ខេត្តកំពង់ស្ពឺ ៖ បន្ទាប់ពីធ្វើការលាក់ខ្លួននិងស៊ើបអង្កេតរួចមកនគរបាលនៃការិយាល័យព្រហ្មទ័ណ្ឌកម្រិតធ្ងន់ខេត្តបានបញ្ជូនខ្លួនជនសង្ស័យជាបក្ខពួកក្រុមចោរប្លន់ម៉ូតូទៅសាលាដំបូងខេត្តដើម្បីចាត់ការតាមច្បាប់ ។
ជនដែលសង្ស័យជាបក្ខពួកក្រុមចោរប្លន់និងត្រូវបញ្ជូនទៅសាលាដំបូងនាព្រឹកថ្ងៃទី០៣ ឧសភា ២០១៥នេះឈ្មោះ ឈួង សារឿង ភេទប្រុស អាយុ២២ឆ្នំា មានទីលំនៅក្នុងភូមិកំ្រាងពង្រ ឃុំវល្លិ៍ស ស្រុកសំរោងទង ។
នាយការិយាល័យនគរបាលព្រហ្មទ័ណ្ឌកម្រិតធ្ងន់ខេត្ត លោកវរៈសេនីយ៍ត្រី សម សាក់ បានឲ្យដឹងថា ការឃាត់ខ្លួនជនខាងលើនេះ គឺធ្វើឡើងខណៈជនសង្ស័យបានយកម៉ូតូ១គ្រឿងដែលបក្ខពួកខ្លួនបានប្លន់ពីជនរងគ្រោះនៅចំណុចផ្លូវលេខ១៣៥ កែងផ្លូវ៤៤៦ សង្កាត់ទួលទំពូងទី១ ខណ្ឌចំការមន រាជធានីភ្នំពេញកាលពីម៉ោងប្រមាណ១រំលងអធ្រាត្រថ្ងៃទី២២ មេសា ២០១៥ មកលក់នៅក្នុងខេត្តកំពង់ស្ពឺ ។
លោកបន្តថា រហូតមកដល់ថ្ងៃទី៣០មេសា ដោយមានការសហការគ្នាបានល្អជាមួយនគរបាលរាជធានីភ្នំពេញផងនោះ កងកម្លំាងរបស់លោកឈានទៅកំណត់មុខសញ្ញា និងឃាត់ខ្លួនជនសង្ស័យខាងលើ ព្រមទំាងដកហូតម៉ូតូដែលយកមកលក់ឲ្យអ្នកផ្សេងនៅខេត្តកំពង់ស្ពឺបានតែម្តង ។
បើតាមលោកវរៈសេនីយ៍ត្រី សម សាក់ បច្ចុប្បន្នម៉ូតូត្រូវបានប្រគល់ឲ្យម្ចាស់ឈ្មោះ ដួង លឹមហេង ភេទប្រុស អាយុ២២ឆ្នាំ រស់នៅភូមិម័ល សង្កាត់-ខណ្ឌដង្កោ រាជធានីភ្នំពេញ ។
លោកនាយការិយាល័យនគរបាលព្រហ្មទ័ណ្ឌកម្រិតធ្ងន់ខេត្តបានបន្ថែមទៀតថា ក្នុងប្រតិបត្តិការស្វែងរកចាប់ខ្លួនក្រុមចោរប្លន់នេះ សមត្ថកិច្ចបានសុំដីកាចាប់ខ្លួនមុខសញ្ញាពីរនាក់ទៀតដែលកំពុងរត់គេចខ្លួន ម្នាក់ឈ្មោះ ឈួង សារឿន អាយុ២៤ឆ្នាំ ត្រូវជាបងប្រុសបង្កើតរបស់ជនសង្ស័យដែលត្រូវបានបញ្ជូនទៅសាលាដំបូងនៅព្រឹកមិញ និងម្នាក់ទៀតឈ្មោះ ខ្មៅ ៕
ចែករំលែកព័តមាននេះ