ខេត្តបន្ទាយមានជ័យ ៖ ពលករខុសច្បាប់ដែលភាគីថៃចាប់បញ្ជូនត្រឡប់មកកម្ពុជាតាមរថយន្តទ្រុងនៅច្រកទ្វារអន្តរជាតិប៉ោយប៉ែតសំរ៉ាប់ខែមេសា ឆ្នាំ២០១៥ មានការកើនឡើងជាងខែមីនា ឆ្នាំ២០១៥ ដូចគ្នា
ខេត្តបន្ទាយមានជ័យ ៖ ពលករខុសច្បាប់ដែលភាគីថៃចាប់បញ្ជូនត្រឡប់មកកម្ពុជាតាមរថយន្តទ្រុងនៅច្រកទ្វារអន្តរជាតិប៉ោយប៉ែតសំរ៉ាប់ខែមេសា ឆ្នាំ២០១៥ មានការកើនឡើងជាងខែមីនា ឆ្នាំ២០១៥ ដូចគ្នា ក្នុងនោះមួយចំនួនតូចកាន់កាតស៊ីជម្ពូ ព្រោះចាញ់បោកមេខ្យល់មិនឆ្លងតាមច្រកទ្វារអន្តរជាតិបែរជានាំគ្នាឆ្លងតាមច្រករបៀង។
មន្ត្រីនៅទីតាំងទទួលពលករបញ្ជូនពីប្រទេសថៃក្នុងភូមិប៉ោយប៉ែតក្បែរច្រកទ្វារអន្តរជាតិប៉ោយប៉ែតប្រាប់កោះសន្តិភាពថា ពលករបញ្ជូនពីថៃក្នុងខែមេសាសរុប៦.៧១៧នាក់ ដោយក្នុងចំណោមនេះមានស្ត្រី២.១៧៩នាក់ និងកុមារ៤៥៦នាក់។
មន្ត្រីខាងលើបន្តថា ពលករខុសច្បាប់ដូចគ្នាកាលពីខែមីនាមានចំនួន៥.៣៧៨នាក់ ស្ត្រី១.៦៤៨នាក់ និងកុមារ៣៧១នាក់។ មន្ត្រីខាងលើបន្តថា ពលករដែលភាគីថៃបញ្ជូនមកក្នុងខែមេសាមួយចំនួនតូចពួកគេកាន់ប័ណ្ណស៊ីជម្ពូ ព្រោះចាញ់បោកមេខ្យល់មិនឆ្លងតាមច្រកទ្វារអន្តរជាតិបែរជាឆ្លងតាមច្រករបៀងដោយខុសច្បាប់ទៅវិញ។
គួរបញ្ជាក់ថា ក្រោយពីប្រទេសថៃចាប់ផ្ដើមដំណើរការឲ្យពលករកម្ពុជាប្រើប្រាស់ប័ណ្ណស៊ីជម្ពូចេញ-ចូលធ្វើការបានតាមបណ្ដាខេត្តនោះលំហូរពលករខ្មែរចូលទៅប្រទេសថៃតាមច្រកទ្វារអន្តរជាតិនានា ពិសេសច្រកទ្វារអន្តរជាតិប៉ោយប៉ែតកាន់តែមានចំនួនច្រើនជាងពីពេលមុនរបបយោធាថៃចាប់បញ្ជូនពលករត្រឡប់ជាង២៥ម៉ឺននាក់ក្នុងខែមិថុនា ឆ្នាំ២០១៤៕
ចែករំលែកព័តមាននេះ