រាជធានីភ្នំពេញ ៖ ហេតុការណ៍ទុស្សេខ្សែភ្លើងមួយ បង្កទៅជាអណ្តាតភ្លើងឆេះយ៉ាងសន្ធោសន្ធៅផ្អើលប្រជាពលរដ្ឋដែលមានលំនៅជាប់បង្គោលភ្លើងនោះ ភ័យស្លន់ស្លោរត់យកបំពង់ពន្លត់អគ្គិភ័យទៅបាញ់ពន្លត់ នៅតែមិនព្រមរលត់ទៀត ទាល់តែប្រើប្រាស់រថយន្តពន្លត់អគ្គីភ័យអស់មួយគ្រឿង ទើបរលត់អស់ទាំងស្រុង កាលពីវេលាម៉ោង០៤ និង៤០នាទីទៀបភ្លឺថ្ងៃទី២៧ មេសា ២០១៥ ស្ថិតនៅបង្គោលភ្លើងលេខ៣១១ និងលេខ១០១ មុខវិទ្យាស្ថានអាយធី មុខផ្ទះលេខ១១៥ ផ្លូវលេខ២៦៥ សំណង់១២ សង្កាត់ទឹកល្អក់ទី៣ ខណ្ឌទួលគោក ។
ប្រភពពីប្រជាពលរដ្ឋបានឱ្យដឹងថា មុនពេលកើតហេតុ ស្រាប់តែលាន់សូរផ្ទុះប្រាវក៏នាំគ្នារត់ចេញមកមើល ក៏ឃើញអណ្តាតភ្លើងឆាបឆេះចេញពីបង្គោលភ្លើងនៅជាប់នឹងខ្សែភ្លើងយ៉ាងសន្ធោសន្ធៅ ។ ទោះបីជាប្រជាពលរដ្ឋនាំគ្នាយកបំពង់ពន្លត់អគ្គិភ័យជាង១០បំពង់ទៅបាញ់ពន្លត់ ក៏នៅតែមិនព្រមរលត់ដែរ ទើបត្រូវបានសមត្ថកិច្ចហៅរថយន្តពន្លត់អគ្គិភ័យមួយគ្រឿងទៅបាញ់ ហើយខាង
អគ្គិសនីកម្ពុជាបានបិទបារ៉ែត ទើបរលត់អស់ទាំងស្រុង ។
អគ្គិភ័យខាងលើនេះ ធ្វើឲ្យប្រជាពលរដ្ឋមានការភ័យខ្លាចដោយសារតែបង្គោលភ្លើងនៅចំពីមុខផ្ទះរបស់ពួកគាត់តែម្តង ហើយមានខ្សែភ្លើង ខ្សែកាប និងខ្សែទូរស័ព្ទ ព្រមទាំងខ្សែអុកទិកជាច្រើនសរសៃមួយដុំធំ ត្រូវបានដាច់ធ្លាក់រាយប៉ាយពេញផ្លូវ និងដាច់ចរន្តអគ្គិសនីងងឹតសូន្យសុងតែម្តង ។
ចែករំលែកព័តមាននេះ