ខេត្តត្បូងឃ្មុំ ៖ ស្ត្រីដៃឆើតពូកែបន្លំលួចលុយតាមទូមាសឈ្មោះស៊ីម ពៅ អាយុ៥០ឆ្នាំ មានទីលំនៅភូមិក្រងស្វាយ ឃុំស្វាយលំពៀ ស្រុកមុខកំពូល ខេត្តកណ្តាល ត្រូវម្ចាស់អាជីវករប្តូរប្រាក់ សហការជាមួយសមត្ថកិច្ចមូលដ្ឋាន ធ្វើការដេញតាមចាប់ខ្លួនបាន កាលពីវេលាម៉ោង០៧ និង៣០នាទីព្រឹកថ្ងៃទី២៥ មេសា ២០១៥ នេះ រួមទាំងដកហូតបានលុយចំនួន៩លានរៀល ស្ថិតនៅភូមិមេមត់ផ្សារ ឃុំមេមត់ ស្រុកមេមត់ រួចបានបញ្ជូនមកាន់អធិការដ្ឋាននគរបាលស្រុកមេមត់ ដើម្បីសួរនាំ ។
លោកវរសេនីយ៍ត្រី ប៉េង អេងហាក់ អធិការនគរបាលស្រុកមេមត់ឱ្យដឹងថា នៅចំណុចទូមាសឈ្មោះស្រីអូន មានម្ចាស់ឈ្មោះ ហម ម៉េង ភេទប្រុស អាយុ៦៧ឆ្នាំ មានទីលំនៅភូមិមេមត់ផ្សារ ឃុំមេមត់ កាលពីវេលាព្រឹកថ្ងៃខាងលើ មានករណីចោរកម្មបង្កឡើងដោយស្ត្រីសង្ស័យឈ្មោះពៅ ដែលជាចោរដៃឆើតបានមកបន្លំលួចយកលុយពីក្នុងទូកញ្ចក់មានរហូតដល់ទៅចំនួន៩លានរៀល រួចក៏ប្រញាប់គេចខ្លួនចេញ តែសំណាងត្រូវបានម្ចាស់ឃើញទាន់ស្រែកឆោឡោនាំគ្នាដេញតាមពីក្រោយបានចម្ងាយជាង១០០ម៉ែត្រ ទើបចាប់បាន រួមទាំងវត្ថុតាងលុយផងដែរ ។
នគរបាលស្រុកមេមត់ប្រាប់ទៀតថា ដំបូងស្ត្រីសង្ស័យបានដើរចូលទៅមុខផ្ទះរបស់អាជីវករ ដើម្បីដូរលុយចំនួន១០០ដុល្លារ តែមិនឃើញអ្នកលក់ឡើយ ហើយក៏បានបើកទូកញ្ចក់យកលុយបានជាច្រើនលានរៀល រត់ចេញទៅខាងក្រៅទាំងប្រញាប់ ។ ស្របពេលដែលម្ចាស់លុយចេញពីក្នុងផ្ទះ ឃើញបាត់កញ្ចប់លុយ ក៏បានស្រែកឡើងបង្កការភ្ញាក់ផ្អើលដល់សមត្ថកិច្ចដែលយាមប្រចាំការក្បែរនោះឃើញទាន់ ក៏សហការចាប់ខ្លួនជាប់រួមទាំងលុយចំនួន៩លានរៀល ត្រូវបានដកហូតមកវិញ និងបាននាំទៅអធិការដ្ឋាននគរបាលស្រុកមេមត់ ក្បែរនោះដើម្បីសួរនាំ។
ស្ត្រីសង្ស័យឈ្មោះស៊ីម ពៅ បានឆ្លើយថា នៅព្រឹកមិញថ្ងៃទី២៥ មេសា ២០១៥ គាត់កាន់លុយដុល្លារ ដើម្បីទៅប្តូរយកលុយខ្មែរ១០០ដុល្លារ ក្រោយពីបានឈប់ចាំជិះរថយន្តបន្តដំណើរចេញពីស្រុកមេមត់ ឆ្ពោះទៅកាន់ខេត្តរតនៈគិរីនោះ តែដោយមិនឃើញអ្នកលក់ ក៏លូកយកលុយតែម្តងបានជាច្រើនរួចបានរត់គេចខ្លួនចេញមិនបានប៉ុន្មានផង ត្រូវគេដេញតាមចាប់ខ្លួន ។
ចែករំលែកព័តមាននេះ