ខេត្តកំពត ៖ ប្រភពបានឱ្យដឹងថា ដីឡូត៍មួយកន្លែងក្បែរឆ្នេរព្រែកកំពង់បាយ ស្ថិតនៅទល់មុខខណ្ឌរដ្ឋបាលព្រៃឈើកំពត ក្នុងភូមិទ្វីខាងជើង សង្កាត់អណ្តូងខ្មែរ ក្រុងកំពត ដែលមជ្ឈដ្ឋានទូទៅគេដឹងថា ជាដីរដ្ឋដែលកន្លងមក ត្រូវអាជ្ញាធរខេត្តបានឯកភាពអនុញ្ញាត
ខេត្តកំពត ៖ ប្រភពបានឱ្យដឹងថា ដីឡូត៍មួយកន្លែងក្បែរឆ្នេរព្រែកកំពង់បាយ ស្ថិតនៅទល់មុខខណ្ឌរដ្ឋបាលព្រៃឈើកំពត ក្នុងភូមិទ្វីខាងជើង សង្កាត់អណ្តូងខ្មែរ ក្រុងកំពត ដែលមជ្ឈដ្ឋានទូទៅគេដឹងថា ជាដីរដ្ឋដែលកន្លងមក ត្រូវអាជ្ញាធរខេត្តបានឯកភាពអនុញ្ញាតឱ្យខ្ចីដីខាងលើនេះ សម្រាប់សាងសង់ទីបញ្ជាការកងរាជអាវុធហត្ថក្រុង ពីព្រោះពុំទាន់មានទីបញ្ជាការសម្រាប់ធ្វើការឱ្យបានត្រឹមត្រូវនោះទេ និយាយរួមនាពេលកន្លងមក គឺធ្វើការនៅផ្ទះជួលតែម្តង ។
ប្រភពឱ្យដឹងទៀតថា ក្រោយពីអាជ្ញាធរខេត្តបានឯកភាពសម្រេចឱ្យយកដីមួយកន្លែងខាងលើ សម្រាប់សាងសង់ទីបញ្ជាការកងរាជអាវុធហត្ថក្រុងនាពេលកន្លងមកនោះ គេពុំឃើញសាងសង់អ្វីក្រៅពីសង់បានតែរបងថ្ម៣ជ្រុងហ៊ុមព័ទ្ធដីនោះទេ ជាច្រើនឆ្នាំមកហើយ ។
ប្រភពដដែលឱ្យដឹងថា ស្រាប់តែកាលពីរសៀលថ្ងៃទី២៦ មេសា ២០១៥ គេឃើញលោកទេព វណ្ណា មេបញ្ជាការកងរាជអាវុធហត្ថខេត្តបានបញ្ជាកូនចៅក្រោមឱវាទ និងកូនប្រុសរបស់លោកផ្ទាល់ផងដែរ ឱ្យចូលមកវាស់វែងដីនេះជាពីរ (ពាក់កណ្តាល) រួចយកបង្គោលដាច្រើនដើម មកដាំចំពាក់កណ្តាលដី មិនដឹងជាលោកមានបំណងចង់យកធ្វើជាកម្មសិទ្ធិផ្តាច់មុខដីរបស់រដ្ឋ ឬចង់សាងសង់អ្វីមួយនៅលើដីកម្មសិទ្ធិរបស់រដ្ឋនោះទេ ។
ជុំវិញបញ្ហាចម្ងល់ និងមតិរិះគន់ពីមជ្ឈដ្ឋានខាងលើនេះ កោះសន្តិភាពបានភ្ជាប់ទូរស័ព្ទទៅលោកខូយ ឃុនហ៊ួរ អភិបាលនៃគណៈអភិបាលខេត្ត កាលពីវេលាម៉ោង០៩ និង៤៥នាទីព្រឹកថ្ងៃទី២៧ មេសា ២០១៥ ដើម្បីសុំឱ្យលោកបកស្រាយបំភ្លឺជុំបញ្ហាខាងលើ ។ គួរឱ្យសោកស្តាយដែរ លោកអភិបាលមិនបានបំភ្លឺជុំវិញករណីខាងលើនេះទេ ដោយលោកប្រាប់ថា លោកជាប់ប្រជុំ ។
ចែករំលែកព័តមាននេះ