ខេត្តកំពង់ឆ្នាំង ៖ បុរស២នាក់ម្នាក់ជាអ្នកបើកគោយន្ត និងម្នាក់ទៀតបើករថយន្តឡិសស៊ីសRX300 ត្រូវបានសាលាដំបូងខេត្ត សម្រេចឃុំខ្លួនដាក់ពន្ធនាគារ កាលពីរសៀលថ្ងៃទី២៥ មេសា ២០១៥ ដោយចោទប្រកាន់ពីបទបើកបរបណ្តាលឱ្យរងរបួសអ្នកដទៃ ក្នុងហេតុការណ៍គ្រោះថ្នាក់ចរាចរណ៍ផ្សេងគ្នា ដែលកើតឡើង១-នៅស្រុកកំពង់ត្រឡាច និង២-នៅស្រុករលាប្អៀរ ។
បើតាមមន្ត្រីនៃសាលាដំបូងខេត្តបានឱ្យដឹងថា អ្នកបើកបរយានយន្តទាំង២នាក់ ដែលត្រូវបានឃុំខ្លួនម្នាក់ឈ្មោះតាក តុល អាយុ២៣ឆ្នាំ មានទីលំនៅភូមិកំពែង ឃុំត្រងិល ស្រុកភ្នំក្រវ៉ាញ ខេត្តពោធិ៍សាត់ កាលពីវេលាម៉ោង៧ និង២០នាទីយប់ថ្ងៃទី២៣ មេសា ២០១៥ បុរសនេះបានបើកគោយន្តកន្ត្រៃដឹកអុសមួយគ្រឿងគ្មានភ្លើងបំភ្លឺ ឬចំណាំងផ្លាតខាងក្រោយ បណ្តាលឱ្យបុរសឈ្មោះគ្រេង មករា អាយុ២៩ឆ្នាំ មានទីលំនៅភូមិសំរោង ឃុំតាជេស ស្រុកំពង់ត្រឡាច ខណៈកំពុងជិះម៉ូតូទៅបុកគូទគោយន្តពីក្រោយ បណ្តាលរងបួសធ្ងន់នៅលើផ្លូវជាតិលេខ៥ ត្រង់ចន្លោះគីឡូម៉ែត្រលេខ៦៣ និង៦៤ ក្នុងភូមិឡពាង ឃុំតាជេស ស្រុកកំពង់ត្រឡាច។
ចំណែកឯម្នាក់ទៀតឈ្មោះឆាយ រំភើយ អាយុ៤៤ឆ្នាំ រស់នៅភូមិកុយដាំរាំ ឃុំដាំរាំ ស្រុកបាណន់ ខេត្តបាត់ដំបង ជាអ្នកបើករថយន្តម៉ាកឡិចស៊ីស RX.300 ពណ៌ស្ក ពាក់ស្លាកលេខភ្នំពេញ 2Z-3934 កាលពីវេលាម៉ោង០៨ និង៤០នាទីព្រឹកថ្ងៃទី២៤ មេសា ២០១៥ បានបើកជែងរថយន្តមួយគ្រឿង ដែលកំពុងបើកស្របទិសគ្នា រួចជ្រុលទៅកៀរម៉ូតូម៉ាកហ្វីណូ ពាក់ស្លាកលេខភ្នំពេញ 1BD-2022 ដែលបើកដោយនារីម្នាក់ឈ្មោះឌឹម មុនីកែវ អាយុ១៦ឆ្នាំ ជាសិស្សរៀនថ្នាក់ទី១០ វិទ្យាល័យព្រះស៊ីសុវត្ថិ រាជធានីភ្នំពេញ បណ្តាលឱ្យដួលម៉ូតូធ្លាក់នារីរងគ្រោះចូលក្រោមរថយន្ត ហើយត្រូវរថយន្តមួយគ្រឿងទៀតម៉ាកហាយឡិនឌ័រ ពណ៌ខ្មៅ ពាក់ស្លាកលេខភ្នំពេញ 2Z- 3442 បើកដោយឈ្មោះវ៉ែន ឌឿន អាយុ២៩ឆ្នាំ រស់នៅភូមិផ្សារព្រុំ ឃុំស្ទឹងកាច់ ស្រុកសាលាក្រៅ ខេត្តប៉ៃលិន បើកមកពីក្រោយបុករុញបន្ថែមអូសយុវនារីងរងគ្រោះជាង១០ម៉ែត្រនៅក្រោមរថយន្ត រងរបួសជាទម្ងន់ ។
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ