រាជធានីភ្នំពេញ ៖ បុរស២នាក់បានស្លា.ប់ភ្លាមៗនៅកន្លែងកើតហេតុ ដោយសារថយន្តបើកជែងទៅបុកចំពីមុខពេញទំហឹង កាលពីម៉ោង៦ និង៤០នាទីព្រលប់ ថ្ងៃទី២៥ ខែមេសា ឆ្នាំ២០១៥ នៅចំណុចផ្លូវជាតិលេខ៤ ខាងកើតសាលាក្តីខ្មែរក្រហម
រាជធានីភ្នំពេញ ៖ បុរស២នាក់បានស្លាប់ភ្លាមៗនៅកន្លែងកើតហេតុ ដោយសារថយន្តបើកជែងទៅបុកចំពីមុខពេញទំហឹង កាលពីម៉ោង៦ និង៤០នាទីព្រលប់ ថ្ងៃទី២៥ ខែមេសា ឆ្នាំ២០១៥ នៅចំណុចផ្លូវជាតិលេខ៤ ខាងកើតសាលាក្តីខ្មែរក្រហម ស្ថិតក្នុងភូមិអង្គ សង្កាត់ចោមចៅ ខណ្ឌពោធិ៍សែនជ័យ ។
តាមប្រភពព័ត៌មានពីបុរសម្នាក់ឈ្មោះសៀក រ័ត្ន អាយុ៣៥ឆ្នាំ មុខរបរលក់ដូរនៅភូមិអង្គ សង្កាត់ចោមចៅ ខណ្ឌពោធិ៍សែនជ័យ បានប្រាប់អោយដឹងថា មុនពេលកើតហេតុ គេឃើញរថយន្ត BMW ពណ៌ស្ករ ពាក់ស្លាកលេខ ភ្នំពេញ 2U-9638 បើកបរក្នុងទិសដៅពីកើតទៅលិច ក្នុងល្បឿនលឿន ដោយបើកជែងរថយន្តមួយទៀត ខណៈដល់ចំណុចខាងលើស្រាប់តែជ្រុលទៅបុកម៉ូតូសេ១១០ ពណ៌ខ្មៅពាក់ស្លាកលេខ ភ្នំពេញ 1BG-1271 ជិះគ្នា២នាក់ ចំពីមុខពេញទំហឹង ក្នុងទិសដៅបញ្ច្រាស់គ្នា បណ្តាលអោយម្នាក់ស្លាប់នៅលើផ្លូវជាតិឯម្នាក់ទៀតជាអ្នកបើកម៉ូតូបានប៉ើងខ្ទាតទៅស្លាប់ក្នុងប្រឡាយទឹក ហើយត្រូវបានប្រជាពលរដ្ឋចុះសែងយកមកលើគោកវិញ ។
តាមប្រភពព័ត៌មានពីសមត្ថកិច្ចបានប្រាប់ឲ្យដឹងថា ជនរងគ្រោះទាំង២នាក់ខាងលើមាន ១-ឈ្មោះឯល ពិសិដ្ឋ ភេទប្រុស អាយុ២៥ឆ្នាំជាកម្មកររោងចក្រ ស្នាក់នៅភូមិតាំងរនាម សង្កាត់ប្រទេះឡាង ខណ្ឌដង្កោ(អ្នកបើក) ស្លាប់ក្នុងប្រឡាយទឹក ។ ២-ឈ្មោះសោម ឆក ភេទប្រុស អាយុ២៤ឆ្នាំ ជាកម្មកររោងចក្រ ស្នាក់នៅភូមិស្ងួនពេជ្រ សង្កាត់កន្ទោក ខណ្ឌពោធិ៍សែនជ័យ អង្គុយក្រោយ ស្លាប់នៅលើផ្លូវជាតិ ។ ចំណែកអ្នកបើករថយន្តខាងលើក្រោយពីគ្រោះថ្នាក់ហើយបានបើកទ្វារថយន្តគេចខ្លួនបាត់ស្រមោល សល់តែអ្នករួមដំណើរត្រូវបានសមត្ថកិច្ចនាំខ្លួនមកប៉ុស្តិ៍ ខ្លាចប្រជាពលរដ្ឋច្រឡំស្មានតែអ្នកបើក ក្រែងមានប្រើអំពើហិង្សា ។
តាមសំដីអ្នករួមដំណើរខាងលើបានប្រាប់ឲ្យដឹងថា មុនកើតហេតុគាត់បានអង្គុយក្នុងរថយន្តខាងលើផ្នែកក្រោយខាងស្តាំ ហើយគាត់ក៏មិនដឹងច្បាស់ថា រថយន្តគាត់ទៅបុកម៉ូតូ ឬក៍ម៉ូតូបើកចូលរថយន្តទេ ដោយពេលនោះគាត់រវល់ចុចទូរស័ព្ទ ក៏លាន់ផាំងតែម្តង ហើយអ្នកបើករថយន្តបានបើកទ្វារថយន្តរត់គេចខ្លួនទៅ ចំណែកគាត់ក្រោយពីឃើញបុកដូចនេះគាត់បានបើកទ្វារថយន្តចុះ គាប់ជួនពេលនោះមានសមត្ថកិច្ចម្នាក់ដឹកគាត់តាមម៉ូតូយកមកប៉ុស្តិ៍ដោយខ្លាចថា ប្រជាពលរដ្ឋប្រើហិង្សាដាក់គាត់ ។
បច្ចុប្បន្នសពជនរងគ្រោះទាំង២នាក់ខាងលើបានប្រគល់អោយក្រុមគ្រួសារយកទៅធ្វើបុណ្យរៀងៗខ្លួនតាមប្រពៃណី ចំណែករថយន្តនិងម៉ូតូត្រូវបានសមត្ថកិច្ចចុះទៅវាសវែងយកទៅរក្សាទុកនៅការិយាល័យនគរបាលជើងគោករាជធានីភ្នំពេញ រង់ចាំដោះស្រាយពេលក្រោយ ដោយឡែកបុរសដែលអះអាងថាជាអ្នករួមដំណើរ ត្រូវបានសមត្ថកិច្ចនាំខ្លួនយកទៅសាកសួរផងដែរ ៕
ចែករំលែកព័តមាននេះ