ខេត្តបន្ទាយមានជ័យ ៖ នៅរសៀលថ្ងៃទី០២ ឧសភា ២០១៥ លោកឧត្តមសេនីយ៍ត្រី សំ ជិត ស្នងការរងទទួលបន្ទុកការងារព្រំដែនតំណាងឧត្តមសេនីយ៍ត្រី អាត់ ខែម ស្នងការនគរបាលខេត្តបន្ទាយមានជ័យ រួមដំណើរដោយលោកវរសេនីយ៍ឯក វង់ វ៉ិត ស្នងការរងទទួលបន្ទុកធនធានមនុស្ស និងលោកវរសេនីយ៍ទោ ម៉ក ឧត្តម ប្រធានការិយាល័យ បុគ្គលិក បាននាំយកថវិកាចំនួន៤លានរៀល ដែលជាថវិការរបស់សមាគមមិត្តនគរបាលជាតិកម្ពុជា ទៅប្រគល់ជូនក្រុមគ្រួសារសពលោកអនុសេនីយ៍ទោគុជ សុផាត មន្ត្រីនគរបាលប៉ុស្តិ៍ការពារព្រំដែននៃវរសេនាតូចការពារព្រំដែនគោកលេខ៩១១ ឈរជើងនៅភូមិសាស្ត្រឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ។ លោកអនុសេនីយ៍ទោ គុជ សុផាត បានទទួលមរណភាព នៅព្រឹកថ្ងៃទី០២ ឧសភា ២០១៥ នៅគេហដ្ឋាននៃសព ស្ថិតក្នុភូមិថ្មី ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ ដោយរោគពាធ ។
លោកស្នងការរងបានបញ្ជាក់ថា ថវិកាចំនួន៤លានរៀលនេះ គឺជាថវិការបស់សមាគមមិត្តនគរបាលជាតិកម្ពុជា ដែលសមាគមនេះគឺត្រូវបានបង្កើតឡើងដោយលោកនាយឧត្តមសេនីយ៍ អគ្គស្នងការនគរបាលជាតិ ក្នុងគោលបំណងដើម្បីជួយឧបត្ថម្ភគ្នាទៅវិញទៅមក តាំងពីថ្នាក់លើដល់ថ្នាក់ក្រោម ចំពោះគ្រួសារនគរបាលដែលមានទុក្ខធុរៈ ឬក៏មន្ត្រីនគរបាលដែលទទួលមរណភាព។ តាមលក្ខ័ន្តិកៈចំពោះមន្ត្រីនគរបាលដែលជាសមាជិករបស់សមាគមមិត្តនគរបាលជាតិកម្ពុជា ទទួលមរណភាពឧបត្ថម្ភចំនួន៤លានរៀល ភរិយា ឬស្វាមីរបស់សមាជិកទទួលមរណភាពឧបត្ថម្ភចំនួន១លានរៀល៕
ចែករំលែកព័តមាននេះ