រាជធានីភ្នំពេញ ៖ លោកសាវីន ហ្វីលីព តែងតែព្យាយាមស្វែងរកជំនួយមនុស្សធម៌ជួយអ្នកទីទ័លក្រ និងជីកអណ្តូងទឹកស្អាតជូនអ្នកភូមិជនបទ ។ ថ្មីៗនេះលោកហ្វីលីព និងសិល្បករមួយ
រាជធានីភ្នំពេញ ៖ លោកសាវីន ហ្វីលីព តែងតែព្យាយាមស្វែងរកជំនួយមនុស្សធម៌ជួយអ្នកទីទ័លក្រ និងជីកអណ្តូងទឹកស្អាតជូនអ្នកភូមិជនបទ ។ ថ្មីៗនេះលោកហ្វីលីព និងសិល្បករមួយចំនួនបានជួយកុមារីម្នាក់នៅភ្នំឧដុង្គដែលម្តាយជាអ្នកសុំទាន ក្រោយពីជួបគ្រោះថ្នាក់ចរាចរ ។ តាមរយៈជំនួយនោះ កុមារី និងម្តាយបានស្បើយពីទុក្ខលំបាកខ្លះ ចំណែកលោកសាវីន ហ្វីលីព និងអ្នកសិល្បៈមួយចំនួនទៀតតាំងចិត្តបន្តជួយដើម្បីឱ្យមានទីជម្រកដូចគេឯង ។
លោកសាវីន ហ្វីលីព ដែលបង្កើតមូលនិធិជួយដល់កុមាររងគ្រោះក៏ដូចជាចាស់ជរាឱ្យដឹងកាលពីពេល ថ្មីៗនេះថា កាលពី៦ខែមុនក្មេងស្រី ឈ្មោះស្រីម៉ុច ត្រូវរថយន្តកៀរ ហើយម្តាយនាំទៅព្យាបាលនៅមន្ទីរពេទ្យគន្ធបុប្ផា ។ ក្រោយពេលម្តាយ និងកូនស្រីត្រឡប់ទៅផ្ទះវិញ គ្រូពេទ្យប្រាប់ឱ្យទៅលាងរបួសជារៀងរាល់ខែ ខណៈជើងនាងអបដែក ។ ទោះជាយា៉ងណាក្តី ម្តាយអត់មានលុយនាំកូនពីភ្នំឧដុង្គទៅភ្នំពេញទេ ព្រោះជាអ្នកសុំទាន ។
នៅឧដុង្គម្តាយនិងកូនស្រីនោះគ្មានកន្លែងដេកពួនទេ គឺដេកតែនៅលើគ្រែលក់ដូររបស់អ្នកស្រុកប៉ុណ្ណោះ ។ ម្យា៉ងទៀតបូកផ្សំអ្នកជិតខាងហាមមិនឱ្យទៅពេទ្យផងនោះ ធ្វើឱ្យដំបៅនៅលើភ្លៅក្មេងស្រីនោះមានមេរោគឆ្លងកាន់តែ ជ្រៅទៅៗ ។
មាននារីម្នាក់បានឃើញក្មេងស្រីនោះ ហើយមានក្តីអាណិតអាសូរក៏ថតរូបបង្ហោះនៅលើទំព័រហ្វេសប៊ុក ។ បន្ទាប់មកតារាចម្រៀងលី អីុវា៉ធីណា បានឃើញក៏ផុសរូបនោះនៅលើហ្វេសប៊ុកបន្ត ។ ដោយអត់មានអ្នកណាជួយ កញ្ញាធីណាបានទូរស័ព្ទទៅលោកហ្វីលីពឱ្យជួយ ។
លោកហ្វីលីព បានខ្នះខ្នែងរកអ្នកជួយតាំងពីមុនរហូតមកដល់ពេលនេះ បានជាង១ពាន់ដុល្លារក្នុងនោះមានចំណែករបស់មូលនិធិ «កុមារសាវីនកម្ពុជា», ប្រាក់របស់ក្រុមកញ្ញាលី អីុវា៉ធីណា និងប្រាក់របស់ក្រុមអ្នកនាងម៉ៅ ស៊ីណាត មួយចំនួនទៀត ។
លោកហ្វីលីព ឱ្យដឹងថា ទន្ទឹមជួយព្យាបាលក្មេងស្រីនោះ គឺបានគិតគូរជួយសង់ផ្ទះជូនស្ត្រីជាម្តាយដោយគាត់មានដីខ្លះនៅខេត្តព្រៃវែង ស្រុកកំណើតរបស់គាត់ ។ រឿងនេះលោកហ្វីលីពបាននិយាយជាមួយអង្គការមួយជាដៃគូ ហើយបានឯកភាពជួយសាងសង់ផ្ទះឱ្យស្ត្រីសុំទាននោះ។ លើសពីនោះ លោកហ្វីលីព ចង់យក កូនៗរបស់ស្ត្រីរូបនោះទៅដាក់នៅអង្គការមួយដែលលោកស្គាល់ ព្រោះចង់ឱ្យក្មេងមានចំណេះដឹងពេលធំឡើង ។
មូលនិធិរបស់លោកសាវីន ហ្វីលីព ជាមូលនិធិរបស់អង្គការសុបិនកុមាររបស់កម្ពុជា ដែលបានចុះបញ្ជីនៅក្រសួងមហាផ្ទៃ ។ មូលនិធិនេះធ្វើការជាមួយដៃគូមានអង្គការបារាំង និងអាមេរិកជាដើម ។ រហូតមកទល់ពេលនេះ លោកហ្វីលីព និងក្រុមការងារសង់អណ្តូងទឹកបានចំនួន១០០ ក្នុងនោះនៅខេត្តតាកែវ៣៥ និងនៅសៀមរាប៦៥អណ្តូង ។ ក្រៅពីនេះជូនសម្ភារដល់សាលារៀនដូចជាតុ កៅអី ដោយផ្តោតសំខាន់ទៅលើកុមារតាមសហគមន៍ ។ ចំណែកលោកខៃ ប្រសិដ្ឋ បានជួយដែរក្នុងមូលនិធិនេះ ដោយជួយពីអូស្ត្រាលីមកដូចជាអណ្តូងទឹកជាដើម ។
ម្តាយក្មេងស្រីរងគ្រោះដោយរថយន្តកៀរនោះបានថ្លែងអំណរគុណចំពោះលោកសាវីន ហ្វីលីព និងអ្នកសិល្បៈជាច្រើននាក់ទៀតដែលបានជួយកូនស្រីរបស់គាត់ ៕
ចែករំលែកព័តមាននេះ