ខេត្តសៀមរាប ៖ សមត្ថកិច្ចនគរបាលព្រហ្មទណ្ឌកម្រិតស្រាលសហការជាមួយនគរបាលស្រុកពួក បានធ្វើការស្ទាក់ចាប់ឃាត់ខ្លួនជនជាតិទួរគីម្នាក់ក្នុងចំណោម៣នាក់នៅកណ្តាលក្រុងសៀមរាប យោងតាមពាក្យបណ្តឹងរបស់ជនរងគ្រោះ ខណៈពួកគេធ្វើសកម្មចូលទៅដូរប្រេងម៉ាស៊ីន រួចក៏បន្លំលួចលុយចំនួន២០០០ដុល្លារ ហើយក៏គេចខ្លួនរួច២នាក់ ។
ហេតុការណ៍ដែលជនជាតិទួរគីលួចលុយពលរដ្ឋតាមផ្លូវធ្វើឲ្យមានការភ្ញាក់ផ្អើលកើតឡើងនៅរសៀលថ្ងៃទី១ ខែមេសា ឆ្នាំ២០១៥ នៅភូមិពង្រថ្មី ឃុំសសរស្តម្ភ ស្រុកពួក ហើយត្រូវសមត្ថកិច្ចចាប់បាននៅថ្ងៃទី៣ ខែឧសភា រួចបញ្ជូនមកតុលាការ ។
តាមប្រភពពីសមត្ថកិច្ចបានប្រាប់«កោះសន្តិភាព»នៅរសៀលថ្ងៃទី៤ ខែឧសភា ឆ្នាំ២០១៥ថា ជនបរទេសដែលបានចាប់ខ្លួនមានឈ្មោះ IS skender ភេទប្រុស អាយុ៣១ឆ្នាំ ជាជនជាតិតួគី ស្នាក់នៅភ្នំពេញក្នុងនាមជាភ្ញៀវទេសចរណ៍ ។ ចំណែកជនរងគ្រោះមានឈ្មោះទីន ពេក អាយុ៤៦ឆ្នាំ និងប្រពន្ធឈ្មោះសន សាលី អាយុ៣២ឆ្នាំ ជាជាងជួសជុលម៉ូតូ និងលក់គ្រឿងបន្លាស់ម៉ូតូ រស់នៅភូមិកើតហេតុខាងលើ ។
ប្រភពបានបន្តទៀតថា ក្រោយពេលកើតហេតុពលរដ្ឋជាជនរងគ្រោះបានប្តឹងមកសមត្ថកិច្ចថា មានជនបរទេស១ក្រុមមានគ្នា៣នាក់ស្រីម្នាក់ បានមកបូមខ្យល់កង់ឡាននៅកន្លែងរបស់គាត់ ហើយបានបន្លំលួចលុយអស់២០០០ដុល្លារ រួចក៏បើកឡានគេចខ្លួន ។ ភ្លាមៗនោះសមត្ថកិច្ចស្រុកពួកបានសហការជាមួយការិយាល័យព្រហ្មទណ្ឌកម្រិតស្រាលដេញស្ទាក់ចាប់បាននៅកណ្តាលក្រុងសៀមរាប ។ក្នុងពេលស្ទាក់ចាប់បានឡានជនបរទេសប្រុសម្នាក់ស្រីម្នាក់បានរត់គេចខ្លួនបាត់ស្រមោល ។
ប្រភពដដែលបានបន្តថា ក្រោយពីឃាត់ខ្លួនជនបរទេសម្នាក់ និងដកហូតរថយន្តម៉ាកឡិចស៊ិស៣០០ពណ៌ស ពាក់ស្លាកលេខ ភ្នំពេញ2V-3861 មួយគ្រឿង រីឯប្រាក់ដែលជនសង្ស័យលួចនោះពុំមាននៅក្នុងរថយន្តដែលជនសង្ស័យជិះទេ ។
ក្រោយពីសួរនាំរួច សមត្ថកិច្ចបានកសាងសំណុំរឿងបញ្ជូនទៅតុលាការដើម្បីចាត់ការជាបន្ត ៕
ចែករំលែកព័តមាននេះ