រាជធានីភ្នំពេញ ៖ ខ្សែភ្លើង ខ្សែកាប និងខ្សែទូរស័ព្ទមួយដុំធំបានដាច់ចំណងធ្លាក់ ហើយទ្រេតបង្គោលភ្លើង២ដើម បែកផ្កាភ្លើង និងផ្ទុះលាន់ស្នូរដូចបាញ់កាំជ្រួច បង្កការភ្ញាក់ផ្អើលដល់ប្រជាពលរដ្ធ និងរងរបួសមន្ត្រីប៉ូលិសសាលាខណ្ឌទួលគោកម្នាក់ កាលពីវេលាម៉ោង១០ និង១៥នាទីយប់ ថ្ងៃទី២៦ មេសា នៅចំណុចបង្គោលភ្លើងលេខ364 និង215E ផ្លូវព្រះមុន្នីរ៉េត សង្កាត់ស្ទឹងមានជ័យ ខណ្ឌមានជ័យ។
ជនរងគ្រោះដែលរងរបួសមានឈ្មោះ ម៉ក់ សារិទ្ធ អាយុ៣៩ឆ្នាំ ជាមន្ត្រីប៉ូលិសសាលាខណ្ឌទួលគោក ស្នាក់ផ្ទះជួលសង្កាត់បឹងកក់២ ខណ្ឌទួលគោក ។ ជនរងគ្រោះបានប្រាប់ឱ្យដឹងថា មុនពេលកើតហេតុគាត់បានជិះម៉ូតូមួយគ្រឿង ម៉ាកវីវ៉ា ពណ៌ខ្មៅ ពាក់ស្លាកលេខ គ 2338 ភព1 ធ្វើដំណើរតាមបណ្តោយផ្លូវ មុន្នីរ៉េត ក្នុងទិសដៅពីត្បូងទៅជើង ។
ពេលមកដល់កន្លែងកើតហេតុស្រាប់តែខ្សែភ្លើងមួយដុំធំដាច់ចំណងធ្លាក់មកបណ្តាលឱ្យទ្រេតបង្គោលភ្លើង២ដើម បែកផ្កាភ្លើងព្រាត ផ្ទុះលាន់ស្នូរដូចបាញ់កាំជ្រួច ភ្លាមនោះក៏មានខ្សែភ្លើងតូចមួយសរសៃបានដាច់ធ្លាក់វាត់ប៉ះចំ.ក និងដៃឆ្វេងរបស់គាត់បណ្តាលឱ្យឆក់រងរបួសស្រាលត្រូវបានអ្នកឃើញហេតុការណ៍ជួយសង្គ្រោះ។
បើតាមសម្តីប្រជាពលរដ្ធរស់នៅនៅក្បែរកន្លែងកើតហេតុបានប្រាប់បន្តថា ខ្សែភ្លើងដែលធ្លាក់នោះ ពីមុនធ្លាប់ធ្លាក់មកម្តងហើយ ត្រូវបានខាងមន្ត្រីអគ្គិសនីកម្ពុជាចងព្យួរទៅនឹងបង្គោលភ្លើងខ្ពស់មួយទៀតរួចរាល់ម្តងហើយ ស្រាប់តែនៅពេលយប់កើតហេតុខ្សែភ្លើងមួយដុំខាងលើនោះដាច់ខ្សែចងព្យួរធ្លាក់មក បណ្តាលឱ្យទ្រេតបង្គោលភ្លើង២ដើម បែកផ្កាភ្លើង លាន់ស្នូរដូចរន្ទះបាញ់។
ភ្លាមនោះក៏មានរថយន្តកុងតឺន័រមួយគ្រឿង បានបើកឆ្លងកាត់ទាក់ជាប់បណ្តាលឱ្យផ្ទុះបែកផ្កាភ្លើងម្តងទៀត ធ្វើឲ្យរថយន្តបើកទៅមុខលែងរួច បង្កការកកស្ទះពាសពេញដងផ្លូវ ។ ភ្លាមៗនោះសមត្ថកិច្ចមូលដ្ឋានបានចេញទៅជួយធ្វើចរា
ចរណ៍ និងចងកំណាត់ជាសញ្ញាដើម្បីឱ្យអ្នកធ្វើដំណើរមានការប្រុងប្រយ័ត្ន ។
ដោយឡែកក្រោយកើតហេតុជនរងគ្រោះបានទាក់ទងហៅក្រុមគ្រួសារឲ្យមកយកទៅព្យាបាល ចំណែកខ្សែភ្លើងត្រូវបានកម្លាំងសមត្ថកិច្ចទាកទងហៅមន្ត្រីអគ្គិសនីចុះទៅពិនិត្យ៕
ចែករំលែកព័តមាននេះ