ខេត្តព្រះសីហនុ ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានបកស្រាយទាក់ទងនឹងការបំភ្លៃរឿងពិត នៅពេលសម្តេចនៅក្រៅប្រទេស ដែលមានសារព័ត៌មានមួយនិយាយថា «លោក ហ៊ុន សែន ថា សូមកុំធ្វើបាបលោក នៅពេលលោកឈប់… និងជាភាសាអង់គ្លេសមានន័យថា លោកនាយករដ្ឋមន្ត្រីទទួលស្គាល់ថា គណបក្សប្រជាជននឹងចាញ់» ។ ជាមួយនេះ ក៏បានបន្ថែមសម្តីរបស់លោក កឹម សុខា ថា បើគណបក្សសង្គ្រោះជាតិឈ្នះ គាត់អត់សងសឹកទេ CPP ត្រៀមចាញ់រហូតដល់លោកនាយករដ្ឋមន្ត្រី ហ៊ុន សែន មិនឈរឈ្មោះតទៅទៀតទេ ។ សារព័ត៌មាននោះដាក់ថា លោក សម រង្ស៊ី បង្ហាញថា ចង់ចូលរួមរដ្ឋាភិបាលចម្រុះ ។
សម្តេចតេជោនាយករដ្ឋមន្ត្រី ហ៊ុន សែន មានប្រសាសន៍បែបនេះ នាព្រឹកថ្ងៃទី២៩ មេសា នៅភូមិអន្លង់ក្រពើ ឃុំជើងគោ ស្រុកព្រៃនប់ ក្នុងឱកាសអញ្ជើញជាអធិបតីភាពដ៏ខ្ពង់ខ្ពស់ក្នុងពិធីសម្ពោធបើកឱ្យដំណើរការរោងចក្រចម្រាញ់ប្រេងដូងរបស់ក្រុមហ៊ុនសហវិនិយោគ MRT លោកបណ្ឌិត ម៉ុង ឫទ្ធី ជាមួយក្រុមហ៊ុនធីស៊ីស៊ីហ្គ្រូប នៃព្រះរាជាណាចក្រថៃ ។
សម្តេចតេជោបានបដិសេធថា ខ្ញុំអត់ត្រូវការអ្នកណាធ្វើជាដៃគូជាមួយរដ្ឋាភិបាលចម្រុះទេ និយាយគ្នាត្រង់ៗ គ្រប់គ្រាន់ហើយសំឡេងអនុម័ត (៦៨កៅអី) ។ ខ្ញុំបានប្រាប់លោក សម រង្ស៊ី ថា ពង្រឹងការទទួលខុសត្រូវដោយយកវប្បធម៌សន្ទនាជាគោល ។ សម្តីរបស់លោក និងលោក កឹម សុខា នៅឯកំពង់ឆ្នាំង គឺមិនល្អទេ នៅប្រើពាក្យគំរាមផ្តាច់ការនៅឡើយ ។ ចំណុចនេះត្រូវចាំ សូមចាក់ស្តាប់ឡើងវិញនូវសម្តីរបស់ ហ៊ុន សែន កាលពីអង្គរសង្ក្រាន្តថា ក្រុមបាល់ទាត់ទាំង១១នាក់មិនអាចទាត់តែ៩នាក់ ទុក២នាក់ទាត់ផ្តួលជើងទេ ។
ខ្ញុំចង់សំដៅផ្ញើសារទៅលោក សម រង្ស៊ី ហើយសូមឱ្យគាត់ជ្រើសរើសយកវប្បធម៌សន្ទនា ឬត្រូវប្រឈមមុខដាក់គ្នា អរិភាពដាក់គ្នា ។ ប៉ុន្តែតាមលោក សម រង្ស៊ី និងភរិយាគាត់ ប្តូរផ្តាច់ណាស់ជាមួយខ្ញុំនូវវប្បធម៌សន្ទនា ។ អ្វីដែលខ្ញុំកត់សម្គាល់ បញ្ចប់ទៅនូវនយោបាយទឹកឡើងត្រីស៊ីស្រមោច ទឹកហោចស្រមោចស៊ីត្រី ដែលរឿងនេះបានកើតឡើងច្រំដែលក្នុងប្រវត្តិសាស្ត្ររបស់កម្ពុជា ។
សម្តេចតេជោបញ្ជាក់ថា ពេលដែលខ្ញុំនៅកាន់អំណាច អ្នកណាក៏នៅជាមួយបានទាំងអស់។ កាលពីថ្ងៃទី៩ មេសា ទៅប្រជុំសភា ខ្ញុំចាប់ដៃ កឹម សុខា រួចគាត់មកចាប់ដៃខ្ញុំ ខ្ញុំសួរ មើលលោកនិយាយថា ត្រូវតែចុះ បើមិនចុះដាក់ជណ្តើរឱ្យចុះ បើដាក់ជណ្តើរឱ្យមិនចុះទេ អង្រន់ឱ្យចុះ ។ តើលោកចង់និយាយថាម៉េច? កឹម សុខា ឆ្លើយថា ខ្ញុំតែងបិទកន្ទុយជានិច្ច ពាក្យអហិង្សា ។
សម្តេចបន្តថា អង្រន់ឱ្យគេចុះហ្នឹងអហិង្សាឬ? អាហ្នឹងគ្រាន់តែជារបៀបដោះសារបស់លោកទេ ។ សំណាងហើយលោក ដែលលោកមិនធ្វើ បើលោកធ្វើ ពេលនេះជាបុណ្យខួបខ្មោចលោកទេ ។ លោកកុំភ្លេចថ្ងៃក្រោយណា គេវ៉ៃពស់ គេអត់វ៉ៃខ្នង កន្ទុយទេ គេវ៉ៃក្បាល ថ្ងៃក្រោយបើមានការអ្វី គេទៅវ៉ៃដល់ផ្ទះ ។
សម្តេចមានប្រសាសន៍ថា រឿងអ្វីទុកឱ្យអ្នកឯងមកផ្តួលរាជរដ្ឋាភិបាលស្របច្បាប់លេងៗ ។ ខ្ញុំជួបនាយករដ្ឋមន្ត្រីប្រទេសអេហ្ស៊ីប គេលេងអស់រាប់ពាន់នាក់ ឥឡូវគេកាត់ទោសប្រធានាធិបតីដែលគេទម្លាក់ ក្នុងមួយករណីជាប់គុក២០ឆ្នាំ កាត់ទោសប្រហារជីវិតអ្នកធ្វើបាតុកម្មមិនតិចទេ ។ ម៉េចក៏អេហ្ស៊ីបធ្វើបាន កម្ពុជាធ្វើមិនកើត។ កុំភ័ន្តច្រឡំ កម្លាំងប្រដាប់អាវុធគ្មានទេ ពាក្យអព្យាក្រឹត ចំពោះមុខរវាងម្ខាងរាជរដ្ឋាភិបាល និងម្ខាងបក្ស គឺអត់ទេ ។ អព្យាក្រឹតរវាងបក្សនយោបាយ អព្យាក្រឹតនិងបក្សនយោបាយបានហើយ ប៉ុន្តែរវាងម្ខាងរាជរដ្ឋាភិបាល ឯម្ខាងទៀតបក្សនយោបាយ គឺអត់មានអព្យាក្រឹតទេ ត្រូវការពាររដ្ឋធម្មនុញ្ញ ការពាររាជរដ្ឋាភិបាល រឿងមានតែប៉ុណ្ណឹង ។
ពាក់ព័ន្ធនឹងអ្នកសរសេរ សម្តេចតេជោនាយករដ្ឋមន្ត្រីបានរំលឹកថា ក្មួយៗ តើមានការខ្មាសអៀន មានវិជ្ជាជីវៈឬអត់ មានការទទួលខុសត្រូវក្នុងវិជ្ជាជីវៈឬអត់ ?
បើ ហ៊ុន សែន និយាយកោកៗដូច្នេះ គេចាក់ទាំងស្រុងរួចខ្លួន ឯងសរសេរផ្ទុយពីនេះ តើខ្មាសអៀនទេ ហើយអ្នកនយោបាយដែលយកពីសម្តីដែលសរសេរផ្ទុយពីនេះ តើខ្មាសអៀនទេ។ ដោយសារអ្នកសរសេរខុស ។ ប្អូនៗ ក្មួយៗល្មមៗបានហើយ សេរីភាពសារព័ត៌មាន… ។
ថ្ងៃនេះ ខ្ញុំជូនសារថែមទៀត កុំឱ្យសង្ស័យយូរពេកថា លោក ហ៊ុន សែន មិនឈរឈ្មោះទេ មានរឿងដូច្នេះចុងខែមករា ដើមខែកុម្ភៈ ឆ្នាំ២០១៥ គណបក្សប្រជាជនធ្វើមហាសន្និបាត គណបក្សប្រជាជនអត់មានដាក់ក្នុងសេចក្តីសម្រេចលើបញ្ហាបេក្ខភាពនាយករដ្ឋមន្ត្រីទេ ។ តើមូលហេតុអ្វីគណបក្សប្រជាជនមិនដាក់បេក្ខភាពនាយករដ្ឋមន្ត្រី មូលហេតុក្នុងកិច្ចពិភាក្សា ខ្ញុំជាប្រធានមហាសន្និបាតដឹកនាំការប្រជុំ មានការលើកឡើងការគាំទ្រដំណើរការអាណត្តិខាងមុខ។ ខ្ញុំបានស្នើសុំថា កុំលើកមកនិយាយ ព្រោះចង់ស្តាប់រឿងផ្សេងទៀត ។ ព្រោះរឿងបេក្ខភាពនាយករដ្ឋមន្ត្រី ជារឿងមានស្រេចទៅហើយ ដោយការសម្រេចចិត្តពីពេលមុន និងសេចក្តីថ្លែងការណ៍របស់សម្តេច ជា ស៊ីម សម្តេច ហេង សំរិន តែងបានប្រកាសថា គាំទ្រសម្តេច ហ៊ុន សែន ជាបេក្ខភាពនាយករដ្ឋមន្ត្រីនៅអាណត្តិទី៥ និងអាណត្តិបន្តបន្ទាប់ ស្តាប់ឱ្យវាច្បាស់ ដូច្នេះអាណត្តិទី៥ ក៏ ហ៊ុន សែន ធ្វើនាយករដ្ឋមន្ត្រី អាណត្តិទី៦ ក៏ ហ៊ុន សែន ធ្វើនាយករដ្ឋមន្ត្រីទៀត គណបក្សប្រជាជននឹងឈ្នះទៀត ព្រោះឈ្នះទៅបានសេចក្តីសុខទាំងអស់គ្នា អីុចឹង គឺវាមិនបានរត់ មិនបានលូន ។
សម្តេចតេជោបញ្ជាក់ថា អាណត្តិទី៦ នៅតែ ហ៊ុន សែន អត់មានអ្នកណាមកជំនួសទេ ។ គណបក្សប្រជាជនរួមរស់ជាមួយគ្នាបាន៣៦ឆ្នាំហើយ នៅក្នុងអំណាចគេចេះសាមគ្គីគ្នាណាស់ គេមិនទៅដណ្តើមគ្នា ។
សម្តេចតេជោនាយករដ្ឋមន្ត្រីផ្តាំទៅលោក សម រង្ស៊ី ថា ខ្ញុំនឹងរាំតាមចង្វាក់ភ្លេង បើអ្នក Slow ខ្ញុំក៏ Slow អ្នកឯងម៉ាឌីហ្សុន ខ្ញុំក៏ម៉ាឌីហ្សុន អ្នកឯងចង់ក្បាច់ ខ្ញុំក៏ក្បាច់ រាំវង់ ក៏រាំវង់ សារ៉ាវ៉ាន់ ក៏សារ៉ាវ៉ាន់ បើចង់អាឌុងៗលោតក៏តាមដំណើរ ជូនតាមសំណើទាំងអស់ ។
សម្តេចមានប្រសាសន៍ថា ខ្ញុំត្រូវការវប្បធម៌សន្ទនានេះជាមួយលោក សម រង្ស៊ី ខ្ញុំបានគាំទ្ររឿងនេះ ហើយគណបក្សប្រជាជនបានចេញសារាចរណែនាំទៅមូលដ្ឋានអស់ហើយ ប៉ុន្តែសង្គ្រោះជាតិបានចេញហើយឬនៅ ? ណែនាំផ្លូវការហើយឬនៅ ?
ខ្ញុំបានផ្តល់ឱ្យនៅមុខថា ត្រូវទាត់១១នាក់ កុំទុក២នាក់សម្រាប់ទាត់ជើងគេ មានន័យថា «កុំទុក កឹម សុខា ទាត់ជើងខ្ញុំ» ។ អ្នកនយោបាយត្រូវចេះធ្វើវិភាគ អត់លេងសើចទេ ។ ខ្ញុំចង់បង្ហាញពីវប្បធម៌សន្ទនា ឯប្រជាធិបតេយ្យមិនមែនដល់ថ្នាក់ជេរគ្នាថា ប្រជាធិបតេយ្យទេ មិនមែនបានមកពីភាពប្រទូស្តរ៉ាយ ឬអរិភាព ទើបហៅថាប្រជាធិបតេយ្យទេ ។ វិធីសន្ទនាគ្នាដើម្បីរកឱ្យឃើញនូវការរីកចម្រើនរួមសម្រាប់ប្រទេសជាតិ ទើបជាការត្រឹមត្រូវជាង ។
ខ្ញុំបានប្រាប់លោក សម រង្ស៊ី ថា ខាងCPP អត់មានការលំបាកទេ វាលំបាកតែខាងសង្គ្រោះជាតិ គណបក្សប្រជាជនគេមានកុងសង់ស៊ីសរបស់គេ ហើយកុំរង់ចាំទទួលផលពីការបែកបាក់របស់ CPP ឱ្យសោះ ។ ខ្ញុំប្រាប់ឱ្យដឹងផង ក្នុងករណីសម្ដេច ជា ស៊ឹម មិនអាចធ្វើការបានក៏ប៉ុន្តែគាត់នៅជាប្រធានគណបក្សប្រជាជន និងនៅជាប្រធានព្រឹទ្ធសភាជារៀងរហូត ។ ក្នុងករណីដែលមរណភាព អ្នកដែលធ្វើជាប្រធានគឺ ហ៊ុន សែន ។ អ្នកដែលធ្វើជាប្រធានព្រឹទ្ធសភា ខាងគណបក្សប្រជាជនអត់ចេះខាំគ្នាដណ្ដើមអំណាចទេ ហើយក៏មិនចេះធ្វើបាតុកម្មដេញគ្នាដែរ ។ ស្គាល់គណបក្សប្រជាជនឱ្យច្បាស់ទើបល្អ កុំរង់ចាំការបែកបាក់របស់គណបក្សប្រជាជន ហើយខ្ញុំគ្មានទម្លាប់រត់ចោលប្រជាជន ខ្ញុំគ្មានទម្លាប់រត់ចោលបក្ស ដូរបក្សពីកន្លែងមួយទៅកន្លែងមួយទេ ស្លាប់មិនដូរឈ្មោះ រស់មិនដូរត្រកូល ត្រកូល ហ៊ុន សែន នៅក្នុងគណបក្សប្រជាជនរហូត ខ្ញុំមិនអាចទុកចោលប្រជាពលរដ្ឋ ខ្វះការទទួលខុសត្រូវទេ ។
សម្ដេចរិះគន់ថា មិនទាន់បានអ្វីផង សុទ្ធតែឱ្យតំណែងស្នងការ ស្នងការរង អធិការ ប៉ូលិសប៉ុស្ដិ៍ទូទាំងប្រទេស ឥឡូវហ៊ានសាកល្បងមើលអំណាចរដ្ឋណា រដ្ឋអត់មានឱ្យបង្កើតរដ្ឋក្នុងរដ្ឋទេ កុំលេង… ប៉ុន្តែល្អបំផុត គឺត្រូវរ៉ូវគ្នា ត្រូវរ៉ូវគ្នា ហ៊ុន សែន-សម រង្សុី វាមិនគ្រប់ទេ គឺត្រូវការមនុស្សទាំងអស់ ។ សូមអប់រំផ្ទៃក្នុងបក្សឱ្យបាន ៕
ចែករំលែកព័តមាននេះ