រាជធានីភ្នំពេញ ៖ បង្គោលភ្លើងថ្មធំមួយដើមត្រូវអគ្គិភ័យឆាបឆេះឡើង និងខ្សែភ្លើងត្រូវធ្លាក់រាយប៉ាយពាសពេញដងផ្លូវដោយសារទុស្សេចរន្តអគ្គិសនី បង្កឱ្យមានការភ្ញាក់ផ្អើលជាខ្លាំងដល់អ្នកស្រុកដែលរស់នៅជិត
រាជធានីភ្នំពេញ ៖ បង្គោលភ្លើងថ្មធំមួយដើមត្រូវអគ្គិភ័យឆាបឆេះឡើង និងខ្សែភ្លើងត្រូវធ្លាក់រាយប៉ាយពាសពេញដងផ្លូវដោយសារទុស្សេចរន្តអគ្គិសនី បង្កឱ្យមានការភ្ញាក់ផ្អើលជាខ្លាំងដល់អ្នកស្រុកដែលរស់នៅជិតកន្លែងកើតហេតុ និងអ្នកដំណើរនាំគ្នាចោមរោមមើល កាលពីវេលាម៉ោង១០ និង៤៥នាទីព្រឹក ថ្ងៃទី០៤ ឧសភា ២០១៥ នៅចំណុចទល់មុខក្រុមហ៊ុនលាយស៊ីម៉ង់ត៍ ហុងគន់ ស្ថិតតាមបណ្តោយផ្លូវលេខ២១៧ ( ផ្លូវមុន្នីរ៉េត )ក្នុងភូមិទ្រា២ សង្កាត់ស្ទឹងមានជ័យ ខណ្ឌមានជ័យ ។
ប្រភពពីកន្លែងកើតហេតុឱ្យដឹងថា មុនពេលមានអណ្តាតភ្លើងឆាបឆេះ គេសង្គេតឃើញមានផ្សែងហុយចេញពីខ្សែភ្លើងដែលនៅជាប់បង្គោលភ្លើងមេធំខាងលើ ។ ភ្លាមនោះស្រាប់តែខ្សែភ្លើងទាំងអស់ត្រូវផ្ទុះបែកផ្កាភ្លើងបង្កជាអណ្តាតភ្លើងឆាបឆេះខ្សែភ្លើងធ្លាក់រាយប៉ាយពេញដី បង្កឱ្យមានការភ្ញាក់ផ្អើលតែម្តង ។
ភ្លាមៗនោះ សមត្ថកិច្ចមូលដ្ឋាន និងកម្លាំងមន្ត្រីជំនាញអគ្គិសនីបានចុះអន្តរាគមន៍ដល់កន្លែងកើតហេតុ បិទប្រព័ន្ធចរន្តខ្សែភ្លើង ហើយនាំគ្នាយកបំពង់ពន្លត់អគ្គិភ័យបាញ់ពន្លត់អណ្តាតភ្លើងឱ្យរលត់សូន្យសុងទៅវិញតែម្តងទៅ ។
ក្នុងករណីឆាបឆេះនេះដែរ រថយន្តពន្លត់អគ្គិភ័យចំនួន១គ្រឿងបានចុះអន្តរាគមន៍ដល់កន្លែងកើតហេតុ ប៉ុន្តែមិនបានបាញ់ទឹកពន្លត់នោះទេ គឺសមត្ថកិច្ចប្រើបំពង់ពន្លត់អគ្គិភ័យអស់៨បំពង់តូចក្នុងការបាញ់ពន្លត់អណ្តាតភ្លើង៕
ចែករំលែកព័តមាននេះ