថ្នាំជ្រលក់មុងផឹកក៏ប្រញាប់ប្រញាល់ហៅរថយន្តដឹកមកមន្ទីរពេទ្យខេត្តដើម្បីសង្គ្រោះ គ្រូពេទ្យក៏លាងក្រពះ និងចាក់បន្សាបបានទាន់ពេល បើយឺតបន្តិចថ្នាំជ្រលក់មុងអាចកាត់ឲ្យធ្លាយក្រពះបាន។ នេះជាការធ្វេសប្រហែសទុកថ្នាំពេទ្យជាមួយថ្នាំពុល ហើយបើអ្នកមិនចេះអក្សរ ឬមិនស្គាល់ថ្នាំច្បាស់ កុំយកថ្នាំពេទ្យមកលេប ឬផឹកផ្តេសផ្តាស់ នាំឲ្យគ្រោះថ្នាក់ដល់អាយុជីវិត៕
ចែករំលែកព័តមាននេះ