ខេត្តបាត់ដំបង៖ កម្លាំងនគរបាលផ្នែកបង្ការ-បង្ក្រាបនៃការិយាល័យព្រហ្មទណ្ឌកំរិតស្រាលនៅតែបន្តកិច្ចប្រតិបត្តិការចុះបង្ក្រាបទីតាំងបើកល្បែងស៊ីសងគ្រប់ប្រភេទ ក្រោមបទបញ្ជារបស់លោកស្នងការខេត្ត ដូចជាទីតាំងភ្នាល់បាល់
ខេត្តបាត់ដំបង៖ កម្លាំងនគរបាលផ្នែកបង្ការ-បង្ក្រាបនៃការិយាល័យព្រហ្មទណ្ឌកំរិតស្រាលនៅតែបន្តកិច្ចប្រតិបត្តិការចុះបង្ក្រាបទីតាំងបើកល្បែងស៊ីសងគ្រប់ប្រភេទ ក្រោមបទបញ្ជារបស់លោកស្នងការខេត្ត ដូចជាទីតាំងភ្នាល់បាល់ និងទីតាំងធ្វើអាជីវកម្មល្បែងហ្គេមជាដើមនៅក្នុងក្រុងបាតដំបង ដែលជ្រកក្រោមស្លាក«អ៊ីនធឺណេត» ខណៈមន្ត្រីថ្នាក់លើមួយចំនួនកំពុងប្រឹងសម្ងំទំពារសំណែនយ៉ាងក្របួច និងយ៉ាងស្ងាត់ស្ងៀមបំផុតជាមួយនិងម្ចាស់ទីតាំងបទល្មើស ដោយមិនខ្លាចស្លាក់ឆ្អឹងឡើយ។
នៅរសៀលថ្ងៃទី២៥ មេសា កម្លាំងសមត្ថកិច្ចជំនាញមួយក្រុមខាងលើ បានទទូលបទបញ្ជាជាថ្មីទៀតពីលោកស្នងការខេត្ត ក្នុងការចុះបង្ក្រាបលើទីតាំងហាងអ៊ីនធើរណេតនានា នៅក្នុងក្រុងបាត់ដំបង ដែលគេសង្ស័យថា មិនស្របច្បាប់ មានបង្កប់នូវល្បែងស៊ីសង។ ប៉ុន្តែកិច្ចប្រតិបត្តិការនេះ មិនបានធ្វើឲ្យមន្ត្រីថ្នាក់ដឹកនាំការិយាល័យ ឬមន្ត្រីមួយចំនួនដែលពាក់ព័ន្ធសប្បាយចិត្តនោះទេ ដោយសារតែកិច្ចប្រតិបត្តិការនេះធ្វើឲ្យប៉ះពាល់ដល់ផលប្រយោជន៍របស់មន្ត្រីខិលខូចទាំងនោះ។
មន្ត្រីខិលខូចដែលបោះបង់ច្បាប់ ហើយប្រឹងចាប់យកបទល្មើសធ្វើជាមិត្តយ៉ាងស្និទ្ធនោះ តែងត្រូវលាតត្រដាងដោយម្ចាស់បទល្មើស នៅពេលត្រូវបង្ក្រាបដោយកម្លាំងដែលមិនពាក់ព័ន្ធ។ ជាពិសេសមេកន្ទុយលេខ ម្ចាស់ហាងអ៊ីនធើរណេត ម្ចាស់ទីតាំងបើកភ្នាល់បាល់ ឬមេល្បែងស៊ីសងបំពានច្បាប់ផ្សេងៗ ដែលតែងហែកហួររឿងនេះ។ល។
លោកឈឿង គឹមសុង ប្រធានក្រុមនគរបាលផ្នែកបង្ការ-បង្ក្រាប នៃការិយាល័យព្រហ្មទណ្ឌកំរិតស្រាលបាននិយាយថា កិច្ចប្រតិបត្តិការនេះត្រូវបានធ្វើឡើងជាបន្តបន្ទាប់ ក្រោមការបញ្ជាផ្ទាល់ពីលោកស្នងការខេត្ត។ លោកបានប្រាប់ថា នៅរសៀលថ្ងៃទី២៥ មេសា កម្លាំងរបស់លោកបានទទូលបទបញ្ជាឲ្យចុះត្រូតពិនិត្យតាមបណ្ដាទីតាំងភ្នាល់បាល់នានា ដែលជ្រកក្រោមស្លាកអ៊ីនធើរណេតយ៉ាងតិចជាង១០កន្លែង នៅក្នុងក្រុងបាត់ដំបង ដើម្បីណែនាំឲ្យម្ចាស់អាជីវកម្មទាំងអស់ដែលមិនគោរពច្បាប់ ឲ្យធ្វើកិច្ចសន្យាបញ្ឍប់សកម្មភាពបើកឲ្យមានល្បែងស៊ីសងរបស់ខ្លួន។
ប៉ុន្តែលោកឈឿង គឹមសុង បានបញ្ជាក់ថា កិច្ចប្រតិបត្តិការនេះបានជួបការលំបាកខ្លះៗ ដោយសារទីតាំងភ្នាល់បាល់មួយចំនួនមានអ្នកចាំអន្តរាគមន៍ ហើយក៏បានធ្វើឲ្យមន្ត្រីមួយចំនួនដែលបានសើមមាត់សើមកពីបទល្មើសនេះមិនសប្បាយចិត្តដែរ។
បើពិនិត្យលើកិច្ចប្រតិបត្តិការបង្ក្រាបទីតាំងភ្នាល់បាល់របស់កម្លាំងសមត្ថកិច្ចមួយក្រុមខាងលើនេះ ជាក់ស្ដែងត្រូវគេមើលឃើញថា បានធ្វើឡើងក្រោមសម្ពាធ និងការអន្តរាគមន៍យ៉ាងខ្វាត់ខ្វែងតាមទូរស័ព្ទពីសំណាក់មន្ត្រីថ្នាក់ដឹកនាំមួយចំនួនដែលនៅពីក្រោយនៃបទល្មើសនេះ។ រីឯម្ចាស់អាជីវកម្មវិញ ក៏ហាក់ដូចជាធុញទ្រាន់នឹងការបង្ក្រាបនេះខ្លាំងណាស់ដែរ រហូតម្ចាស់ទីតាំងខ្លះបានទម្លាយនូវឈ្មោះមន្ត្រីខិលខូចមួយចំនួន ដែលតែងដើរប្រមូលប្រាក់សំណូកពីពួកគេស្ងាត់ៗរៀងរាល់ខែទៀតផង។
មន្ត្រីទាំងនោះសុទ្ធតែអះអាងថា ជួយការពារមិនឲ្យមានការបង្ក្រាប តែទីបំផុតនៅតែមានការបង្ក្រាបដដែល។ ពួកគេបានបញ្ជាក់ថា សមត្ថកិច្ចដែលតែងបង្ខំទារប្រាក់ពីពួកគេជាថ្នូរនឹងការការពារមិនឲ្យបង្ក្រាបនោះ គឺមានមន្ត្រីកងរាជអាវុធហត្ថខេត្ត មន្ត្រីនគរបាលក្រុងបាត់ដំបង និងមន្ត្រីនគរបាលខេត្ត។ មន្ត្រីនគរបាលខេត្តគឺមានច្រើនក្រុម ច្រើនផ្នែកដើរទារប្រាក់សំណែននេះ បើទោះជាពួកគេនិយាយត្រូវរ៉ូវគ្នាស្ងាត់ៗជាមួយមេការិយាល័យរួចហើយក្ដី ក៏នៅតែមានក្រុមផ្សេងមកជំរិតបន្តកន្ទុយគ្នាស្ទើរាល់ខែដែរ។
ជុំវិញបញ្ហានេះលោកជេត វណ្ណនី ស្នងការរងខេត្តក៏បានទទូលស្គាល់ដែរថា ពិតជាមានមន្ត្រីខិលខូចមួយចំនួនលួចឃុំឃិតប្រព្រឹត្តបទល្មើសជាមួយនឹងម្ចាស់អាជីវកម្មខុសច្បាប់ទាំងនោះមែន។ លោកស្នងការរងបានបន្តថា តាមគោលការណ៍របស់លោកស្នងការខេត្ត នៅតែបន្តបទបញ្ជាឲ្យកម្លាំងជំនាញចុះបង្ក្រាបជាប្រចាំ ប្រសិនបើរកឃើញមានទីតាំង«អ៊ីនធើរណេត»ទាំងឡាយណាដែលធ្វើអាជីវកម្មដោយខុសច្បាប់បង្កប់នូវល្បែងស៊ីសង។ ដូចជាបើកលេងល្បែងហ្គេមគ្រប់ប្រភេទភ្នាល់ដាក់លុយ និងល្បែងភ្នាល់បាល់ជាដើម។
លោកជេត វណ្ណនី បានបញ្ជាក់ថា ការចុះបង្ក្រាបទីតាំងភ្នាល់បាល់ខាងលើនេះ តាមគោលការណ៍របស់លោកស្នងការខេត្ត គឺជំហានទី១ គ្រាន់តែឲ្យកម្លាំងជំនាញធ្វើការអប់រំ និងឲ្យម្ចាស់ធ្វើកិច្ចសន្យាបញ្ឍប់សកម្មភាពរបស់ខ្លួនតែប៉ុណ្ណោះ តែបើម្ចាស់ទីតាំងទាំងនោះនៅតែចចចេសរឹងរូស យើងនឹងអនុវត្តនូវជំហានទី២ គឺអាចចាត់វិធានការតាមផ្លូវច្បាប់តែម្ដង៕
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ