ប្រទេសកាតានឹងទិញយន្តហោះប្រដេញបារាំងធុន Rafale 24គ្រឿង
បន្ទាប់ពីប្រទេសអេហ្ស៊ីប ដែលបានបញ្ជាទិញកាលពីខែកុម្ភៈ នូវយន្តហោះប្រដេញបារាំងធុន Rafale ២៤គ្រឿង ហើយឥណ្ឌានាខែមេសា បញ្ជាទិញយន្តហោះធុននេះដល់ទៅ៣៦គ្រឿងមក
បន្ទាប់ពីប្រទេសអេហ្ស៊ីប ដែលបានបញ្ជាទិញកាលពីខែកុម្ភៈ នូវយន្តហោះប្រដេញបារាំងធុន Rafale ២៤គ្រឿង ហើយឥណ្ឌានាខែមេសា បញ្ជាទិញយន្តហោះធុននេះដល់ទៅ៣៦គ្រឿងមក ប្រទេសកាតាបានសម្រេចទិញយន្តហោះប្រយុទ្ធនេះ២៤គ្រឿងដែរ ដែលមានទឹកប្រាក់សរុប៦,៣ពាន់លានអឺរ៉ូ ។
កុងត្រាទិញយន្តហោះ Rafale ២៤គ្រឿងនេះ អមជាមួយការជួយបណ្តុះបណ្តាលក្នុងប្រទេសបារាំងនូវអ្នកបើកយន្តហោះ៣៦នាក់ និងយន្តការី១០០នាក់ ។ ការប្រគល់យន្តហោះ Rafale ដំបូងឱ្យកាតា គ្រោងធ្វើក្នុងឆ្នាំ២០១៧ ។ ការចរចាបានត្រូវរ៉ូវគ្នាអស់ហើយ រួចកិច្ចព្រមព្រៀងមួយត្រូវចុះហត្ថលេខានាពេលខាងមុខនេះ ។
កិច្ចព្រមព្រៀងត្រូវបានសម្រេចកាលពីថ្ងៃទី២១ មេសា នៅក្រុងដូហា នាឱកាសនៃការជួបគ្នារវាងរដ្ឋមន្ត្រីការពារប្រទេសបារាំង លោក Jean Yves Le Drian និងអេមៀរ កាតា តាមីម អាល់ថានី ។
កាលពីថ្ងៃទី២៤ កុម្ភៈ ឆ្នាំ២០១៤ អេមៀរកាតា ដែលមានវ័យក្មេងអង្គនោះ ទើបឡើងគ្រងរាជ្យបន្តពីព្រះបិតា ធ្លាប់មានបន្ទូលទៅកាន់លោក Le Drian ថា ព្រះបិតាទ្រង់ធ្លាប់សន្យាទិញយន្តហោះធុននោះ រួចទើបទ្រង់សម្រេចទិញបែបនេះ ។
ប្រទេសកាតា មានយន្តហោះប្រយុទ្ធបារាំងធុន Mirage 2000 ចំនួន១២គ្រឿងរួចហើយ ។ ប្រទេសកាតា ត្រូវការយន្តហោះដែលហោះលឿនទាំងនេះ ដោយសារភាពតានតឹងក្នុងតំបន់ ៕
ចែករំលែកព័តមាននេះ