មេបញ្ជាការកងកម្លាំងអូតង់ឧត្តមសេនីយ៍ PHILIP BREEDLOVE ថ្លែងកាលពីថ្ងៃទី៣០ មេសា ក្នុងសភាអាមេរិកថា កងទ័ពរុស្ស៊ីអាចឆ្លៀតឱកាសនៃភាពធូរស្រាលនៅភាគខាងកើតអ៊ុយក្រែន ដើម្បីចាប់ផ្តើមការរៀបចំការវាយលុកខាងយោធាថ្មីមួយ ។
ឧត្តមសេនីយ៍រូបនោះនិយាយថា ទោះបីមានកិច្ចព្រមព្រៀងឈប់បាញ់គ្នាដែលចុះហត្ថលេខាកាលពីខែកុម្ភៈ នៅទីក្រុងមីនស្ក៍ ក៏កងទ័ពរុស្ស៊ីនាពេលថ្មីៗនេះខិតខំធ្វើការដាក់ពង្រាយជាថ្មី ដោយពង្រឹងការមានប្រៀបនៅលើទីលាន ។ សកម្មភាពមួយចំនួនរបស់កងទ័ពរុស្ស៊ីអាចជាការរៀបចំសម្រាប់ការវាយលុកថ្មីមួយ ។
ដោយឆ្លើយតបសំណួរនានារបស់បណ្តាសមាជិកគណៈកម្មការកងទ័ពរបស់ព្រឹទ្ធសភាឧត្តមសេនីយ៍ BREEDLOVE ទទួលស្គាល់ថា លោកពុំអាចព្យាករណ៍ឱ្យបានច្បាស់ពីការសម្រេចចិត្តនាពេលខាងមុខទាំងឡាយរបស់ក្រុងមូស្គូឡើយ ក៏បុ៉ន្តែលោកយល់ថា ចលនាកងទ័ពដែលពិនិត្យឃើញនាពេលថ្មីៗនេះហាក់ដូចជាការរៀបចំ ការហ្វឹកហ្វឺន និងការបំពាក់គ្រឿងឧបករណ៍ដើម្បីឱ្យមានសមត្ថភាពធ្វើការវាយលុកថ្មីមួយ ។
ចំណែកអង្គការសន្តិសុខ និងកិច្ចសហប្រតិបត្តិការនៅអឺរុ៉ប OSCE ទទួលបន្ទុកពិនិត្យមើលការអនុវត្តបទឈប់បាញ់គ្នាថ្លែងថា អំពើហិង្សាពិតជាមានការចុះថយច្រើនចាប់តាំងពីការចុះហត្ថលេខាលើកិច្ចព្រមព្រៀងនោះមក។ បុ៉ន្តែសម្រាប់សហរដ្ឋអាមេរិកយល់ថា រុស្ស៊ីពេលនេះនៅជិតព្រំដែនជាមួយអ៊ុយក្រែនមានកងកម្លាំងយ៉ាងច្រើនចាប់តាំងពីខែតុលា ឆ្នាំ២០១៤មក ហើយរុស្ស៊ីដាក់ពង្រាយប្រព័ន្ធការពារអាកាសបន្ថែមទៀតក្នុងចំនួនច្រើនពុំធ្លាប់មានពីមុនចាប់តាំងពីខែសីហាមក ។
ឧត្តមសេនីយ៍ BREEDLOVE យល់ថា រុស្ស៊ីខិតខំពង្រឹងការត្រួតត្រាលើកងកម្លាំងបំបែកខ្លួននៅភាគខាងកើតអ៊ុយក្រែន ។
សហរដ្ឋអាមេរិករហូតមកទល់ពេលនេះបដិសេធការផ្តល់អាវុធឱ្យអ៊ុយក្រែន ។ តែឧត្តមសេនីយ៍ BREEDLOVE យល់ថា ពុំមានការជ្រើសរើសណាមួយត្រូវបានបដិសេធជាស្ថាពរឡើយ ក៏បុ៉ន្តែពុំមានបញ្ហាឡើយចំពោះការផ្តល់ឱ្យក្រុងគៀវនូវមធ្យោបាយយោធាចាំបាច់ដើម្បីធានាជ័យជម្នះប្រឈមមុខនឹងរុស្ស៊ី ។
វិមានប្រធានាធិបតីអ៊ុយក្រែនអះអាងកាលពីថ្ងៃទី៣០ មេសាថា ប្រធានាធិបតីរុស្ស៊ីលោកវ្ល៉ាឌីមៀរពូទីន ជាលើកដំបូងព្រមទទួលយកលទ្ធភាពនៃការដាក់ពង្រាយកងកម្លាំងបេសកកម្មរក្សាសន្តិភាពមួយនៅភាគខាងកើតប្រទេស តែការប្រកាសនេះពុំទាន់មានការអះអាងដោយវិមានក្រឹមឡាំងនៅឡើយ ។
ក្រុងគៀវប្រកាសបែបនេះបន្ទាប់ពីការជួបសន្ទនាគ្នាតាមទូរស័ព្ទរវាងប្រធានាធិបតីអ៊ុយក្រែន លោកប៉េត្រូប៉ូរូ៉ឆេនកូ ប្រធានាធិបតីបារាំងលោកហ្វ្រង់ស្វ័រហូឡង់ ប្រធានាធិបតីរុស្ស៊ីលោកវ្ល៉ាឌីមៀរពូទីន និងអធិការបតីអាល្លឺម៉ង់លោកស្រីអេនហ្សឺឡាម័រកែល ផ្តោតលើជម្លោះនេះនៅមាត់ទ្វារអឺរុ៉ប ដែលបណ្តាលឱ្យមនុស្សស្លាប់ជាង៦.១០០នាក់រួចហើយរយៈពេលតែ១ឆ្នាំ ។
ក្នុងសេចក្តីប្រកាសមួយវិមានប្រធានាធិបតីអ៊ុយក្រេនថ្លែងថា ក្នុងការពិភាក្សាលើមធ្យោបាយនៃដំណោះស្រាយដោយសន្តិវិធីមួយនៃជម្លោះ ប្រធានាធិបតីរុស្ស៊ីលោកពូទីន បានយល់ស្របចំពោះលទ្ធភាពនៃការដាក់ពង្រាយកងឯកភាពរក្សាសន្តិភាពនៅតំបន់ DONBASS ភាគខាងកើតអ៊ុយក្រែន ដែលតំបន់នោះមួយផ្នែកធំកាន់កាប់ដោយពួកឧទ្ទាម ៕
ចែករំលែកព័តមាននេះ