រាជធានីភ្នំពេញ ៖ សាលវិទ្យាសាស្ត្រទាំងពីរជាន់នៃមជ្ឈមណ្ឌលកំសាន្តបែបអប់រំ Kids City មានឧបករណ៍ពិសោធន៍ជាក់ស្តែងជាង១០០ប្រភេទ និងមានតួនាទីផ្សេងៗគ្នាសម្រាប់សិក្សា និងអនុវត្តផ្ទាល់លើមូលដ្ឋានគ្រឹះ ដូចជាពន្លឺ សំលេង ពិភពក្រោមទឹក រាងកាយមនុស្ស និងឧបករណ៍ផ្សេងទៀតពាក់ព័ន្ធការចំលងថាមពល បណ្តុំនៃផ្កាយ និងពីដំណើរនៃគ្រឿងម៉ាស៊ីន។
នៅព្រឹកថ្ងៃទី ២៥ មេសា មជ្ឈមណ្ឌលកំសាន្តបែបអប់រំKids City បានរៀបចំសិក្ខាសាលាលើកទី១នៃការបើកឱកាសទៅដល់សាលារដ្ឋ និងឯកជនប្រកួតប្រជែង វិទ្យាសាស្ត្រ បច្ចេកវិទ្យា វិស្វកម្ម និងគណិតវិទ្យា(STEM Competition) ដោយមានការអញ្ចើញចូលរួមជាកិត្តិយសពីលោក ម៉េង ហៀង អគ្គនាយកក្រុមហ៊ុន Kids City រួមទាំងភ្ញៀវជាតិនិងអន្តរជាតិជាច្រើនផ្សេងទៀត។
លោក ម៉េង ហៀង អគ្គនាយកក្រុមហ៊ុន Kids Cityមានប្រសាសន៍ថា Kids City មានកិត្តិយស និងមោទនភាពយ៉ាងក្រៃលែងក្នុងការចូលរួមគាំទ្រ និងលើកស្ទួយចំណេះដឹងនៃវិទ្យាសាស្ត្រ បច្ចេកវិទ្យាវិស្វកម្មនិងគណិតវិទ្យា ( STEM) ក្នុងប្រព័ន្ធអប់រំនៅក្នុងប្រទេសកម្ពុជាយើង។
យើងជាស្ថាបនិកមានមហិច្ឆតាធំដើម្បីនាំយកសកម្មភាពអប់រំបែបកំសាន្ត ស្របពេលនឹងសម័យបច្ចេកវិទ្យាទំនើបមកជូនប្រជាជនកម្ពុជា។ យើងតែងតែផ្តោតលើវិទ្យាសាស្ត្រជាចំណេះដឹងដ៏អស្ចារ្យ និងជាបេះដូងក្នុងការអប់រំដល់សិស្សានុសិស្សទាំងអស់ក្នុងនៅកម្ពុជា ដូចដែលយើងមានធនធានស្រាប់ គឺនៅKids City។
លោកអគ្គនាយកក្រុមហ៊ុនលើកឡើងថា យើងធ្លាប់លឺ STEM ជាអក្សរកាត់មកពីពាក្យវិទ្យាសាស្ត្រ បច្ចេកវិទ្យាវិស្វកម្ម និងគណិតវិទ្យា ប៉ុន្តែហេតុអ្វីបានជា STEM មានសារៈសំខាន់? តម្រូវការសម្រាប់អ្នកធ្វើការជំនាញនៅក្នុងមុខវិជ្ជា STEM គឺមានការផ្សារភ្ជាប់យ៉ាងជិតស្និទ្ធទៅនឹងការប្រកួតប្រជែងជាសកល។ នៅពេលប្រទេសកម្ពុជាយើងមានការរីកចម្រើននោះវិទ្យាសាស្ត្រនឹងបែរជាមានសារសំខាន់កាន់តែខ្លាំងឡើងៗ។
ទោះបីជានិស្សិតមួយចំនួនមិនមានបំណងចង់ទៅសិក្សាផ្នែកវិទ្យាសាស្ត្រជាផ្លូវការក៏អាចទទួលបានអត្ថប្រយោជន៍នៃការរីកចម្រើនផ្នែកបញ្ញា ស្មារតី ព្រោះយើងរៀនពីការសួរនូវអ្វីដែលកើតមានឡើងជុំវិញខ្លួនយើងនៅលើពិភពលោក។ លោកសង្ឃឹមថា សាលវិទ្យាសាស្ត្រដែលមានកម្រិតស្តង់ដារអន្តរជាតិនៅKids City នឹងជួយសម្រួលដល់សិស្សនូវជំនាញចាំបាច់ដើម្បីជំរុញ និងលើកស្ទួយការរីកចម្រើននៃចំណេះដឹងផ្នែកវិទ្យាសាស្ត្រនៅកម្ពុជា។
លោកប៉ាន កាស ជា អគ្គនាយកក្រុមហ៊ុន Prudential បានលើកឡើងក្នុងកម្មវិធីនេះថា STEM មានសារៈសំខាន់ក្នុងការផ្តល់ឲ្យមានការអប់រំមានគុណភាពនិង ប្រសិទ្ធភាពនៅក្នុងប្រទេសកម្ពុជា និងជាពិសេសគឺការយល់ដឹងពីវិទ្យាសាស្ត្រឲ្យកាន់តែទូលំទូលាយ។ ខ្ញុំយល់ឃើញថា ប្រទេសកម្ពុជាត្រូវការនាក់ជំនាញខាងផ្នែកវិទ្យាសាស្ត្រ វិស្វកម្ម បច្ចេកទេស និងគណិតវិទ្យា ដើម្បីចូលរួមក្នុងការអភិវឌ្ឍន៍សេដ្ឋកិច្ចប្រទេស។
លោកបណ្ឌិត Bryony Mathew អគ្គនាយករងបេសកម្មរបស់ស្ថានទូតអង់គ្លេសប្រចាំកម្ពុជាមានប្រសាសន៍ថា ការអប់រំវិទ្យាសាស្ត្រ បច្ចេកវិទ្យា វិស្វកម្ម និងគណិតវិទ្យាពិតជាមានសារសំខាន់ក្នុងការអភិវឌ្ឍប្រទេសកម្ពុជា។ ក្នុងនោះដែររួមមានអ្នកស្រី Anne Lemaistre អ្នកតំណាងអង្គការយូនីស្កូប្រចាំកម្ពុជាក៏បានជំរុញឲ្យមានកម្មវិធីនេះផងដែរ។
អ្នកស្រី Laura Boon អ្នកគ្រប់គ្រងផ្នែកវិទ្យាសាស្ត្ររបស់មជ្ឈមណ្ឌលកំសាន្តបែបអប់រំឃីត ស៊ីធីមានប្រសាសន៍ថា តាមរយៈការប្រកួតប្រជែងផ្នែកអប់រំដូចបានលើកឡើងខាងលើនេះយើងសង្ឃឹមថា នឹងអាចជំរុញទឹកចិត្តក្មេងៗបន្ថែមទៀត ឲ្យកាន់តែមានចំណាប់អារម្មណ៍លើផ្នែកវិទ្យាសាស្ត្រ។ ក្មេងៗទាំងឡាយចូលមកលេងនៅក្នុងសាសវិទ្យាសាស្ត្រនឹងទទួលបានអត្ថប្រយោជន៍ជាច្រើនដូចជា ការប្រកួតប្រជែងចំណេះដឹងលើគ្រប់មុខវិជ្ជារបស់ពួកគេ រួមទាំងធ្វើការងារជាក្រុម ជាមួយនិងសិស្សមកពីមជ្ឈដ្ឋានផ្សេងៗគ្នា។
ក្រុមក្មេងៗចាប់ពី៥នាក់មានអាយុក្រោម១២ឆ្នាំ អាចចូលរួមប្រកួតប្រជែង ដោយសិស្សទាំងអស់មិនចាំបាច់មានចំណេះដឹងផ្នែកវិទ្យាសាស្ត្រពីមុនមកក៏អាចចូលរួមបាន។ ការប្រកួតប្រជែងសមត្ថភាពជាក្រុម និងសមត្ថភាពលើមុខវិជ្ជាដ៏ទៃទៀតសិស្សអាចចូលរួមប្រកួតដោយសេរីបានទាំងភាសាខ្មែរនិងអង់គ្លេស៕
ចែករំលែកព័តមាននេះ