ខេត្តកំពង់ឆ្នាំង ៖ ស្ត្រីម្នាក់បានស្លាប់ និង៤នាក់ទៀតបានរងរបួសធ្ងន់ និងស្រាល ក្នុងហេតុការណ៍គ្រោះថ្នាក់ចរាចរណ៍ដ៏រន្ឋត់ ដោយរថយន្ត៣គ្រឿងបុកបន្តកន្ទុយគ្នាមួយបានកើតឡើងនៅវេលាម៉ោង១ និង២០នាទីរសៀល ថ្ងៃទី២៦ ខែមេសា ឆ្នាំ២០១៥ លើកំណាត់ផ្លូវជាតិលេខ៥ ចំណុចមុខអធិការដ្ឋាននគរបាលស្រុករលាប្អៀរ ស្ថិតក្នុងភូមិព្រៃពួច ឃុំជ្រៃបាក់ ស្រុករលាប្អៀរ ខណៈដែលរថយន្តម៉ាកនីសាន់ទៅបុកជាមួយនឹងរថយន្តក្រុងក្នុងដំណើរច្រាស់ទិសគ្នា និងបោកមកបុកជាមួយរថយន្តទំនើបម៉ាកឡង់រ៉ូវែ ឌីស្កូវឺរី របស់លោកអភិបាលរងខេត្តបាត់ដំបង ។
សមត្ថកិច្ចនគរបាលចរាចរណ៍ស្រុករលាប្អៀរបាននិយាយថា ស្ត្រីម្នាក់ដែលមិនស្គាល់អត្តសញ្ញាណបានស្លាប់នៅនឹងកន្លែងកើតហេតុ បុរសម្នាក់ទៀតបានរងរបួសធ្ងន់ និងកុមារ២នាក់ ម្នាក់ជាកុមារា អាយុប្រមាណ៣ឆ្នាំ ម្នាក់ទៀតជាកុមារីអាយុប្រមាណ៧ឆ្នាំ បានរងរបួសធ្ងន់ ។ ទាំង៤នាក់បានជិៈរថយន្តម៉ាកនីសាន់ ពណ៌ទឹកប្រាក់ ពាក់ស្លាកលេខភ្នំពេញ 2E-8742 សមត្ថកិច្ចសង្ស័យថា ទាំង៤នាក់
ជាគ្រួសារតែមួយ គឺឪពុក ម្តាយ និងកូន២នាក់ ។ ចំណែករថយន្តក្រុងពាក់ស្លាក់លេខ ភ្នំពេញ 3A-9644 បើកបរដោយបុរសមិនស្គាល់ឈ្មោះ ក្រោយពេលកើតហេតុបានគេចខ្លួនបាត់ ។
ដោយឡែក រថយន្តអភិបាលរងខេត្តបាត់ដំបង ម៉ាកឡង់រ៉ូវែ ឌីស្កូវ៉ឺរី ពណ៌ខ្មៅ ពាក់ស្លាកលេខ បាត់ដំបង 2A-9988 ដែលបើកបរដោយឈ្មោះជីម វ៉ាន់ឌឿន អាយុ២២ ឆ្នាំបានរងរបួសស្រាល ចំណែកលោកសុខ គង់ អភិបាករងខេត្តបាត់ដំបងដែលជិៈក្នុងរថយន្តនោះដែររួម និងអង្គរក្សមា្នក់ទៀតមិនមានរងរបួសទេ ។
សមត្ថកិច្ចនគរបាលបានបញ្ញាក់ពីមូលហេតុនៃគ្រោះថ្នាក់ចរាចរណ៌ខាងលើនេះថា មុនពេលកើតហេតុ រថយន្តនីសាន់បានធ្វើដំណើរពីជើងទៅត្បូងតាមបណ្តោយផ្លូវជាតិ ចំណែករថយន្តអភិបាលរងខេត្តបានបើកពីក្រោយក្នុងដំណើរស្របទិសគ្នា ស្រាប់តែមកដល់ចំណុចកើតហេតុ រថយន្តនីសាន់បានរ៉េចង្កូតទៅឆ្វេងដៃ ទៅបុកជាមួយរថយន្តក្រុងក្នុងដំណើរច្រាស់ទិសគ្នា បណ្តាលឱ្យរថយន្តនីសាន់ បោកខ្ទៀតមកបុកជាមួយរថយន្តឡង់រ៉ូវែ ដែលបើកពីក្រោយតែម្តង បណ្តាលឱ្យរថយន្តនីសាន់បានខូចខាតខ្ទេចទាំងស្រុង ឯរថយន្តក្រុងខ្ទេចមួយកំណាត់មុខ និងរថយន្តឡង់រ៉ូវែរបស់អភិបាលរងខេត្តបាត់ដំបង បានខ្ទេចមួយកំណាត់មុខ និងជំហៀងខាងឆ្វេង ។
ជនរងគ្រោះទាំង៤នាក់ត្រូវបានដឹកទៅសង្គ្រោះនៅមន្ទីរពេទ្យខេត្តជាបន្ទាន់ ចំណែករថយន្តទាំង៣គ្រឿងត្រូវបានសមត្ថកិច្ចស្ទូចយកមករក្សាទុកនៅស្នងការដ្ឋានដើម្បីរង់ចាំការដោះស្រាយតាមនិតិវិធី ។
ព័ត៌មានបន្ថែម ៖ ស្ត្រីស្លាប់នៅនឹងកន្លែងមានឈ្មោះ ម៉ក់ សារួន ហៅស្រីអូន អាយុ៤២ ឆ្នាំ ជាប្រពន្ឋរបស់ឈ្មោះ ប៊ុន និន អាយុ ៤៨ ជាអ្នកបើកបររថយន្តម៉ានីសាន់ គ្រួសារនេះមានទីលំនៅភូមិពពេល ឃុំខុនរ៉ង ស្រុកបរិបូរណ៏ ៕
ចែករំលែកព័តមាននេះ