ខេត្តមណ្ឌលគិរី ៖ មន្ត្រីយោធាម្នាក់ឈ្មោះសៅ រិទ្ធ ដែលរងការចោទបើកដៃឲ្យជនជាតិវៀតណាម៦នាក់ នាំយកត្រាក់ទ័រ និងរថយន្តបង្កុង៣គ្រឿង ចូលមកដឹកឈើចេញពីតំបន់អភិរក្សសីមាទៅប្រទេសវៀតណាម បច្ចុប្បន្នកំពុងគេចខ្លួន និងស្ថិតក្រោមចំណាត់ការរបស់តុលាការខេត្តមណ្ឌលគិរី ។
សូមរំឮកថា ជនជាតិវៀតណាមទាំង៦នាក់ ត្រូវបានចាប់ខ្លួនបន្ទាប់ពីពួកគេបានព្យាយាមចូលមកដឹកជញ្ជូនឈើ ប្រភេទសុក្រំដែលអាររំលុំ រួចប្រមាណ១០ដើម ចេញពីទឹកដីកម្ពុជា ត្រង់ចំណុចគីឡូម៉ែត្រ១៥៩ ក្នុងភូមិសាស្ត្រស្រុកកែវសីមា ខេត្តមណ្ឌលគិរី កាលពីថ្ងៃទី២៥ មីនា ២០១៥ ។ ជនជាតិវៀតណាមទាំងនោះ បាននិយាយថា ពួកគេចូលមកកាប់ឈើក្នុងទឹកដីស្រុកកែវសីមានេះបានដោយមានការបើកដៃពីមន្ត្រីយោធាម្នាក់ឈ្មោះ សៅ រិទ្ធ (ហៅ រិទ្ធជាំ) ដែលជាកូនចៅសំណប់របស់លោកទា ខូវម៉េង មេបញ្ជាការកងអនុសេនាធំទី២ ចំណុះវរៈកាពារព្រំដែនលេខ១០៣ ។ ចំណែកជនជាតិវៀតណាមទាំង៦នាក់ បច្ចុប្បន្នកំពុងត្រូវបានឃុំខ្លួននៅពន្ធនាគារខេត្តមណ្ឌលគិរី ។
ពាក់ព័ន្ធនឹងករណីនេះ នៅរសៀលថ្ងៃទី០២ ឧសភា ២០១៥ នេះ លោកទា ខៃម៉េង មេបញ្ជាការកងអនុសេនាធំទី២ អ្នកព័ត៌មានយើងបានព្យាយាមទំនាក់ទំនងតាមទូរស័ព្ទទៅលោកជាច្រើនលើក តែមិនមានការឆ្លើយតប ។ ចំណែក លោកអ៊ុំ សុវណ្ណ មេបញ្ជាការការពារព្រំដែនគោគលេខ១០៣ បានថ្លែងប្រាប់អ្នកព័ត៌មានយ៉ាងខ្លីថា លោកកំពុងជាប់ប្រជុំនៅប្រទេសវៀតណាម ។
ជុំវិញករណីនេះដែរ លោកឃិន ម៉េងស្រេង បញ្ជាការតំបន់ប្រតិបត្តិការសឹករងខេត្តមណ្ឌលគិរី បានឲ្យដឹងថា មន្ត្រីយោធាឈ្មោះសៅ រិទ្ធ រូបនេះ គឺកំពុងរត់គេចខ្លួនអស់រយៈពេលជាច្រើនថ្ងៃមកហើ យ លោកក៏កំពុងឲ្យមន្ត្រីរបស់លោកតាមស្វែងរកដែរ ។ លោកបន្តថា ប្រសិនបើមានមន្ត្រីក្រោមឱវាទរបស់លោករូបណាក៏ដោយ ដែលជាប់ពាក់ព័ន្ធជាមួយនឹងបទល្មើស លោកនឹងចាត់វិធានការតាមផ្លូវច្បាប់ ។
លោក សូ សុវិជ្ជា ព្រះរាជអាជ្ញារងអមសាលាដំបូងខេត្តមណ្ឌលគិរីបានឲ្យដឹងផងដែរថា មន្ត្រីយោធាឈ្មោះសៅ រិទ្ធ ខាងលើនេះ កំពុងស្ថិតក្រោមចំណាត់ការរបស់តុលាការ ៕
ចែករំលែកព័តមាននេះ