ខេត្តកំពង់ឆ្នាំង ៖ នារីម្នាក់បានរងរបួសយ៉ាងធ្ងន់ធ្ងរ ក្នុងហេតុការណ៍គ្រោះថ្នាក់ចរាចរណ៍មួយកើតឡើងកាលពីវេលាម៉ោង០៨ និង៥៥នាទីព្រឹកថ្ងៃទី២៤ មេសា ២០១៥ នេះ ស្ថិតនៅកំណាត់ផ្លូវជាតិលេខ៥ ត្រង់ចន្លោះគីឡូម៉ែត្រលេខ៩៧ និង៩៨ ក្នុងភូមិសាលាផ្លូវវាយ ឃុំស្វាយជ្រុំ ស្រុករលាប្អៀរ ខណៈរថយន្តម៉ាកឡិចស៊ីស RX300មួយគ្រឿង បើកកៀរម៉ូតូក្នុងទិសដៅបញ្ច្រាសគ្នា បណ្តាលឱ្យនារីរងគ្រោះដួលចូលក្រោមរថយន្ត ហើយត្រូវអូសជាង១០ម៉ែត្រ និងមានរថយន្តម៉ាកហាឡិនឌ័រមួយគ្រឿងទៀត ទៅបុក
គូទរថយន្តឡិចស៊ីសនោះពីក្រោយថែមទៀត ។
សមត្ថកិច្ចនគរបាលស្រុករលាប្អៀរបានឱ្យដឹងថា មុនពេលកើតហេតុ មានម៉ូតូចំនួន៤គ្រឿងដែលជាគ្រួសារមួយបានធ្វើដំណើរពីភ្នំពេញ ទៅខេត្តពោធិ៍សាត់តាមបណ្តាយផ្លូវជាតិលេខ៥ ក្នុងនោះម៉ូតូរបស់នារីរងគ្រោះម៉ាកហ្វីណូ ពាក់ស្លាកលេខភ្នំពេញ 1BD- 2022 បានជិះមុខគេ ស្រាប់តែមកដល់ចំណុចកើតហេតុ ក៏មានរថយន្តម៉ាកឡិចស៊ីសRX300 ពាក់ស្លាកលេខភ្នំពេញ 2Z-3934 បើកបរដោយបុរសឈ្មោះឆាយ រំភើយ អាយុ៤១ឆ្នាំ មានទីលំនៅខេត្តបាត់ដំបង បានជែងជាមួយរថយន្តមួយគ្រឿងទៀត ក្នុងដំណើរស្របទិសគ្នា ក៏ជ្រុលទៅកៀរម៉ូតូម៉ាកហ្វីណូបណ្តាលឱ្យដួល ហើយនារីរងគ្រោះត្រូវរថយន្តម៉ាកឡិចស៊ីសអូសជាង១០
ម៉ែត្រ ។
ខណៈនោះដែរ ក៏មានរថយន្តម៉ាកហាយឡិនឌ័រ ពណ៌ខ្មៅ ពាក់ស្លាកលេខភ្នំពេញ 2Z-3442 មួយគ្រឿងទៀត បើកបរដោយបុរសឈ្មោះវ៉ែន ឌឿន អាយុ២៩ឆ្នាំ មានទីលំនៅខេត្តប៉ៃលិន បានមកបុកគូទរថយន្តឡុចស៊ីពីក្រោយ បណ្តាលឱ្យក្រពិតផ្នែកខាងមុខ ។
ក្រោយពេលកើតហេតុ នារីរងគ្រោះឈ្មោះ ឌឹម មុនីកែវ អាយុ១៦ឆ្នាំ ត្រូវបានគេជួួដឹកទៅសង្គ្រោះនៅមន្ទីរខេត្តភ្លាមៗ ។
ចែករំលែកព័តមាននេះ