រាជធានីភ្នំពេញ ៖ ក្រុម Khmer United FC នៅតែរក្សាបានជ័យជម្នះរបស់ខ្លួនជាបន្តបន្ទាប់ ក្រោយពីបានលត់ក្រុម TYGI FC ក្នុងលទ្ធផល ៤-១ ក្នុងការប្រកួតវគ្គជម្រុះក្នុងពូល A ពានរង្វាន់បាល់ទាត់ខ្មែររៀលអុីស្ទេត លើកទី៤ ឆ្នាំ២០១៥ នៅលើទីលាន MYTEAM កាលពីថ្ងៃអាទិត្យ ទី ៣ ឧសភា កន្លងមកនេះ ។
បើទោះជាការប្រកួតទាំង៤លើកមកនេះ ក្រុម Khmer United FC លេងចាញ់មួយប្រកួតក្តី ក៏ការប្រកួត៣លើកចុងក្រោយ ឈ្នះជាបន្តបន្ទាប់ មាន៩ពិន្ទុ ។ ចំណែកក្រុម TYGI FC វិញនោះ ទើបតែរកបាន៦ពិន្ទុប៉ុណ្ណោះ ក្នុងចំណោមការប្រកួតទាំង៤លើកកន្លងមកនេះ ។
រីឯក្រុម Christianair FC វិញនោះ ក៏នៅតែបន្តការឈ្នះរបស់ខ្លួន មិនបាញ់ក្រុម Khmer United FC ប៉ុន្មានដែរ គឺមាន៩ពិន្ទុនៅក្នុងដៃដូចគ្នា ក្រោយពីបានប្រកួតឈ្នះក្រុមម្ចាស់ជើងឯកឆ្នាំចាស់ Amru FC ក្នុងលទ្ធផល៥-២ រួចមកនោះ ។ ចំណែកក្រុម HPL FC ដែលមិនធ្លាប់ស្គាល់ចាញ់គ្រប់ការប្រកួតនាពេលកន្លងមកនោះ ពេលនេះបែរជាមកចាញ់ក្រុមពោធិ៍សែនជ័យ ក្នុងលទ្ធផល២-០ទាំងមិនគួរឱ្យជឿ សម្រាប់ការប្រកួតនៅលើកទី៤នេះ ។ ទោះបីជាយ៉ាងណា ក៏ក្រុម HPL FC នៅតែរក្សាបាន៩ពិន្ទុ លើក្រុមពោធិ៍សែនជ័យ ដែលទើបតែរកបាន៦ពិន្ទុ ។
ក្រុមព្រៃសិលា បានយកឈ្នះលើក្រុម Canteen FC ក្នុងលទ្ធផល៣-០ មាន៦ពិន្ទុ ខណៈការប្រកួតរវាងក្រុមបាសាក់ ដែលជាក្រុមបាតតារាងជាមួយក្រុម Union FC ត្រូវលើកពេលទៅប្រកួតនៅសប្តាហ៍ក្រោយវិញ ដោយសារភ្លៀងធ្លាក់ខ្លាំងពេក ។ ដោយឡែក សម្រាប់ការប្រកួតវគ្គជម្រុះនៅក្នុងពូល B ដែលធ្វើឡើងនៅលើទីលានដំរីស វិញនោះ ក្រុមនិស្ស័យនៅតែបន្តភាពខ្លាំងរបស់ខ្លួន ដោយបានយកឈ្នះលើក្រុម Anvaya Kaila FC នៅក្នុងលទ្ធផល៣-២ ទាំងលំបាក។ ចំណែកក្រុម Narita FC វិញ ក៏មិនអន់ជាងក្រុមនិស្ស័យប៉ុន្មានដែរ បើទោះជាការប្រកួតនៅលើកទី៤នេះ បានយកឈ្នះលើក្រុម Y FC ក្នុងលទ្ធផល៤-៣ទាំងលំបាកយ៉ាងណាក៏ដោយ យ៉ាងហោចណាស់ក៏ក្រុមនិស្ស័យ និងក្រុម Narita FC រក្សាបាន១២ពិន្ទុនៅក្នុងដៃបានយ៉ាងល្អដូចគ្នា ។
ចំណែកក្រុម Goodhill បានបន្តចាញ់ក្រុម V Train FC ក្នុងលទ្ធផល២-១ ។ ក្រុម Goodhill FC រហូតមកទល់ពេលនេះ នៅមិនទាន់ស្គាល់រសជាតិឈ្នះម្តងឡើយ ដោយប្រកួត៤លើក ចាញ់៣លើក ស្មើ១លើក ។
ក្រុម RFL FC បានលត់ក្រុម Multi Media FC ក្នុងលទ្ធផល៥-០ ។ ក្រុម Multi Media FC រហូតមកដល់ពេលនេះ ក៏នៅមិនទាន់ស្គាល់ឈ្នះដែរ ដោយប្រកួត៤លើក គឺស្មើ២លើក ចាញ់២លើក ទើបតែរកបាន២ពិន្ទុប៉ុណ្ណោះ ។ ដូច្នេះពេលនេះ ក្រុម RFL FC រកបាន៩ពិន្ទុះហើយ ។ ចំណែកក្រុមខ្លា.ស ដែលលេងចាញ់២ប្រកួត ស្មើ១ប្រកួតកន្លងមកនោះ ពេលនេះស្គាល់ពាក្យថាឈ្នះហើយ ដោយបានលត់ក្រុមបាតតារាង Heng Asia FC ក្នុងលទ្ធផល៤-០ ៕
ចែករំលែកព័តមាននេះ