ខេត្តមណ្ឌលគិរី ៖ បុគ្គលិកអង្គការ WWF ប្រចាំនៅកម្ពុជា សហការជាមួយមន្ត្រីជំនាញរដ្ឋបាលព្រៃឈើចំនួន៥៥នាក់ បើកយុទ្ធនាការចុះទប់ស្កាត់ និងបង្ក្រាបរយៈពេល១០ថ្ងៃ ក្នុងតំបន់ព្រៃការពារមណ្ឌលគិរី ស្ថិតក្នុងទឹកដីស្រុកកោះញែក និងស្រុកពេជ្រាដា ចាប់ពីថ្ងៃទី២៧ មេសា ដល់ថ្ងៃទី០៦ ឧសភា ដើម្បីទប់ស្តាត់ការកាប់រុករានព្រៃឈើ និងដាក់អន្ទាក់សត្វព្រៃយកទៅជួញដូរនៅក្រៅប្រទេស។
លោកសៀ រ៉ា អនុប្រធានរដ្ឋបាលព្រៃឈើបានមានប្រសាសន៍ឲ្យដឹងថា តំបន់ព្រៃការពារមណ្ឌលគិរីនេះ ប្រភេទ ព្រៃល្បោះជាប្រភេទលុប មានព្រៃពាក់កណ្តាលស្រោង និងព្រៃស្រោងដែលមានលក្ខណៈដ៏សមស្របបំផុត សម្រាប់ការរស់នៅរបស់ពពួកសត្វព្រៃគ្រប់ប្រភេទ ក្នុងនោះមានថនិកសត្វប្រមាណ៨០ប្រភេទរស់នៅ មានសត្វស្លាបប្រមាណ៣៧ប្រភេទ និងឧរង្គសត្វប្រមាណ៥០ប្រភេទ ក្នុងនោះក៏មានប្រភេទសត្វជិតផុតពូជប្រមាណ១៨ប្រភេទផងដែរ។ ម្យ៉ាងវិញទៀត តំបន់ព្រៃការពារមណ្ឌលគិរីជាតំបន់អភិរក្សដ៏មានសក្តានុពលមួយ ក្នុងចំណោមតំបន់សំខាន់ៗទាំង២០០នៅលើពិភពលោក និងជាតំបន់ដែលមានព្រៃល្បោះធំជាងគេបង្អស់នៅតំបន់អាស៊ីភាគអាគ្នេយ៍។
លោកអនុប្រធានរដ្ឋបាលព្រៃឈើបន្តទៀតថា ដោយមើលឃើញបញ្ហានេះ លោកឆេង គឹមស៊ុន ប្រតិភូរាជរដ្ឋាភិបាលទទួលបន្ទុកប្រធានរដ្ឋបាលព្រៃឈើបានប្រមូលផ្តុំមន្ត្រី ដោយប្រើប្រាស់កម្លាំងសរុបចំនួន៥៥នាក់ មកពីគ្រប់អធិការដ្ឋានរដ្ឋបាលព្រៃឈើទាំងបួន ដែលដឹកនាំក្នុងការចុះប្រតិបត្តិការតំបន់ព្រៃការពារមណ្ឌលគិរីនេះ។ គួបផ្សំនឹងអង្គការ WWF បានរៀបចំវគ្គបណ្តុះបណ្តាលលើការចុះអនុវត្តន៍ជាក់ស្តែងលើការដើរល្បាត ស្រាវជ្រាវ និងទប់ស្កាត់បទល្មើសព្រៃឈើសត្វព្រៃក្នុងតំបន់ព្រៃការពារមណ្ឌលគិរីនេះផងដែរ។ គោលបំណងការសហការជាមួយអង្គការក្នុងវគ្គបណ្តុះបណ្តាល និងចុះប្រតិបត្តិការពេលនេះ គឺ១-ដើម្បីពង្រឹងការអនុវត្តច្បាប់ព្រៃឈើ និងលិខិតបទដ្ឋានគតិយុត្តិពាក់ព័ន្ធ ២-ពង្រឹងចំណេះដឹងដល់មន្ត្រីរដ្ឋបាលព្រៃឈើលើការងារអភិរក្ស និងការបង្ក្រាបបទល្មើសឲ្យមានប្រសិទ្ធភាព និង៣-ចលនា និងផ្សព្វផ្សាយដល់ប្រជាពលរដ្ឋ និងអាជ្ញាធរគ្រប់លំដាប់ថ្នាក់ចូលរួមក្នុងការការពារព្រៃឈើ និងសត្វព្រៃ។
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ