ខេត្តក្រចេះ ៖ ជនសង្ស័យក្នុងអំពើឃាតកម្មវាយសម្លាប់បុរសចំណាស់ម្នាក់នៅក្នុងឃុំបុសលាវ ស្រុកសចិត្របុរី ត្រូវនគរបាលចាប់បញ្ជូនទៅតុលាការហើយ កាលពីថ្ងៃទី២៤ មេសា ២០១៥ នេះ បើទោះបីជាជននេះនៅតែមិនព្រមទទួលសារភាពពីទោសកំហុសក៏ដោយ ។
នគរបាលព្រហ្មទណ្ឌកម្រិតធ្ងន់ខេត្តបានឱ្យដឹងថា ទោះជាជនសង្ស័យមិនព្រមឆ្លើយសារភាពយ៉ាងណាក៏ដោយ តែដោយផ្អែកលើចម្លើយសាក្សីជាច្រើននាក់ និងវត្ថុតាងមួយចំនួនរួចមកនោះ ជនសង្ស័យឈ្មោះមឿន ម៉ាយ អាយុ១៩ឆ្នាំ មានទីលំនៅក្នុងឃុំបុស លាវ ស្រុកចិត្របុរី ត្រូវបាននគរបាលសម្រេចកសាងសំណុំរឿងបញ្ជូនទៅតុលាការខេត្តនៅថ្ងៃទី២៤ មេសា ២០១៥ នេះ ពីបទអំពើឃាតកម្ម។
នគរបាលបានឱ្យដឹងថា កាលពីវេលាម៉ោង៣ទៀបភ្លឺថ្ងៃទី១៩ មេសា ២០១៥ កន្លងមក មានករណីឃាតកម្មវាយសម្លាប់ទៅលើបុរសវ័យចំណាស់ម្នាក់ឈ្មោះទេព សុគន្ធី អាយុ៦៥ឆ្នាំ រស់នៅក្នុងភូមិព្រែកតាអាំ ឃុំបុសលាវ ស្រុកចិត្របុរី ។ សពរបស់ជនរងគ្រោះត្រូវជនដៃដល់ប្រដាប់ដោយវត្ថុរឹងវាយចំក្បាលផ្នែកខាងក្រោយ បណ្តាលឱ្យស្លាប់នៅនឹងកន្លែងជាប់ចិញ្ចើមផ្លូវក្បែរសាលាឆទានក្នុងភូមិ ។
លោកវរសេនីយ៍ទោ ហ៊ួត លឹមហ៊ាង នាយការិយាល័យព្រហ្មទណ្ឌកម្រិតធ្ងន់ខេត្តបានឱ្យដឹងថា បន្ទាប់ពីមានការចុះទៅពិនិត្យដល់ទីតាំងកើតហេតុ និងពិនិត្យសាកសពជនរងគ្រោះហើយ ត្រូវនគរបាលបានកំណត់ករណីនេះ២ផ្សេងគ្នា ១-ជាករណីគ្រោះថ្នាក់ចរាចរណ៍ និងមួយទៀតជាករណីឃាតកម្ម ។ តែក្រោយពីមានការចុះស៊ើបអង្កេតយ៉ាងល្អិតល្អន់មក គឺត្រូវនគរបាលសម្រេចចាប់ឃាត់ខ្លួនជនសង្ស័យរូបនេះកាលពីថ្ងៃទី២២ មេសា ២០១៥ ។
ចែករំលែកព័តមាននេះ