រាជធានីភ្នំពេញ ៖ ទាំងអ្នកកាសែតជាតិ និងអន្តរជាតិប្រមាណ១០០នាក់ បានចូលរួមក្នុងថ្ងៃទិវាសេរីភាពសារព័ត៌មានពិភពលោក២០១៥ បានស្មឹងស្មាតគោរពដល់វិញ្ញាណក្ខន្ធលោកប៉ែន សមិទ្ធិ ប្រធានក្លិបអ្នកកាសែតកម្ពុជា និងនិពន្ធនាយកកាសែតរស្មីកម្ពុជា ដែលបានធ្វើមរណកាល កាលពីពេលកន្លងទៅ ។ ទន្ទឹមនោះ វាគ្មិនសំខាន់ៗដែលបានចូលរួមក្នុងទិវាសេរីភាពសាព័ត៌មានពិភពលោក ក៏បានលើកឡើងផងដែរថា អំពីសមិទ្ធផល និងស្នាដៃរបស់លោកប៉ែន សមិទ្ធិ ដែលបានបន្សល់ទុកក្នុងវិស័យសារព័ត៌មាននៅកម្ពុជា ។
គួររំលឹកថា នៅថ្ងៃទី៤ ឧសភា ២០១៥ នេះ ក្រុមអ្នកសារព័ត៌មាននៅកម្ពុជា បានសហការជាមួយស្ថាប័ន និងអង្គការពាក់ព័ន្ធបានរៀបចំសេរីភាពសារព័ត៌មានពិភពលោកក្រោមប្រធានបទ «សារព័ត៌មាន និងច្បាប់ស្តីពីសិទ្ធិទទួលយកបានព័ត៌មាន» ខណៈដែលពិធីនោះ ត្រូវបានរៀបចំឡើងនៅសណ្ឋាគារ កាំបូឌីយ៉ាណា ។
លោកស្រី Anna Lemaistre តំណាងអង្គការ UNESCO ប្រចាំកម្ពុជា បានថ្លែងថា ការប្រារព្ធទិវាសេរីភាពសារព័ត៌មានពិភពលោកឆ្នាំ២០១៥នេះ មានគោលបំណង ដើម្បីផ្តល់វេទិកាមួយសម្រាប់តំណាង និងអ្នកប្រកបវិជ្ជាជីវៈក្នុងប្រព័ន្ធផ្សព្វផ្សាយព័ត៌មានធ្វើការពិភាក្សាអំពីញ្ហាប្រឈមនានារបស់អ្នកសារព័ត៌មាន ដើម្បីទទួលបានព័ត៌មានសាធារណៈ ។
លោកស្រីបន្តថា ច្បាប់ស្តីពីសិទ្ធិទទួលបានព័ត៌មានដែលនឹងប្រកាសឱ្យប្រើប្រាស់នាពេលខាងមុខ នឹងត្រូវបានលើកយកមកពិភាក្សាផងដែរ ខណៈដែលគេដឹងថា ច្បាប់នេះអាចនឹងជួយដល់អ្នកសារព័ត៌មានអាចបំពេញការងាររបស់ខ្លួនឱ្យបានហ្មត់ចត់ប្រកបដោយឯករាជ្យភាព និងទាន់ពេលវេលា ។
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ