រាជធានីភ្នំពេញ ៖ ជនជាតិវៀតណាមចំនួន២៨នាក់ (ស្រីម្នាក់) ដែលស្នាក់នៅខុសច្បាប់ក្នុងខេត្តឧត្តរមានជ័យ ត្រូវបានឃាត់ខ្លួននិងបញ្ជូនមកកាន់អគ្គនាយកដ្ឋានអន្តោប្រវេសន៍ កាលពីវេលាព្រឹកថ្ងៃទី៦ ឧសភា ២០១៥ នេះ ។
ជនអន្តោប្រវេសន៍វៀតណាមខុសច្បាប់ទាំងនេះ ត្រូវបានឃាត់ខ្លួនពីទីតាំងសិប្បកម្មក្នុងស្រុកអន្លង់វែង ខេត្តឧត្តរមានជ័យ ។ ចំណែកឯ៣១នាក់ផ្សេងទៀត ត្រូវបានចាប់ខ្លួននៅក្នុងរាជធានីភ្នំពេញ ហើយជនជាតិវៀតណាមទាំងនោះ នឹងត្រូវបញ្ជូនទៅប្រទេសកំណើតវិញ ។
មន្ត្រីស្នងការរងនគរបាលខេត្តឧត្តរមានជ័យទទួលបន្ទុកផ្នែកអន្តោប្រវេសន៍បានថ្លែងកាលពីព្រឹកថ្ងៃទី៦ ឧសភា ២០១៥ នេះថា ការឃាត់ខ្លួនជនជាតិវៀតណាមទាំងនេះ ធ្វើឡើងដោយមានបទបញ្ជាពីអគ្គនាយកដ្ឋានអន្តោប្រវេសន៍ ក្នុងការចុះត្រួតពិនិត្យជនអន្តោប្រវេសន៍ខុសច្បាប់ កំពុងស្នាក់នៅក្នុងខេត្តឧត្តរមានជ័យ ។
មន្ត្រីស្នងការនគរបាលខេត្តឧត្តរមានជ័យថ្លែងថា «សមត្ថកិច្ចយើងបានឃាត់ខ្លួនជនជាតិវៀតណាមចំនួន២៨នាក់ ក្នុងស្រុកអន្លង់វែង និងបញ្ជូនមកកាន់អគ្គនាយកដ្ឋានអន្តោប្រវេសន៍ ដើម្បីបញ្ជូនបន្តទៅស្រុកកំណើតក្នុងប្រទេសវៀតណាមវិញ» ។ ជនជាតិវៀតណាមចំនួន២៨នាក់ ដែលស្នាក់នៅខុសច្បាប់ ត្រូវបានឃាត់ខ្លួននិងបញ្ជូនមកកាន់អគ្គនាយកដ្ឋានអន្តោប្រវេសន៍នៅព្រឹកថ្ងៃទី៦ ឧសភា ២០១៥ នេះ។
យោងតាមព័ត៌មានពីអគ្គនាយកដ្ឋានអន្តោប្រវេសន៍ចេញផ្សាយកាលពីថ្ងៃទី០៤ ឧសភា បានឱ្យដឹងថា កិច្ចប្រតិបត្តិការអនុវត្តច្បាប់អន្តោប្រវេសន៍ កាលពីថ្ងៃទី២៩ មេសា ២០១៥ កន្លងមក ស្ថិតនៅក្នុងសិប្បកម្មឈើក្នុងភូមិត្រពាំងថ្លឹង សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ ។ ជាលទ្ធផលរកឃើញជនជាតិវៀតណាម កំពុងលួចស្នាក់នៅ និងធ្វើការដោយខុសច្បាប់ចំនួន៣៦ នាក់ (ស្រី៣នាក់) ក្នុងនោះមានខ្មែរកម្ពុជាក្រោម រស់ក្នុងប្រទេសវៀតណាមចំនួន៣នាក់ ស្រី២នាក់ ។
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ