ខេត្តស្ទឹងត្រែង៖ កម្លាំងនគរបាលព្រហ្មទណ្ឌកម្រិតស្រាលនៃស្នងការដ្ឋាននគរបាលខេត្តស្ទឹងត្រែង កាលពីល្ងាចថ្ងៃទី៥ ឧសភា ២០១៥ បានបញ្ជូនជនសង្ស័យចំនួន៣នាក់បញ្ជូនទៅឃុំនៅពន្ធនាគារកាំងមេម៉ាយ ពាក់ព័ន្ធរណីឆក់កាបូបយកលុយរាប់លានរៀលនៅក្រុងស្ទឹងត្រែង កាលពីវេលាម៉ោងជាង៧ ថ្ងៃទី៣ ឧសភា ២០១៥ នៅមុខអគ្គិសនីខេត្ត ស្ថិតក្នុងភូមិកណ្តាល សង្កាត់ស្ទឹងត្រែង ក្រុងស្ទឹងត្រែង។
ប្រភពពីគ្រួសារជនរងគ្រោះប្តីឈ្មោះ សំ វ៉ាន់ថៃ និងប្រពន្ធឈ្មោះ ហ៊ូ ស្រីណែត បានរៀបរាប់ថា នៅមុនពេលកើតហេតុអ្នកទាំង២បានជិះម៉ូតូចេញពីផ្ទះម្តាយក្នុងគោលបំណងទៅផ្ទះរបស់ខ្លួន គ្រាដែលកំពុងធ្វើដំណើរ ស្រាប់តែមានជនសង្ស័យ២នាក់ជិះម៉ូតូមួយគ្រឿងមកអែបក្បែរ ហើយកញ្ឆក់កាបូបលុយ រត់គេចខ្លួនបាត់ ដែលក្នុងកាបូបនោះមានលុយខ្មែរចំនួន៨លានរៀល លុយដុល្លារចំនួន១.៧០០ដុល្លារ ទូរស័ព្ទអាយហ្វូន៦ មួយគ្រឿង ទូរស័ព្ទ ហ្គាឡាក់ស៊ីA7 មួយគ្រឿង គ្រឿងអល្លង្ការតម្លៃ១.០០០ដុល្លារ អត្តសញ្ញាណប័ណ្ណ០២សន្លឹក និងកាតគ្រីរថយន្ត០១សន្លឹក ។
ប្រភពពីជនរងគ្រោះដដែលបន្តថា ក្រោយពីក្រុមជនសង្ស័យធ្វើសកម្មភាពឆក់កាបូបហើយភ្លាមពួកខ្លួនក៏បានជិះម៉ូតូប្រដេញតាមរហូតដល់ចំណុចស្ថានីយសាំង តេលាភូមិថ្មលាត ក្រុមជនសង្ស័យនោះបានដកដាវ
ចេញមកគំរាមរកកាប់សម្លាប់ដោយសារតែភាពភ័យខ្លាច និងមិនហ៊ានដេញតាមទៀតពួកខ្លួនក៏បានជិះម៉ូតូត្រឡប់មកផ្ទះវិញទើបទៅដាក់ពាក្យបណ្តឹងសុំអន្តរាគមន៍ពីប៉ូលិសដើម្បីស្វែងរកទ្រព្យសម្បតិ្តមកវិញ។
ក្រោយទទួលពក្យបណ្តឹងពីគ្រួសារជនរងគ្រោះ កម្លាំងនគរបាលបានស្ទាក់គ្រប់គោលដៅតាមដានមុខសញ្ញាឆក់កាបូបរហូតនៅថ្ងៃទី៥ ឧសភា កម្លាំងនគរបាលបានឃាត់ខ្លួនជនសង្ស័យជាបន្តបន្ទាប់នៅទីកន្លែងខុសគ្នាយកមកស្នងការដ្ឋាននគរបាលខេត្ត និងសាកសួរដោយមន្ត្រីនគរបាលការិយាល័យព្រហ្មទណ្ឌកម្រិតស្រាល។ ជាលទ្ធផលក្រុមជនសង្ស័យទាំងនោះបានសារភាពរាល់ការប្រព្រឹត្តយ៉ាងពិតប្រាកដ៕
ចែករំលែកព័តមាននេះ