រាជធានីភ្នំពេញ៖ គណៈកម្មារទី១រដ្ឋសភាបានស្នើចំនួន៤ចំណុចទៅលោកសាយ សំអាល់ រដ្ឋមន្ត្រីក្រសួងបរិស្ថាន ខណៈពេលចូលបំភ្លឺគណៈកម្មការទី១ រដ្ឋសភាពីបញ្ហាជំលោះដីធ្លីនៅខេត្តកោះកុងនារសៀលថ្ងៃទី ៥ ឧសភា នៅវិមានរដ្ឋសភា ។
ក្រោយពិភាពក្សា និងសួរដេញដោលអស់រយៈពេលជាង៣ម៉ោង លោកអេង ឆៃអ៊ាង ប្រធានគណៈកម្មការសិទ្ធិមនុស្សទទួលពាក្យបណ្តឹង អង្កេត និងទំនាក់ទំនងរដ្ឋសភា ព្រឹទ្ធសភា (គណៈកម្មការទី១ រដ្ឋសភា)មានប្រសាសន៍ប្រាប់ក្រុមអ្នកសារព័ត៌មានថា គណៈកម្មការបានពិភាក្សាលើកបញ្ហាទំនាស់ដីធ្លីរបស់ប្រជាពលរដ្ឋនៅស្រុកបុទមសាគរ និងគិរីសាគរ នៅក្នុងខេត្តកោះកុង។
ក្នុងកិច្ចពិភាក្សានោះ គណៈកម្មការទី១ បានទទួលព័ត៌មានវិជ្ជមានមួយទាក់ទងនឹងការដោះស្រាយរបស់ក្រសួងបរិស្ថាន ហើយជារួមគណៈកម្មការទី១ ស្នើសុំឲ្យក្រសួងបរិស្ថានចំនួន៤ចំណុច គឺ១-សុំឲ្យពិនិត្យលទ្ធភាពក្នុងការឈ្វៀលដី ជូនប្រជាពលរដ្ឋដែលនៅសេសសល់ប្រមាណ៣១៨គ្រួសារ នៅស្រុកទាំងពីរ (ស្រុកគិរីសារគ និងបុទម សាគរ) ដែលកំពុងមានវិវាទជាមួយក្រុមហ៊ុនចិន ហើយប្រជាពលរដ្ឋមិនទាន់បានទទួលសំណង និងមិនបានចាកចេញ ។
ទី២-សុំកុំឲ្យមានការបង្ខិតបង្ខំ ឬប្រើប្រាស់វិធានការគំរាមកំហែង ឬប្រើប្រាស់តុលាការទៅលើប្រជាពលរដ្ឋដែលមិនទាន់ចាកចេញទាំង៣១៨គ្រួសារ គឺដើម្បីដំណោះស្រាយដោយសន្តិវិធីស្របតាមកិច្ចសន្យារវាងរដ្ឋាភិបាល និងក្រុមហ៊ុន ។
៣-សុំឲ្យក្រសួបរិស្ថាន ធ្វើការស៊ើបអង្កេតភាពមិនប្រក្រតីនៃការដោះស្រាយផលប៉ះពាល់កន្លងមកនៅកន្លែងវិវាទនោះ ព្រោះថាយោងតាមរបាយការណ៍សង្គមស៊ីវិលមិនរើសអើង ចំពោះការដោះស្រាយពីផលប៉ះពាល់នោះ និងទី៤-គណៈកម្មការសុំរបាយការណ៍ និងឯកសារបស់ប្រជាពលរដ្ឋដែលទទួលយកការដោះស្រាយ។
ចំណែកលោក សាយ សំអាល់ រដ្ឋមន្ត្រីក្រសួងបរិស្ថាន មានប្រសាសន៍ថាការចូលបំភ្លឺនៅគណៈកម្មការទី១ រដ្ឋសភានេះ ងាយស្រួលឲ្យគណៈកម្មការនេះ មានភាពងាយយល់ក្នុងការដោះស្រាយទាំងអស់ក្នុងស្រុកទាំងពីរខាងលើ ព្រោះថាគណៈកម្មការទី១ បានទទួលពាក្យបណ្តឹងច្រើនទាក់ទិនបញ្ហាទាំងនោះ៕
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ