ខេត្តស្ទឹងត្រែង ៖ ទីតាំងកែច្នៃ និងស្តុកឈើប្រណីតបីកន្លែងត្រូវបានកម្លាំងរដ្ឋបាលព្រៃឈើថ្នាក់ជាតិ រួមជាមួយព្រះរាជអាជ្ញាអមសាលាដំបូងខេត្តសហការជាមួយកម្លាំងកងរាជអាវុធហត្ថខេត្តចុះបង្ក្រាបរយៈពេលពេញ
ខេត្តស្ទឹងត្រែង ៖ ទីតាំងកែច្នៃ និងស្តុកឈើប្រណីតបីកន្លែងត្រូវបានកម្លាំងរដ្ឋបាលព្រៃឈើថ្នាក់ជាតិ រួមជាមួយព្រះរាជអាជ្ញាអមសាលាដំបូងខេត្តសហការជាមួយកម្លាំងកងរាជអាវុធហត្ថខេត្តចុះបង្ក្រាបរយៈពេលពេញមួយថ្ងៃទី២៥ មេសា២០១៥ ក្នុងក្រុងស្ទឹងត្រែង ខេត្តស្ទឹងត្រែង។
យុទ្ធនាការបង្ក្រាបនេះដំបូងឡើយកម្លាំងរដ្ឋបាលព្រៃឈើថ្នាក់ជាតិបានចុះប្រតិបត្តិការអង្កេត និងដាក់គោលដៅធ្វើការត្រួតពិនិត្យទើបឈានដល់ការបង្ក្រាប និងរឹបអូស។ ក្រោយពេលព្រះរាជអាជ្ញាអមសាលាដំបូងរួមជាមួយកម្លាំងកងរាជអាវុធហត្ថខេត្តដឹកនាំដោយលោក អៀង វ៉ាន់ឌី ចុះដល់ចំណុចគោលដៅជាច្រើនកន្លែងទៀតនៅក្នុងក្រុង ទើបឈានដល់ការរឹបអូសទីតាំងកែច្នៃឈើប្រណិតមួយកន្លែងនៅក្នុងភូមិបាចុង សង្កាត់ព្រះបាទ រឹបអូសបានឈើ៤រ៉ឺម៉ក និងម៉ាស៊ីនមួយចំនួន។
តមកនៅវេលាបន្ទាប់កម្លាំងទាំងអស់បានទៅដល់រោងសិប្បកម្មមួយកន្លែងនៅភូមិស្ពានថ្ម សង្កាត់ស្ទឹងត្រែង។ ទីតាំងនោះត្រូវគេស្គាល់ថា ជារបស់លោក លី សុងហួត ហៅ គ្រូរ័ត្ន មានទីតាំង៣កន្លែងក្នុងនោះមានតែទីតាំងមួយដែលមានច្បាប់និង២ទីតាំងទៀតពុំមានច្បាប់ និងមានបញ្ជាពីព្រះរាជអាជ្ញា និងមេបញ្ជាការកងរាជអាវុធហត្ថ ព្រមទាំងរដ្ឋបាលព្រៃឈើថ្នាក់ជាតិដឹកនាំដោយលោកអិវ ឯសាវតី ឲ្យធ្វើការឆែកឆេរ និងដាក់កម្លាំងការពារចំនួន២គោលដៅនោះដើម្បីបង្ក្រាប និងរឹបអូស តែក្រោយមកហាក់បីដូចជាមិនប្រក្រតីទីតាំង២កន្លែងផ្សេងទៀតរបស់លោក លី សុងហួត មិនត្រូវបានរឹបអូសឬបង្ក្រាបឡើយ។
តាមការខ្សឹបប្រាប់របស់មន្ត្រីរដ្ឋបាលព្រៃឈើម្នាក់សុំមិនបញ្ចេញឈ្មោះបានឱ្យដឹងថាលោក លី សុងហួត ជាមនុស្សជំនិតរបស់លោក ឈង តុលា នាយខណ្ឌរដ្ឋបាលព្រៃឈើស្ទឹងត្រែង ហើយការដាក់កម្លាំងយ៉ាងមាំទាំនោះត្រូវគេសង្ស័យថាមានអ្វីជាបញ្ហានៅពីក្រោយខ្នង។ នៅគ្រាដែលកម្លាំងទាំងអស់ រួមមានព្រះរាជអាជ្ញាលោកមេបញ្ជាការកងរាជអាវុធហត្ថ លោក អិវ ឯកសាវតី បាននិយាយថា មិនបាច់យកច្បាប់អ្វីមកឲ្យមើលទេ ច្បាប់២០ម៉ែត្រគូបធ្វើម៉ាឆ្នាំហ្នឹង តែច្បាប់ហ្នឹងដដែល។
បន្ទាប់មកលោក អៀង វ៉ាន់ឌី និងលោក ប៉ែន សារ៉ាត់ ព្រះរាជអាជ្ញាអមសាលាដំបូងខេត្តបានបញ្ជាឲ្យរឹបអូសទីតាំង២កន្លែងដែលអត់មានលិខិតអនុញ្ញាត តែវេលាកាន់តែខើចទីតាំងនោះមិនត្រូវបានបង្ក្រាប ហើយដកកម្លាំងចេញទាំងអស់វិញ។លោក ប៉ែន សារ៉ាត់ ព្រះរាជអាជ្ញាអមសាលាដំបូងខេត្តស្ទឹងត្រែងមានប្រសាសន៍ពាក់ព័ន្ធទីតាំងខាងលើនេះ គឺគេមានច្បាប់ប៉េសេរបស់គេ១ទីតាំងធំ ចំណែក២កន្លែងនោះគ្រាន់ជាកន្លែងដែលគេពង្រាយសម្រាប់ធ្វើប៉ុណ្ណោះ ដូច្នេះត្រូវដកកម្លាំងវិញ ព្រោះគេមានច្បាប់។
ក្រោយសកម្មភាពកម្លាំងទាំងអស់បានធ្វើការរឹបអូសទីតាំងកែច្នៃគ្រឿងសង្ហារឹមជាហូរហែនោះមកនៅវេលារសៀល ជំនាញក្រោមបញ្ជាពីព្រះរាជអាជ្ញាបានបញ្ជាឲ្យកាត់សោទីតាំង២កន្លែងទៀត មួយនៅភូមិបាចុង សង្កាត់ព្រះបាទ និងភូមិស្ពានថ្ម សង្កាត់ស្ទឹងត្រែង ដែលបានរឹបអូសឈើជាច្រើនម៉ែត្រគូប។
គួរបញ្ចាក់ថា ម្ចាស់ឈើដែលច្រើនបំផុតមានឈ្មោះ សុខ ពៅ ភេទស្រី ជាម្ចាស់រោងសិប្បកម្មដ៏ធំមួយ តែមិនត្រូវបានបង្ក្រាប ហើយឈើដែលរឹបអូសនោះឈ្មោះ សុខ ពៅ បានយកទៅដាក់នៅរោងអារ ច្រៀកមួយកន្លែងនៅភូមិស្ពានថ្ម ទីតាំងបង្ក្រាបពេលរសៀលនោះ តែមិនមានជំនាញ ឬកងកម្លាំងណាទៅបង្ក្រាបនៅទីតាំងឈ្មោះ សុខ ពៅ នោះឡើយ។
លោក លី គន នាយផ្នែករដ្ឋបាលស្ទឹងត្រែងបានបញ្ជាក់ប្រាប់ថា នៅព្រឹកថ្ងៃអាទិត្យទី២៦ មេសា នេះ នៅមិនទាន់ដឹងលទ្ធផលនៅឡើយទេ ព្រោះជាថ្ងៃសម្រាក ដូច្នេះរង់ចាំសរុបនៅពេលក្រោយ។ បើតាមការអះអាងពីជំនាញថា ឈើដែលមិនស្របច្បាប់ធ្វើការរឹបអូសនោះអាចមានចំនួនច្រើនលើសពីជាង១០ម៉ែត្រគូបទៅ២០ម៉ែត្រគូប រួមនិងរណារ៉ៃម៉ាស៊ីនតាបឈូសជាច្រើនគ្រឿងទៀត ៕
ចែករំលែកព័តមាននេះ