ប្រទេសអារ៉ាប៊ី សាអ៊ូឌីត អះអាងថា បានវាយរុញច្រានការវាយប្រហារធំលើកដំបូងមួយកាលពីថ្ងៃទី៣០ មេសា របស់ពួកឧទ្ទាមយេម៉ែន ប្រឆាំងតំបន់ព្រំដែនរបស់ខ្លួនជាប់ជាមួយប្រទេសយេម៉ែន
ប្រទេសអារ៉ាប៊ី សាអ៊ូឌីត អះអាងថា បានវាយរុញច្រានការវាយប្រហារធំលើកដំបូងមួយកាលពីថ្ងៃទី៣០ មេសា របស់ពួកឧទ្ទាមយេម៉ែន ប្រឆាំងតំបន់ព្រំដែនរបស់ខ្លួនជាប់ជាមួយប្រទេសយេម៉ែន ដែលប្រទេសនេះធ្វើការវាយប្រហារតាមអាកាសចាប់តាំងពីថ្ងៃទី២៦ មីនាមក ប្រឆាំងពួកស៊ីអីុតហ៊ូធី គាំទ្រដោយអីុរ៉ង់ ។
យោងតាមសេចក្តីប្រកាសមួយក្រសួងការពារប្រទេសអារ៉ាប៊ី សាអ៊ូឌីត និយាយថា កាលពីថ្ងៃទី៣០ មេសា កងទ័ពជើងគោករបស់យើងបានវាយរុញច្រានការវាយប្រហារមួយរបស់ពួកជីវពលហ៊ូធី នៅព្រំដែនភាគខាងត្បូង។ សេចក្តីប្រកាសបញ្ជាក់ថា ពួកហ៊ូធីគាំទ្រដោយកងទ័ពដែលនៅតែស្មោះត្រង់នឹងអតីតប្រធានាធិបតីយេម៉ែន លោកអាលីអាប់ដាល់ឡាហ៍ សាឡេហ៍ ពេលធ្វើការវាយប្រហារនោះ ។
ការវាយប្រហារនេះដែលក្រុងរីយ៉ាដចាត់ទុកថា ពុំធ្លាប់មានកើតឡើងប៉ុន្មានម៉ោងប៉ុណ្ណោះ បន្ទាប់ពីកិច្ចប្រជុំមួយរបស់ប្រមុខការទូតនៃបណ្តាប្រទេសជាសមាជិកក្រុមប្រឹក្សាកិច្ចសហប្រតិបត្តិការឈូងសមុទ្រ CCG នៅទីក្រុងរីយ៉ាដ ផ្តោតលើវិបត្តិនៅយេម៉ែន ។
ក្នុងសេចក្តីប្រកាសមួយចេញផ្សាយក្រោយកិច្ចប្រជុំនេះ រដ្ឋមន្ត្រីការបរទេសនៃបណ្តាប្រទេសជាសមាជិក CCG ដែលមានអារ៉ាប៊ី សាអ៊ូឌីត បារ៉ែន អេមីរ៉ាតអារ៉ាប់រួម គុយវ៉ែត អូម៉ង់ និងកាតា ពុំបានបិទទ្វារចំពោះការចរចាឡើយ ក៏ប៉ុន្តែបានដាក់លក្ខខណ្ឌនានា ។ រដ្ឋមន្ត្រីទាំងនេះទាមទារថា រាល់ការចរចាសម្រាប់ដំណោះស្រាយមួយនៅយេម៉ែន ត្រូវធ្វើនៅក្រុងរីយ៉ាដក្រោមការឧបត្ថម្ភរបស់ CCG ដោយបដិសេធការអំពាវនាវរបស់អីុរ៉ង់ឱ្យមានការចរចាជាអន្តរជាតិមួយក្រៅឥទ្ធិពលរបស់អារ៉ាប៊ី សាអ៊ូឌីត។
នៅលើទីលាន ការវាយប្រហារតាមអាកាស និងការប្រយុទ្ធគ្នានៅតែបន្តឥតដាច់នៅយេម៉ែន។ ពួកឧទ្ទាមជាច្រើនសិបនាក់ និងទាហានអារ៉ាប៊ី សាអ៊ូឌីត៣នាក់ស្លាប់ក្នុងការវាយប្រហារលើព្រំដែនខាងត្បូងរបស់អារ៉ាប៊ី សាអ៊ូឌីត ។
នៅភាគខាងត្បូងយេម៉ែន កងយន្តហោះរបស់ក្រុមចម្រុះអារ៉ាប់បានទម្លាក់គ្រាប់បែកយ៉ាងខ្លាំងក្លាលើបណ្តាទីតាំងរបស់ពួកឧទ្ទាមនៅក្រុងអាដេន TAEZ LAHEJ និង ABYANE។ មានមនុស្សស្លាប់៨នាក់នៅក្រុងអាដេន ក្នុងនោះមានជនស៊ីវិល៣នាក់ ៕
ចែករំលែកព័តមាននេះ