សម្តេចតេជោ ហ៊ុន សែន ព្រមានដល់អភិបាលខេត្តទាំងអស់ ត្រូវចាត់វិធានការ អ្នកដែលកាងផ្តាច់មុខទំនិញកសិផល ស្រូវ អង្ករ ផ្តាច់មុខពីប្រជាពលរដ្ឋ និងបានសង្កត់.កប្រជាពលរដ្ឋលើតម្លៃផ្តាច់មុខ
ខេត្តពោធិ៍សាត់ ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា មានប្រសាសន៍នាព្រឹកថ្ងៃទី៤ ឧសភា ក្នុងឱកាសប្រារព្ធពិធីបើកការដ្ឋានគម្រោងសាងសង់ផ្លូវជាតិលេខ៥៥ ដែលមានប្រវែង១៨២,១៦៦គីទ្បូម៉ែត្រ ក្នុងបរិវេណសាលាបឋមសិក្សា ហ៊ុន សែន បាក់ចិញ្ចៀន ស្ថិតក្នុងឃុំបាក់ចិញ្ចៀន ស្រុកភ្នំក្រវាញ ខេត្តពោធិ៍សាត់ ព្រមានដល់អភិបាលខេត្តទាំងអស់ ត្រូវចាត់វិធានការ អ្នកដែលកាងផ្តាច់មុខទំនិញកសិផល ស្រូវ អង្ករ ផ្តាច់មុខពីប្រជាពលរដ្ឋ និងបានសង្កត់.កប្រជាពលរដ្ឋ លើតម្លៃផ្តាច់មុខ ។
ជាងនេះទៅទៀត សម្តេចតេជោបានសង្កត់ធ្ងន់ថា សូមឱ្យអស់លោកពិនិត្យមើលកុំចាំឱ្យក្រសួងពាណិជ្ជកម្ម ព្រោះរឿងនេះវាធ្ងន់ធ្ងរណាស់ បើមានករណីបែបនេះត្រូវផ្តន្ទាទោសមន្ត្រីដែលឃុបឃិតជាមួយឈ្មួញ ព្រោះទីផ្សារអ្នកដែលឱ្យតម្លៃខ្ពស់ប្រជាពលរដ្ឋលក់ហើយ នេះបែរជាមានជើងកាងមិនឱ្យគេមកចូលទិញ ។
លោក សម រង្ស៊ី គាត់វាយ SMS មកឱ្យខ្ញុំ ហើយខ្ញុំក៏បញ្ជូនទៅឱ្យលោក ស៊ុន ចាន់ថុល លោក អ៊ុក រ៉ាប៊ុន លោក អូន ព័ន្ធមុនីរ័ត្ន ។
រឿងនេះខ្ញុំក៏ធ្លាប់បានឮដែរ ករណីជាក់ស្តែងខ្ញុំដឹងដូចជាថ្នាំជក់ ថ្នាំកូតាបតាមដងទន្លេមេគង្គកាលពីឆ្នាំទៅ មានឈ្មួញកាងផ្តាច់មុខ ហើយឈ្មួញនោះទៅសង្កត់កអ្នកដាំថ្នាំកូតាប ។ ខ្ញុំឱ្យលុបចោលភ្លាម ព្រោះមានឈ្មួញសង្កត់.កប្រជាជន ។
សម្តេចមានប្រសាសន៍ថា ប្រជាពលរដ្ឋដែលមានកសិផល ផលិតផល ត្រូវលក់ឱ្យអ្នកណាដែលឱ្យថ្លៃខ្ពស់លក់ឱ្យអ្នកនោះ ជីក៏ដូចគ្នា ត្រូវពិនិត្យគុណភាពផងដែរ ។
សូមឱ្យយកចិត្តទុកដាក់អំពីបញ្ហានេះ ត្រូវឱ្យទីផ្សារជាអ្នកាត់សេចក្តី អត់មានជើងកាង អត់មានជើងប៉ាវ បើមានបញ្ហានេះគឺខុសហើយ ។ ខ្ញុំជម្នះធ្វើសេដ្ឋកិច្ចទីផ្សារតាំងពីណាពីណីមកម្ល៉េះ តាំងពីជំនាន់ប្រទេសចិនមិនទាន់កែទម្រង់សេដ្ឋកិច្ចម្ល៉េះ នៅវៀតណាម សូវៀត មិនទាន់កែ ចំណែកខ្ញុំកែមុន ហើយបែរជាមានរឿងដូច្នេះ ។
សម្តេចសង្កត់ធ្ងន់ថា មានកន្លែងខ្លះវាជារឿងពិតតែម្តង ហើយជាក់ស្តែងគឺរឿងថ្នាំកូតាបឆ្នាំទៅលុបចោល ។ ការធ្វើសេដ្ឋកិច្ចទីផ្សារត្រូវឱ្យទីផ្សារកាត់សេចក្តី ។
ខ្ញុំសូមដាក់បញ្ហានេះ រឿងស្ថាប័នជាតិក្របខណ្ឌគោលនយោបាយសេដ្ឋកិច្ច ក្របខណ្ឌក្រសួងពាណិជ្ជកម្ម កសិកម្ម សូមអស់លោកនៅមូលដ្ឋានត្រូវពិនិត្យមើលរឿងនេះឱ្យច្បាស់ បើសិនមានមន្ត្រីឃុបឃិត គឺមានមន្ត្រីនៅមូលដ្ឋានដែរ ។
ដូច្នេះសូមពិនិត្យមើលបញ្ហានេះឱ្យច្បាស់ ប្រយ័ត្នមានសមត្ថកិច្ចឃុបឃិតជាមួយឈ្មួញ ។
សម្តេចបានសម្តែងការអបអរសាទរ និងសរសើរប្រជាជនខេត្តពោធិ៍សាត់ ដែលមិនខឹងគោទៅវ៉ៃរទេះ ៕
ចែករំលែកព័តមាននេះ