រាជធានីភ្នំពេញ ៖ ដងផ្លូវលេខ៩០០ដែលមានព្រំប្រទល់រវាងសង្កាត់ទួលសង្កែ និងស្រះចក ចំណុចផ្សារទួលសង្កែ ត្រូវអាជ្ញាធរប្រើប្រាស់កម្លាំងចុះរៀបចំសណ្តាប់ធ្នាប់ដើម្បីបើកផ្លូវឱ្យចរាចរណ៍ឡើងវិញ។
ការចុះរៀបចំសណ្តាប់ធ្នាប់នេះធ្វើឡើង បន្ទាប់ពីមានសេចក្តីជូនដំណឹងរបស់សាលារាជធានីដល់អាជីវករដែលលក់ដូរនៅតាមដងផ្លូវលេខ៩០០ ដោយណែនាំឱ្យពួកគាត់ប្តូរទីតាំងទៅលក់ដូរនៅផ្សារផ្លាហ្សាដែលនៅខាងកើតផ្លូវ ដោយចោទប្រកាន់ថា ការលក់ដូររបស់ពួកគាត់ធ្វើឱ្យប៉ះពាល់ដល់សណ្តាប់ធ្នាប់ និងទុកពេលឱ្យពួកគាត់១៥ថ្ងៃ គឺចាប់ពីថ្ងៃទី៦ មេសា មកដល់ពេលនេះគឺផុតឱសានវាទហើយ ដូច្នេះអាជ្ញាធរ រួមទាំងសមត្ថកិច្ចខណ្ឌទាំង២ គឺខណ្ឌដូនពេញ និងប្ញស្សីកែវបានចុះមកដាក់កម្លាំងត្រៀមតាំងពីម៉ោង៤-៥ព្រឹកដើម្បីទប់ស្កាត់អាជីវករកុំឱ្យលក់ដូរលើចិញ្ចើម និងដងផ្លូវខាងលើនេះ។
ទោះបីជាយ៉ាងណា ការចុះរៀបចំសណ្តាប់ធ្នាប់នេះធ្វើឱ្យអាជីវករមានប្រតិកម្ម ដោយពួកគេអះអាងថា អាជ្ញាធរបណ្តេញពួកគេមិនឱ្យលក់ដូរនៅលើផ្លូវនេះ ព្រោះតែចង់ឱ្យពួកគេទៅលក់នៅផ្សារផ្លាហ្សាវិញ។ អាជីវករទាំងនោះបាននិយាយថា ពួកគាត់ជាអ្នកលក់ដូរកំប៉ិកកំប៉ុក បើឱ្យគាត់ទៅលក់នៅក្នុងផ្សារត្រូវបង់ថ្លៃតូបថ្លៃ ដូច្នេះពួកគាត់គ្មានលទ្ធភាពទេ។
គួរបញ្ជាក់ថា ការដេញរបស់អាជ្ញាធរ គឺបានធ្វើឱ្យផ្លូវលេខ៩០០ត្រូវបានបើកទាំងស្រុងឱ្យធ្វើចរាចរណ៍វិញបាន ហើយបានណែនាំមិនឱ្យអាជីវករលក់ដូរចាប់ពីថ្ងៃនេះទៅ តែបើនៅតែមិនស្តាប់តាមការណែនាំទេ អាជ្ញាធរនឹងចុះដកហូតសម្ភារដោយមិនទទួលខុសត្រូវឡើយ៕
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ