ខេត្តបន្ទាយមានជ័យ ៖ អ្នកព័ត៌មានកោះសន្តិភាព និងអ្នកយកព័ត៌មានទូរទស្សប៉ុស្តិ៍លេខ៥ប្រចាំខេត្តបន្ទាយមានជ័យ២រូប ត្រូវក្រុមយោធាសឹករងស្រុកម៉ាឡៃប៉ុស្តិ៍បន្ទាយទី០១ បិទទ្វារនិងគំរាមកំហែង ព្រមទាំងបញ្ជាឱ្យលុបរូបភាពច្រង៉េងច្រង៉ាងរបស់ពួកគេកាលពីវេលាម៉ោងជាង១០ព្រឹកថ្ងៃទី២៧ មេសា ២០១៥ ខណៈពួកគេចុះទៅយកព័ត៌មានពាក់ព័ន្ធរឿងតម្រួតថៃបំផ្ទុះអាវុធ៣គ្រាប់ ចាប់ខ្លួនពលករខ្មែរ៣នាក់ ក្រោយពីឆ្លងដែនខុសច្បាប់តាមច្រករបៀងក្នុងភូមិកើតហេតុខាងលើ ។
ប្រភពពីកន្លែងកើតហេតុថា ដំបូងអ្នកយកព័ត៏មានបានចុះទៅដល់ ប៉ុន្តែមាត់ច្រករបៀង (ចំណុចប៉ុស្តិ៍យោធាចាស់) ពុំឃើញមានយោធាណាម្នាក់នៅទីនោះទេ ហើយបរិវេណដីដ៏ធំចំណុចកើតហេតុនោះ មានបិទបាំងដោយស័ង្កសី ។ ដោយពុំមានឃើញអ្វីនៅទីតាំងប៉ុស្តិ៍យោធាចាស់ អ្នកយកព័ត៏មានក៏បានបត់រថយន្តត្រឡប់ចេញមកវិញ បែរជាត្រូវក្រុមយោធានៅទីនោះ ដែលមានមេប៉ុស្តិ៍ឈ្មោះវី វណ្ណៈ ហៅទិន និងកូនចៅទាញទ្វារស័ង្កសីបិទ មិនឱ្យរថយន្តចេញពីចំណុចកើតហេតុ ដោយគេថា ការឆ្លងកាត់របស់អ្នកយកព័ត៏មានទៅដល់មាត់អូរព្រំដែនចំណុចប៉ុស្តិ៍របស់គេមិនបានប្រាប់មុន ។
នៅពេលដែលអ្នកយកព័ត៌មាននិយាយពីប៉ុស្តិ៍ចាស់ថា ធ្លាប់ជួបគ្នានៅឯមាត់អូរព្រំដែន ក្រុមយោធានិយាយថា ចំណុចប៉ុស្តិ៍ចាស់នោះ ជាដីរបស់លោកឧត្តមសេនីយ៍ផ្កាយ៤ម្នាក់ ឈ្មោះសុខ ភាព គេឈប់ឱ្យពួកខ្លួនដាក់ប៉ុស្តិ៍នៅទីនោះហើយ ទើបនាំគ្នាមកដាក់ប៉ុស្តិ៍នៅចំណុចផ្ទះប្រជាពលរដ្ឋក្បែរដងផ្លូវវិញ ។ ពេលដែលអ្នកយកព័ត៌មានថតយករូបភាពក្រុមយោធាបិទទ្វាររបងមិនឱ្យរថយន្តរបស់ទូរទស្សប៉ុស្តិ៍លេខ៥ចេញពីកន្លែងកើតហេតុទេ ហើយក្រុមយោធាទាំងនោះ បានបញ្ចេញអាកប្បកិរិយាច្រង៉េងច្រង៉ាងគំរាមកំហែងដេញតាមយកទូរស័ព្ទ និងកាមេរ៉ារបស់អ្នកយកព័ត៌មាន ដោយពួកគេថា បើចង់យករថយន្តចេញពីកន្លែងកើតហេតុ ត្រូវតែលុបរូបភាពដែលថតទាំងអស់នោះចេញសិន ។
ប្រភពបានបន្តថា នៅពេលបញ្ហាកំពុងកើតមានលោកវី វណ្ណៈ មេប៉ុស្តិ៍យោធាបានទូរស័ព្ទទៅហៅមេរបស់គេ គឺលោកអ៊ុក ដារ៉ាន់ ជាមេគប្រចាំទិសស្រុកម៉ាឡៃនោះឱ្យទៅកន្លែងកើតហេតុ ។ រឿងរ៉ាវបិទទ្វារបង្កើតជម្លោះជាមួយអ្នកយកព័ត៌មាននេះ បានក្លាយជារឿងគំនុំជាមួយអ្នកយកព័ត៌មានឱ្យទូរទស្សប៉ុស្តិ៍លេខ៥ទៅវិញ ដោយលោកអ៊ុក ដារ៉ាន់ នៅពេលចុះពីរថយន្តនៅកន្លែងកើតហេតុ ប្រើសម្ដីរបៀបខឹងសម្បារដោយនិយាយថា ចង់ជួបមុខប៉ុស្តិ៍លេខ៥យូរហើយផ្សាយលោកថា រកស៊ីឈើគ្រញូង, នាំម៉ូតូគេចពន្ធ និង
ហ្គាសគេចពន្ធពីថៃ ។
ទោះជាយ៉ាងណា លោកកែ វុទ្ធី អ្នកយកព័ត៌មានឱ្យទូរទស្សប៉ុស្តិ៍លេខ៥ប្រចាំខេត្តបន្ទាយមានជ័យនិយាយថា ការចុះផ្សាយកន្លងមក លោកមិនបានផ្សាយថា លោកអ៊ុក ដារ៉ាន់ ជាអ្នករកស៊ីឈើគ្រញូង និងនាំហ្គាសគេចពន្ធពីថៃទេ ដោយគ្រាន់តែផ្សាយថា ឈើលេខ២ គេនៅចេញពីកម្ពុជា ទៅលក់ឱ្យថៃ តាមច្រករបៀង ស្រុកម៉ាឡៃ ដែលគ្រប់គ្រងដោយយោធាសឹករងស្រុកម៉ាឡៃ តែប៉ុណ្ណោះ ។
ក្រោយពីមានការបកស្រាយពីអ្នកយកព័ត៌មានខាងលើ ក្រុមយោធាហាក់បញ្ឈប់សកម្មភាពច្រង៉េងច្រង៉ាងតទៅទៀត ប៉ុន្តែបានគំរាមឱ្យអ្នកយកព័ត៏មានទាំង២នាក់ លុបរូបភាពរបស់ពួកគេចោល ទើបគេឱ្យរថយន្តចាកចេញពីកន្លែងកើតហេតុ ។
គួរបញ្ជាក់ថា ករណីផ្ទុះអាវុធពីសំណាក់តម្រួតថៃ៣គ្រាប់ និងចាប់ខ្លួនពលករខ្មែរចំនួន៣នាក់ កាលពីវេលាទៀបភ្លឺកាលពីថ្ងៃទី២៥ មេសា ២០១៥ ដែលអ្នកយកព័ត៌មានចុះស្រាវជ្រាវនោះ ត្រូវបានលោកអែម សុខា អភិបាលស្រុកម៉ាឡៃ ប្រាប់ថា នៅលើស្ពានព្រំដែនច្រកទ្វារ តំបន់ម៉ាឡៃ កាលពីវេលាម៉ោង២រសៀលថ្ងៃទី២៧ មេសា នេះ មុនពេលលោកចេញពីកម្ពុជាទៅចូលរួមប្រជុំមួយជាមួយភាគីថៃនៅច្រកណងព្រឺ ស្រុកអារញ្ញ ខេត្តស្រះកែវ ឈមទឹកដីកម្ពុជាច្រកតំបន់ម៉ាឡៃថា ករណីថៃបំផ្ទុះអាវុធ និងចាប់ខ្លួនពលករខ្មែរនោះពិតជាមានមែន ប៉ុន្តែអភិបាលរូបនេះប្រាប់ថា ពលករដែលភាគីថៃចាប់ខ្លួននោះ ត្រូវបានគេដោះលែងវិញហើយ ដោយបញ្ជូនតាមរថយន្តទ្រុងទៅកម្ពុជា តាមច្រកទ្វារអន្តរជាតិប៉ោយប៉ែតតាំងពីថ្ងៃកើតហេតុ ។
ចែករំលែកព័តមាននេះ