ខេត្តរតនគិរី ៖ ភរិយាសមាជិកក្រុមប្រឹក្សាស្រុកតាវែងមួយរូបបានជាប់ចោទពីបទប្រើអំណាចវាយមន្ត្រីហិរញ្ញវត្ថុសាលាខេត្ត៤បន្ទះឫស្សីដោយសារកំហឹង កាលពីថ្ងៃទី២ ឧសភា វេលាម៉ោង៨និង២០នាទីព្រឹក នៅភូមិអូរឡាង ឃុំប៉ូយ ស្រុកអូរជុំ
ខេត្តរតនគិរី ៖ ភរិយាសមាជិកក្រុមប្រឹក្សាស្រុកតាវែងមួយរូបបានជាប់ចោទពីបទប្រើអំណាចវាយមន្ត្រីហិរញ្ញវត្ថុសាលាខេត្ត៤បន្ទះឫស្សីដោយសារកំហឹង កាលពីថ្ងៃទី២ ឧសភា វេលាម៉ោង៨និង២០នាទីព្រឹក នៅភូមិអូរឡាង ឃុំប៉ូយ ស្រុកអូរជុំ ។
ទាក់ទិនករណីខាងលើ ត្រូវបានលោក យីន វុត អាយុ៥០ឆ្នាំ ជនជាតិព្រៅ ជាមន្ត្រីហិរញ្ញវត្ថុសាលាខេត្ត ដែលជាជនរងគ្រោះប្រាប់ឱ្យដឹងថា អ្នកប្រើអំពើហិង្សាមកលើរូបគាត់គឺអ្នកស្រី កៅ លី អាយុ៤៨ឆ្នាំ ជាភរិយាលោក សៀល រឹងកា អាយុ៤៩ឆ្នាំ សមាជិកក្រុមប្រឹក្សាស្រុកតាវែង ។ ទាំងអ្នកប្រើអំពើហិង្សានិងអ្នករងគ្រោះជាជនជាតិដើមភាគតិចព្រៅដូចគ្នា ហើយមានទីលំនៅភូមិថ្មដា សង្កាត់អូរកន្សែង ក្រុងបានលុង ជាមួយគ្នា និងមានដីចម្ការជាប់ព្រំគ្នាផងដែរ ។
បើតាមការរៀបរាប់របស់មន្ត្រីហិរញ្ញវត្ថុសាលាខេត្តរូបនេះថា រឿងរ៉ាវឈ្លោះទាស់ទែងគ្នានេះ គឺគ្រួសារគាត់និងគ្រួសារអ្នកស្រី កៅ លី និយាយឱ្យចំទៅមើលមុខគ្នាមិនចំទេ រយៈពេល៧-៨ឆ្នាំមកហើយ ។ ការផ្ទុះរឿងថ្មីបំផុតគឺដល់ថ្នាក់ជេរគ្នាផ្អើលពេញភូមិ រហូតស្ត្រីឈ្មោះ កៅ លី បានវាយគាត់ចំនួន៤បន្ទះឫស្សី ត្រូវរបួសដងខ្លួន ហើយដោយទ្រាំមិនបានគាត់ក៏បានវាយតបតវិញ២ដៃចំកណ្តាលមុខ ។
ទាក់ទិននឹងការមានជម្លោះបែកផ្សែងខាងលើ ត្រូវបានគេដឹងថា ដោយសារភាគីមន្ត្រីហិរញ្ញវត្ថុសាលាខេត្ត ខឹងរឿងភាគីម្ខាងដុតព្រៃចម្ការ បណ្តាលឱ្យភ្លើងរាលឆេះដល់ចម្ការរបស់គាត់អស់៤ហិកតា ខូចខាតដើមស្វាយចន្ទីអស់រាប់រយដើម ។ បើតាមការរៀបរាប់របស់លោក យីន វុត ថា ក្នុងអំពើហិង្សាខាងលើលោកមិនសុខចិត្តទេ ហើយលោកនឹងប្តឹងទៅអង្គការសិទ្ធិមនុស្សប្រចាំខេត្តរតនគិរី ព្រោះស្ត្រីរូបនេះអាងប្តីជាសមាជិកក្រុមប្រឹក្សាស្រុកទើបហ៊ានរំលោភបំពានលើគាត់ ។
ចំពោះការចោទប្រកាន់ខាងលើ មិនអាចសុំការបំភ្លឺពីអ្នកស្រី កៅ លី និងលោក សៀល រឹងកា ជាប្តីបានទេ ដោយទូរស័ព្ទរបស់អ្នកស្រីហៅអត់ចូល ។ កោះសន្តិភាពរង់ចាំការបំភ្លឺជានិច្ចពីអ្នកកស្រី កៅ លី រាល់ការចោទប្រកាន់របស់លោក យីន វុត នេះ ៕
ចែករំលែកព័តមាននេះ