ខេត្តបន្ទាយមានជ័យ ៖ ជនរងគ្រោះដែលត្រូវមេការសំណង់ជនជាតិថៃបា.ញ់សម្លា.ប់យ៉ាងព្រៃ.ផ្សៃលើទឹកដីថៃ ក្នុងខេត្តឆាក់ឆឺនសៅកាលពីម៉ោងជាង៥ល្ងាច ថ្ងៃទី២៣ ខែមេសា ឆ្នាំ២០១៥
ខេត្តបន្ទាយមានជ័យ ៖ ជនរងគ្រោះដែលត្រូវមេការសំណង់ជនជាតិថៃបាញ់សម្លាប់យ៉ាងព្រៃផ្សៃលើទឹកដីថៃ ក្នុងខេត្តឆាក់ឆឺនសៅកាលពីម៉ោងជាង៥ល្ងាច ថ្ងៃទី២៣ ខែមេសា ឆ្នាំ២០១៥ ត្រូវបានបញ្ជូនមកដល់កម្ពុជាហើយកាលពីវេលាម៉ោងជាង៤រសៀល ថ្ងៃទី២៥តាមច្រករបៀងអូរបីជាន់ក្នុងស្រុកអូរជ្រៅ ។
ជនរងគ្រោះក្នុងអំពើបាញ់សម្លាប់ខាងលើឈ្មោះផាត សុអ៊ីម ភេទប្រុស អាយុ២៤ឆ្នាំ ជាកម្មករសំណង់ ធ្វើការនៅខេត្តឆាក់ឆឺនសៅប្រទេសថៃ និងមានទីលំនៅភូមិ-ឃុំត្រពាំងចាន់ ស្រុកបរិបូរណ៏ ខេត្តកំពង់ឆ្នាំង ។
ជុំវិញអំពើបាញ់សម្លាប់យ៉ាងព្រៃផ្សៃពីសំណាក់មេការសំណង់ជនជាតិថៃនេះ ស្ត្រីឈ្មោះថាន់ ថូ អាយុ២៧ឆ្នាំ ត្រូវជាប្រពន្ធជនរងគ្រោះដែលមានផ្ទៃពោះ៥ខែផងនោះបានប្រាប់«កោះសន្តិភាព»ទាំងទឹកភ្នែកថា ប្ដីរបស់គាត់ត្រូវមេការសំណង់ជាជនជាតិថៃឈ្មោះយ៉ៃ ភេទប្រុស អាយុប្រហែល៥០ឆ្នាំ បាញ់និងអាវុធខ្លីមិនស្គាល់ម៉ាកចំនួន៦គ្រាប់ ត្រូវសៀតផ្កា, បំពង់ក, ដើមទ្រូង និងដៃបណ្ដាលឲ្យស្លាប់ក្នុងថ្លុកឈាម ។ ស្ត្រីខាងលើបន្តថា ករណីបាញ់ប្រហារនេះ ដើមចមគឺដោយសារប្ដីរបស់គាត់ប្រឡែងលេងជាមួយកូនប្រុសរបស់ជនជាតិភូមាម្នាក់ ហើយជនជាតិភូមានោះប្រកាន់ខឹងចោទថា ប្ដីរបស់គាត់វាយកូនរបស់គេក៏ទូរស័ព្ទទៅហៅមេការឈ្មោះយ៉ៃនោះមក ។
ពេលមកដល់កន្លែងកើតហេតុ មេការជនជាតិថៃនោះមិនបានសួរនាំប្ដីរបស់គាត់ដើម្បីដឹងខុសត្រូវទេ ស្រាប់តែទាញអាវុធខ្លីបាញ់ប្ដីរបស់គាត់សម្លាប់តែម្ដង ។
ស្ត្រីជាប្រពន្ធបានបន្តទៀតថា ដំបូងសពប្ដីរបស់គាត់ត្រូវភាគីថៃគេមិនចង់ឲ្យយកមកកម្ពុជាទេ ប្រុងឲ្យបូជានៅវត្តមួយក្នុងខេត្តកើតហេតុ ប៉ុន្តែដោយសារមានការអន្តរាគមន៍ជួយពីមន្ត្រីការិយាល័យទំនាក់ទំនងព្រំដែនកម្ពុជា-ថៃ ពិសេសមន្ត្រីកម្ពុជាប្រចាំប្រទេសថៃ ដូចជាមន្ត្រីកុងស៊ុលខ្មែរ, មន្ត្រីស្ថានទូត ទើបសពត្រូវបានភាគីថៃធ្វើការបញ្ជូនមកកម្ពុជាវិញ ។
សពត្រូវបានក្រុមគ្រួសារ និងសាច់ញាតិធ្វើបុណ្យតាមប្រពៃណីយ៍នៅវត្តគគីរសេដ្ឋារាមអូរបីជាន់ ក្នុងឃុំអូរបីជាន់ ស្រុកអូរជ្រៅ ។
ស្ត្រីជាប្រពន្ធជនរងគ្រោះបានអំពាវនាវសុំឲ្យមន្ត្រី និងសមត្ថកិច្ចកម្ពុជា ពិសេសរាជរដ្ឋាភិបាល មេត្តាជួយរកយុត្តិធម៌ដល់ប្ដីរបស់នាងផង ដោយនាងលើកឡើងថា ជនដៃដល់មិនទាន់ត្រូវបានគេចាប់ខ្លួននៅឡើយទេ ម្យ៉ាងនាងក៏មានផ្ទៃពោះ៥ខែមិនទាន់ទទួលបានភាពយុត្តិធម៌ឡើយ ៕
ចែករំលែកព័តមាននេះ