ឆ័យ លីដាឡែន ថា មិនមានស្នេហាជាមួយអេឡិច ច័ន្ទត្រាទេ
ដោយ ៖ សាម៉ន
ថ្ងៃចន្ទ ទី៦ ខែកញ្ញា ឆ្នាំ២០១០ ម៉ោង ១៥:៤៤
កោះសន្តិភាព
កញ្ញាឆ័យ លីដាឡែន និងលោកអេឡិច ច័ន្ទត្រា
រាជធានីភ្នំពេញ ៖ កញ្ញាឆ័យ លីដាឡែន ក្នុងវ័យ២៧ឆ្នាំ អះអាងថា នាងមិនមានជាប់ពាក់ព័ន្ធស្នេហាជាមួយលោកអេឡិច ច័ន្ទត្រា ទេ ទោះបីជាមហាជនមើលឃើញពួកនាងទៅណាមកណាបណ្តើរគ្នាល្អូកល្អិនក៏ដោយ ។ ជាពិសេសនៅពេលកញ្ញាឆ័យ លីដាឡែន ឡើងច្រៀងលើឆាកប្រគំតន្ត្រីតាមស្ថានីយទូរទស្សន៍នានា ក្នុងឆ្នាំ២០១០ នេះ នាងតែងជ្រើសរើសលោកអេឡិច ច័ន្ទត្រា មកច្រៀង និងសម្តែងជាមួយតាមអត្ថន័យស្នេហាបែកបាក់ និងស្នេហាប្រកៀកប្រកើយគ្នាដូចជាបទ«ហេតុផលត្រូវបែក» បទ «បើសិនជាអ្នកព្រមស្រឡាញ់ខ្ញុំ» និងបទ “I hat My Self” ជាដើម ។
ទោះបីជាយ៉ាងណាក្តី នៅពេលភ្នាក់ងារកោះសន្តិភាពជួបសំភាសន៍នាងតាមទូរស័ព្ទនាងបដិសេធថា នាងគ្មានជាប់ពាក់ព័ន្ធស្នេហាជាមួយលោកអេឡិច ច័ន្ទត្រា ទេ ការទៅណាមកណាជាមួយគ្នានោះគ្រាន់តែរាប់អានគ្នាជាមិត្តភក្តិរួមអាជីពប៉ុណ្ណោះ ឯរឿងស្នេហាគ្មានទេ ។
កញ្ញាឆ័យ លីដាឡែន បានចូលប្រឡូកក្នុងពិភពសិល្បៈចំរៀង នៅឆ្នាំ១៩៩៩ ដោយច្រៀងនៅតាមរោងការ និងរង្គសាល នៅស្រុកកំណើតរបស់នាងខេត្តបាត់ដំបង ។ ដោយចង់មានកេរ្តិ៍ឈ្មោះល្បីនៅឆ្នាំ២០០២ នាងបានមកចាប់អាជីពជាអ្នកចំរៀង និងសំដែងកាយវិការខារ៉ាអូខេនៅរាជធានីភ្នំពេញ ។ នៅឆ្នាំ២០០៦ ក្រោយពីនាងចូលជាសមាជិកក្នុងផលិតកម្មរៃមាស នាងមានឱកាសថតសម្លេងចូលស៊ីឌីបានជាច្រើនបទ ហើយបទចុងក្រោយនាឆ្នាំ២០១០ នេះគឺបទ «យេយេបែបអូន» បទ «បងរាំនឹងអូន» បទ«ប្រុសចិត្តព្រាន»និងបទ «យុវវ័យសម័យថ្មី» ជាដើម ។
កញ្ញាឆ័យ លីដាឡែន ធ្លាប់ចូលរួមសំដែងក្នុងខ្សែភាពយន្តមួយចំនួនដែរ ។ លើសពីនេះ កន្លងមកនាងធ្លាប់មានឱកាសចេញទៅច្រៀងនៅប្រទេសបារាំង និងអូស្រ្តាលី ហើយពេលនេះកំពុងតែត្រៀមចេញទៅច្រៀងនៅក្រៅប្រទេសទៀត ។ កញ្ញាឆ័យ លីដាឡែន អះអាងថា នាងគ្មានជាប់ពាក់ព័ន្ធស្នេហាជាមួយបុរសណាម្នាក់ទេ គឺសព្វថ្ងៃនេះបេះដូងនាងនៅទំនេរស្អាត ៕
